1 म्हारअ बल अर शरण लणें ज़ैगा आसा परमेशर,

खरीए पलका करा सह ई म्हारी मज़त सदा।

2 च़ाऐ धरती दी केही बी ज़ाज़री होए,

बडै-बडै पर्बत ढूल़ी समुंदरै डुबे, तैबी बी निं हाम्हां किछ़ै डअर।

3 समुंदर च़ाऐ ज़िहअ बी क्रुंगे, तेता का ज़ेही बी शेफा निखल़े

अर बडी-बडी धारा तेते छ़ाल्‍ली करै च़ुक्‍के।

4 एक गाड आसा ज़ुंण म्हारै परमेशरे नगरी खुश दैआ करी,

सह आसा परम प्रधान परमेशरो पबित्र बसेरअ।

5 परमेशर आसा तैहा नगरी* दी अर सह निं कधि बरैबाद हणीं,

परमेशर जाआ राच भैणै का आजी तेसे मज़त करदअ एछी।

6 देशा-देशे लोग हुऐ रोश्शै लाल-पिंऊंल़ै, बडै-बडै राज़ हुऐ खतम,

ज़ांऊं परमेशरै बैण बोलअ तेता करै हुई गुल़ूबिज़ल़ू ज़ेही छ़ेल़ अर धरती लागी गल़दी!✝

7 स्वर्गे सारी सैनो मालक बिधाता आसा हाम्हां संघै।

याकब ज़हा परमेशरा मना, सह आसा म्हारी शरण लणें ज़ैगा।

8 एछा! संघा दैआ बिधाते महान कामां भाल़णीं,

धरती दी भाल़ा तेऊ किहै-किहै नुआहरै काम किऐ।

9 सह करा सारै संसारै जुध खतम,

सह पाआ कबाण चोल़ी अर बर्छ़े करा सह ठोर-ठोर अर

बडै-बडै रथा पाआ सह आगी जैंदरी दहई।

10 सह बोला इहअ, "झ़गल़ै करा बंद, एता लआ समझ़ी हेरे कि हुंह आसा परमेशर,

देशा-देशे लोगा प्रैंदै आसा हुंह ई सैणअ अर

सारै संसारा प्रैंदै आसा हुंह ई मालक।"

11 स्वर्गे सारी सैनो मालक बिधाता आसा हाम्हां संघै।

याकब ज़हा परमेशरा मना, सह आसा म्हारी शरण लणें ज़ैगा।