भज़न 91

म्हारी फाज़त करा बिधाता

1 ज़ुंण परम प्रधान बिधाता सेटा शरण लआ,

ज़ुंण परम प्रधान परमेशरे आसरै निहंचै रहा,

2 सह बोला बिधाता लै इहअ,

"तूह आसा मेरी शरण लणें ज़ैगा अर बच़णे ज़ैगा,

तूह आसा मेरअ परमेशर ज़हा दी हुंह भरोस्सअ डाहा।"

3 बिधाता डाहणैं तम्हैं तिन्‍नां आफ़ता अर

माहा मरी का बच़ाऊई ज़ुंण शकारी ज़ेही नच़ानक एछा।

4 तेऊ फुआरनै आपणैं फैंख,

संघा दैणअ तम्हां लै तेथ आसरअ।

तेऊओ सत्त आसा तम्हां लै बच़ाअ अर फाज़त।

5 तेखअ नां तम्हां राची एछणैं आल़ी आफ़ता का डरने ज़रुरत आथी,

नां तिन्‍नां कतीरा का ज़ुंण धैल़ी एछा,

6 नां तेखअ तम्हां तैहा मरी का किछ़ै डअर हणीं ज़ुंण न्हैरै दी मारा,

नां कहा एही माहा मरी का ज़ुंण धैल़ी दपहरै करा बनाश।

7 तम्हां नेल़ हज़ार मणछ किल्है निं बधल़िए,

अर तम्हां फेर दस हज़ार किल्है निं मरे,

पर तम्हां निं सह बूराई छ़ुंहीं बी सकदी।

8 पर तम्हां भाल़णअ आपणीं आछी कि

कदुष्ट मणछा केही सज़ा भेटी।

9 परम प्रधान परमेशर बिधाता आसा थारी शरण लणें ज़ैगा,

ताह सेटा ठुर्ही सका तम्हैं आपणीं ज़ान बच़ाऊई।

10 तैही निं तम्हां लै आफ़त पल़दी अर

दुख-सांगट बी रहा थारै घअरा का दूर।

11 बिधाता डाहणैं थारी फाज़त करदै हर ज़ैगा स्वर्ग दूत लाई,

तम्हैं ज़िधी बी डेऊए, तिंयां रहणैं तम्हां संघा।

12 तम्हैं नढैऊणैं तिन्‍नां स्वर्ग दूता हाथा ढाकी,

ताकि थारै च़रणैं ठोहल़ नां लागे।

13 तम्हां झेचणैं तेखअ सिह अर

झ़रीलै शपैल़ बी आपणैं खूरा हेठै।

14 बिधाता बोला इहअ, "ज़ुंण मुल्है झ़ूरा, तिंयां हेरनै मुंह बच़ाऊई अर

ज़ुंण मुंह बिधाता दी भरोस्सअ डाहा, तिन्‍नें करनी मुंह फाज़त।

15 ज़ेभै तम्हां आफ़त पल़े, तेभै बोलै मुल्है,

तेभै रहणअ मुंह तिन्‍नां संघै आप्पै।

तिन्‍नां बच़ाऊई करै करनी मुंह तिन्‍नें कदर।

16 तिन्‍नें अमर करनी मुंह खास्सी अर

तेभै जाणअ तिन्‍नां का शुझुई कि मंऐं बच़ाऊऐ तिंयां आपणैं बला करै।"