दाहे बगती बिधाता का अरज़
गाज़ै-बाज़ै आल़ेए सैणैं लै राज़ै दाबेदो भज़न
1 तिन्नां मणछा लै आसा खास्सी बर्गत ज़ुंण रैनै-गरीबो खैल डाहा,
खरीए पलका करा तिन्नें हेर-सभाल़ बिधाता आप्पै।
2 बिधाता करनी तिन्नें फाज़त, संघा डाहणैं तिंयां ज़िऊंदै,
तेऊ दैणीं तिन्नां लै धरती दी बर्गत,
सह निं तिन्नें दुशमणा मांझ़ै तिन्नां शोटी डाहंदअ।
3 ज़ेभै तिंयां दाहुऐ दै होए,
बिधाता करनै तिंयां पठी नरोगै।
4 मंऐं किई अरज़, "हे बिधाता, मंऐं किऐ ताल्है पाप,
मुल्है कर झींण अर मुंह दै ताज़ै-नरोगै करी।
5 मेरै दुशमण बोला मुल्है इहअ,
अह जाणअ खारकअ मरी अर एऊ जाणैं छ़ेक्कै बिस्सरी।"
6 ज़ेभै तिंयां मुंह झेठू एछा, तिंयां करा एही ई बृथा गल्ला,
तिंयां झाल़ा मेरै बारै बूरी खबर,
संघा पाआ तेते बारै सारै दी फुआह।
7 मेरै सोभ बैरी करा एक-दुजै का मेरै बारै घैंचल़,
तिन्नां हआ मेरी हान्नी ई करने सोठ पल़ी दी।
8 तिंयां कदुष्ट बोला इहअ, "एऊ लागी घणीं नबिज़री दाह,
अह निं ऐबै कधि च़ैनां का खल़अ उझ़ुई सकदअ!"
9 मेरअ आपणअ साथी ज़हा प्रैंदै मुंह खास्सअ भरोस्सअ थिअ,
ज़ुंण मेरी रोटी खाआ त,
सह ई हुअ ऐबै मेरअ दुशमण!41:9 2 शमू. 15:12; जोह. 13:18; शधा. 1:16
10 पर हे बिधाता, तूह कर मुल्है ऐबै झींण संघा दै मुंह ताज़ै-नरोगै करी,
ताकि हुंह तिन्नां लै इना सोभी गल्ला बापस दैंऊं भरी।
11 मेरै दुशमण निं लोल़ी मुखा ज़ितै,
एता का जाआ मुखा थोघ लागी कि तूह आसा मुखा खुश।
12 तंऐं डाहअ हुंह ज़िऊंदअ बच़ाऊई किल्हैकि हुंह आसा नर्दोश,
ताह डाहणअ हुंह सदा-सदा लै आप्पू संघै।
13 तूह बिधाता आसा इज़राईलो परमेशर,
तेरी रहणीं जुगै-जुगै तैणीं ज़ै-ज़ैकार हंदी लागी। एवमस्तू, एवमस्तू।