1 बिधाते ज़ै-ज़ैकार करा,

ए मेरै मन्‍नां, बिधाते ज़ै-ज़ैकार* कर।

2 आपणीं ज़िऊंदी ज़िता रहणअ मुंह तेऊए ज़ै-ज़ैकार करदै लागी,

सारी ज़िन्दगी रहणअ मुंह गिहा बोली तेऊए ज़ै-ज़ैकार करदै लागी।

3 बलबान मणछे आसरै निं रहणअ,

मणछा मांझ़ै निं कोहै तम्हां बच़ाऊई सकदअ।

4 तिंयां बी मरा एकी धैल़ै पोर्ही संघा डेओआ माट्टै जैंदरी फिरी,

तेभै हआ तिन्‍नें सारी सोठ अर बिक्री खतम।

5 तिन्‍नां मणछा लै भाल़ केही बर्गत हणीं ज़सरी मज़त याकबो परमेशर करा

अर ज़ुंण परमेशर बिधाते आसरै रहा।

6 स्वर्ग, पृथूई, समुंदर अर

तेते सोभी गल्‍ला बणाणैं आल़अ आसा सह ई परमेशर।

सह ज़ुंण ज़बाब दैआ, सह हआ अटल़।

7 सह करा हारै-मारै दै मणछो नसाफ अर

भुखै रज़ैऊआ सह रोटी दैई।

ज़ुंण कैद आसा किऐ दै, बिधाता करा तिन्‍नां आज़ाद,

8 सह दैआ कांणै लै आछी कि तिन्‍नां का शुझिए।

ज़ुंण ठोहल़ लागी धरनीं पल़ै तिन्‍नां करा सह हाथा ढाकी आज़रै खल़ै,

सह झ़ूरा धर्मीं मणछा लै।

9 सह करा थारै देशै रहणैं आल़ै पाखलै मणछे बी फाज़त,

बिधबा अर छ़ुटै-मुक्‍कै दै लान्हें करा सह आप्पै मज़त,

पर कदुष्ट मणछा करा सह पठी बरैबाद।

10 बिधाता आसा सदा लै राज़अ,

ओ सियोन, थारै परमेशरा करनअ जुगै-जुगै तैणीं सदा राज़।

बिधाते करा ज़ै-ज़ैकार।