1 होछ़ी अमरा उझै आअ हुंह भाल़दी, दुशमण रहै हंतदै लागी!

ऐबै बोला सोभै इज़राईली इहअ,

2 "होछ़ी अमरा ओर्ही आणै हाम्हैं दुशमणै

फेरा-फेर गोटी हंती-हंती मारी,

पर तिंयां निं हाम्हां हारी सकै।

3 म्हारी पिठी पाई तिन्‍नें एही सिया

ज़िहअ हल़ा करै बाहअ द खेच हआ।

4 पर बिधाता आसा धर्मीं,

तेऊ किऐ हाम्हैं कदुष्ट मणछे गलामी का आज़ाद।

5 मेरी आसा बिधाता का एही अरज़ कि ज़ुंण सियोन नगरी संघै ज़ीद डाहा,

तिंयां लोल़ी हारै अर पिछ़ू हटै।

6 तिंयां लोल़ी दल़बै प्रैंदै लागै दै घाहा ज़िहै हुऐ

ज़ुंण बझ़णै का आजी शुक्‍की जाआ।

7 तेता नां कुंण झाल़दअ अर

नां कुंण पूल़ै बान्हदअ।

8 नां तिन्‍नां लै कुंणी एछदै-नांहंदै मणछै इहअ लोल़ी बोलअ,

‘बिधाता लोल़ी तम्हां लै बर्गत दैनी!

हाम्हैं दैआ तम्हां लै बिधाते नाओंऐं बर्गत।’"