1 मेरी ऐहा गल्‍ला शूणां सोभै!

संसारै सोभ लोग शूणां कि हुंह किज़ै बोला!

2 होछ़अ-बडअ, सेठ होए या रैनअ गरीब,

सोभै मणछ शूणां कि हुंह किज़ै बोला।

3 मेरी ज़िभा निं किछ़ खोट आथी,

हुंह दैआ अक्ल अर समझ़ाई।

4 हुंह दैआ सैणीं गल्‍ला दी धैन,

संघा दैआ हुंह तेतो भेद बाढै खोज़ी ज़ेही बींन बाज़ा।

5 तैहा खरी निं मुंह डरने ज़रुरत आथी कि

हुंह गोटअ तिन्‍नैं दुशमणै फेरा-फेर,

6 ज़हा आपणीं धन-माया दी भरोस्सअ आसा अर

तिंयां करा आपणीं ज़ैदाता दी घमंड।

7 हाम्हां मांझ़ै निं कोहै मरनै का बच़ी सकदअ,

नां हाम्हैं आपणीं ज़िन्दगीए बदल़ै परमेशरा लै ढब्बै दैई प्राश्त करी सकदै।

8 किल्हैकि मणछे ज़िन्दगीए किम्मत आसा बेघै खास्सी।

हाम्हैं निं जुगै-जुगै बी तेते किम्मत दैई सकदै कि

9 हाम्हैं लोल़ी सदा ज़िऊंदै रहै,

हाम्हां निं कधि लोल़ी मरनअ पल़अ!

10 हाम्हां का शुझिआ आछी कि अक्ली आल़ै मणछ बी मरा

अर कबुधी अर ऐडै मणछ बी मरा तिहै ई!

तिन्‍नें धन-माया छ़ुटा पिछ़ू होरी लै।

11 तिंयां ता सोठा तै इहअ कि तिन्‍नें घअर रहणैं सदा लै,

अर तिंयां रहणैं पोस्ती दर पोस्ती बस्सी!

तैही हआ तिन्‍नें आपणैं-आपणैं नाओंऐं ज़ैगा-ज़िम्मीं।

12 पर मणछ ज़ेतरअ बी मशूर किल्है निं होए, सह निं मरनै का बच़ी सकदअ,

ज़िहै पशू मरा, हाम्हैं बी मरनै तिहै ई।

13 तिन्‍नां लै भाल़ै किहअ हणअ ज़हा आप्पू दी भरोस्सअ आसा,

ज़ुंण आपणीं धन-माया लै झ़ूरा तिन्‍नें नसीबै किज़ै आसा,

14 तिंयां आसा भेडे हेल़्ही ज़िहै छ़ेल़्ही लाऐ दै अर

मौत हणीं तिन्‍नां फुआल लागी दी।

धर्मीं मणछा करनअ तिन्‍नां प्रैंदै राज़,

तिन्‍नें देही चिजणैं घोरी दी,

तिन्‍नें घअरा का दूर।

15 पर परमेशरा हेरनअ हुंह बच़ाऊई,

तेऊ हेरनअ हुंह मौते ज़ोरा का छ़ड़ैऊई।

16 होरी सेठ हंदै भाल़ी निं आपणअ शाह चोल़णअ

कि इने धन-माया भाल़ केही खास्सी हुई।

17 तिंयां जाणैं तेतरी मरी अर

तिन्‍नें शोभा-शान* छ़ुटणीं इधी!

18 हाम्हां मणछे हआ तेभै बड़ैई ज़ेभै हाम्हैं सफल हआ,

हाम्हैं ज़िऊआ तेभै राज्ज़ी-खुशी।

19 पर हाम्हैं मरनै सोभै संघा डेऊणैं तिधी, ज़िधी तिन्‍नें दाद-बाब डेऊऐ

अर ज़िधी सदा न्हैरअ हणअ।

20 मणछ च़ाऐ ज़िहअ बी मशूर होए, सह निं मरनै का बच़ी सकदअ,

हाम्हैं मरनै सोभै तिहै ई ज़िहै पशू मरा।