1 हे परमेशर, ऐबै निं च़ुप्पी रहै,

इहअ नकैंस्सअ निं रहै!

2 भाल़! तेरै दुशमणे आसा मौज़ लागी दी,

ज़ुंण ताह संघै ज़ीद डाहा, तिन्‍नें किअ तेरअ बरोध।

3 तिन्‍नैं किअ आप्पू मांझ़ै तेरी परज़ा हंतणा लै जोग,

तेरै खज़ानै लुटणां लै आसा तिंयां कई बिक्री करदै लागै दै।

4 तिंयां करा आप्पू मांझ़ै एही गल्‍ला,

"एछा, हाम्हां करनअ इज़राईल देश इहअ बरैबाद कि

एतो निं नाअं-नशाण लोल़ी रहअ!"

5 तिन्‍नैं सोभी आसा तेरै खलाफ इहअ करना लै एक्‍कअ किअ द अर

आप्पू मांझ़ै एते पाक्‍की करार डाही दी करी।

6 ईंयां एक्‍कअ करनै आल़ै आसा एदोम देशे लोग, इशमाईली,

मोआबी लोग, हागारी,

7 गेबली, अमोनी, अमोलकी,

पलिश्ती अर सूर देशे लोग।

8 अश्शूरी लोग बी आसा इना ई संघै ज़ुल़ै दै अर लूते आद-लुआद

अमोनी अर मोआबी बी आसा इना बाखा फिरै दै।

9 तिन्‍नां सोभी लै दै तेही ई सज़ा ज़ेही तंऐं मिद्यानी लै अर

किशोन गाडा सिसरा अर ज़बीना लै सज़ा दैनी ती।

10 तिंयां मारै तै तंऐं एनदोर नगरी नेल़ अर

तिन्‍नें ल्हासा चिजी-शल़ी पल़अ तैहा ज़ैगा मैल।

11 तिन्‍नां लै बी कर तिहअ ई, ज़िहअ बभार तंऐं ओरेब अर ज़ीबे* लोगा संघै किअ,

तिन्‍नां प्रैंदै राज़ करनै आल़ै खद्रेल़ जेबाह अर सल्मुने राज़ै ज़िहै,

12 ज़ुंणी इहअ बोलअ त,

"हाम्हां गिम्मणी बिधाते ज़ैगा आप्पू लै।"

13 हे परमेशर, इना फर्ल़ाऊ कुर्लू बागरी धूल़ै अर

बागरी करै भुखलै ज़िहै।

14 ज़िहै आगी करै बण खतम हआ अर

ज़ेही एकी झ़ोलै करै सारी धारा आग शाचा,

15 तिहै ई फर्ल़ाऊ इना तूह आपणीं ढिश-बागरी करै

तेरै ढिश डुआल़ै करै लोल़ी इना काम्मणीं छ़ुटी!

16 हे बिधाता, तिन्‍नैं लोल़ी शर्मिंदै हई मुंह शेऊऐ,

तिन्‍नां का लोल़ी तेरै बलो थोघ लागअ।

17 तिंयां लोल़ी तै इहै हारै तैहा डरा का निं तिन्‍नों पिछ़अ कधि लोल़ी छ़ुटअ,

तिंयां लोल़ी पठी नाक-नकटी हई मूंऐं।

18 ताकि तिन्‍नां का थोघ लागे कि तूह बिधाता आसा परम प्रधान परमेशर एक्‍कै

ज़ुंण सारी पृथूई दी राज़ करा।