भज़न 137

गलामीए पलका इज़राईलीओ लामण

1 हाम्हैं रहै बाबेल गाडे बाढै बेशी,

संघा रहै एरुशलेम नगरी आद करी लेरा लांदै लागी।

2 तिधी डाही हाम्हैं मधनूंए बूटा दी

आपणैं बींन बाज़ै छ़ड़ाऊई।

3 किल्हैकि ज़ुंणी हाम्हैं गलाम बणाईं निंयैं तै,

तिंयां लागै हाम्हां लै बोल्दै कि गिहा बोला,

कि तेता करै हाम्हैं तिन्‍नां खुश करे! तिंयां बोला तै,

"ज़ेही गिहा तम्हैं एरुशलेम बोला, तिन्‍नां मांझ़ै शणाऊंआं हाम्हां का गिहा।"

4 हाम्हैं बिधाते गिहा किहअ करै सका

पाखलै देशै बोली?

5 ओ एरुशलेम, ज़ै हाम्हैं ताह बिस्सरी पाए,

तै लोल़ी म्हारअ खाणअ हाथ बी बींन बाज़णीं बिस्सरुअ।

6 ज़ै हाम्हैं ताह आद निं करे,

तै लोल़ी हाम्हैं गिहा बोल़णैं बी बिस्सरुऐ,

ज़ै हाम्हैं इहअ निं सोठै कि एरुशलेम नगरी आसा म्हारी सोभी का बडी खुशी!

7 हे बिधाता, तिन्‍नां धैल़ै कर आद ज़धू एदोमी लोगै एरुशलेम गिम्मअ,

तधू तिन्‍नैं किज़ै-किज़ै किअ।

तैहा गल्‍ला कर आद ज़ुंण तिंयां इहअ बोला तै,

"ऐहा नगरी करा पठी बरैबाद, एता पाआ पठी ढोल़ी!"

8 ओ बाबेल देशे लोगो, तम्हैं हणैं पठी बरैबाद।

हाम्हैं करा बिधाता का अरज़ कि ज़ुंण तम्हैं हाम्हां संघै बर्ताअ किअ,

तेते बदल़ै ज़ुंण तम्हां लै सज़ा दैए, तिन्‍नां लै लोल़ी बिधाता बर्गत दैनी।

9 तिन्‍नैं लोल़ी थारै होछ़ै-होछ़ै लान्हैं,

ज़ांघा का ढाकी बडै पात्थरा प्रैंदै छ़णाट्टी करै मारै।