भज़न 47

परमेशर आसा म्हारअ माहा राज़अ

गाज़ै-बाज़ै आल़ेए सैणैं लै कोराह खिंबा आल़ैओ भज़न

1 ए देशा-देशे लोगो, ताल़ी बाज़ा!

ज़ोरै-ज़ोरै करा परमेशरे ज़ै-ज़ैकार।

2 सोभिओ मालक, परम प्रधान परमेशर बिधाता का लागा डरनअ ई,

सह आसा महान राज़अ ज़ुंण सारै संसारै राज़ करा।

3 तेऊ दैनी सोभी लोगा का हाम्हां लै ज़ीत,

तेऊ दैनअ हाम्हां लै देशा-देशा प्रैंदै राज़।

4 तेऊ छ़ांटी हाम्हां लै ज़ैगा ज़िधी हाम्हैं बस्सी सके,

तेऊए आपणीं ज़ैदात आसा याकब ज़हा लै सह खास्सअ झ़ूरा।

5 परमेशर डेओआ उझै आपणीं राज़गाद्दी दी बेशणा लै,

ज़ांऊं बिधाता उझै हांढदअ लागा,

तेभै हआ ज़ोरै-ज़ोरै ज़ै-ज़ैकार अर ज़ोरै-ज़ोरै शुण्हिंआं नर्शिंगै बाज़दै।

6 परमेशरा लै बोला गिहा!

माहा राज़ेए ज़ै-ज़ैकार करना लै बोला भज़न।

7 परमेशर आसा सारै संसारो राज़अ,

तेऊए करा भज़न बोली ज़ै-ज़ैकार।

8 परमेशर बेशा आपणीं पबित्र राज़गाद्दी प्रैंदै अर

सह करा देशा-देशे लोगा प्रैंदै राज़।

9 देशा देशे मशूर लोगै किअ आबरामे आद-लुआदा संघै साझ़ू हणां लै झाल़अ

ज़ुंण परमेशरे खास परज़ा आसा,

परमेशर आसा संसारे सोभी राज़ै का ज़बर जोधअ,

सह आसा सोभी प्रैंदै माहा राज़अ।