Raiva

शुन्नू ते कम केरनू

19 मेरे ट्लारे ढ्लाव ते बेइनव, ई गल तुस ज़ानतथ, एल्हेरेलेइ हर कोई मैन्हु शुन्नेरे लेई हुशार ते ज़ोने मां पत्रोवं भोए, ते सरकी मां ढिल्‍लो भोए।

1 नर्म जुवाब शुन्ने सेइं सरक ठंडी भोतीए,

पन सकत गल्‍लन सेइं सरक भड़कतीए।

29 ज़ै च़िरे सेइं क्रोध केरनेबालोए तै बड़ो समझ़दार भोते,

पन ज़ै जलदबाज़ भोते, तै बेवकूफी बद्धाते।

11 बेवकूफ अपने सारे मनेरी गल खोलते,

पन अक्लमन्द अपने मने रोकते, ते च़ुप केरते।

16 बेवकूफेरी सरक लूशी बांदी भोइ गाचे,

पन समझ़दार मैन्हु तुहीन नज़रानदाज़ केरते।

26 अगर तुस क्रोधे मां भोथ खबरदार राथ, कि पाप न केरथ, दिहाड़ो डुबने तगर तुश्शो क्रोध मुक्‍की गाए। 27 ते शैताने मौको न देथ कि तै तुश्शी अज़मैइश केरे।

3 मुकदमे करां हथ खड़ो केरनो, मड़देरी इज़्ज़त ठहरतीए;

पन सब बेवकूफ लड़ने जो तियार भोतन।

10 घमण्डे सेइं सिर्फ लड़ैई भोतिन,

पन ज़ैना लोक सलाह मनतन, तैन कां अक्ल रहतीए।

12 बैरे सेइं त लड़ाई पैदा भोतीए,

पन प्यारे सेइं सब पाप ढक्‍के गातन।*

4 ज़ैना लोक होरन सेइं प्यार केरतन तैना सबर ते दयाई सेइं कम केरतन, तैना जलन न केरन, तैना अपनि बडीयाई न केरन, ते न घमण्ड केरन। 5 तैना होरन बेइज़्ज़त न केरन, तैना खुदगरज़ न भोन, जल्दी क्रोध न केरन ते ज़ैना बुरी गल्‍लां तैन केरे खलाफ भोइ, तैन तैना याद न केरन। ते तैन केरे खलाफ ज़ैना पाप केरतन तैना, तैन बड़े आसान तरीके सेइं माफ़ केरतन।

17 "अपने मने मां एक्‍की होरेरे लेई बैर न रेखथ; अपने पड़ोसी ज़रूर झ़िड़कथ, नईं त तैसेरे पापेरो भार तीं छ़ूनो पेलो। 18 बदलो न नेइयथ, ते न अपने कौमरे ढ्लान सेइं बैर रेखथ, पन एक्‍की होरि सेइं अपनो ज़ेरो प्यार रखनो; अवं तुश्शो यहोवा आईं।

20 तैखन तैनी अपने चेलन सेइं ज़ोवं, "ज़ैन मैन्हेरे अन्त्रेरां निस्ते, तैन्ने परमेशरेरी नज़री मां मैन्हु ज़ुट्ठो केरते, 21 किजोकि मैन्हेरे अन्त्रेरां, यानी मैन्हेरे दिले मरां बुरे खियाल, बदमाशी, च़ोरी, कत्ल केरनो, 22 अड्लाहे देइने गलत कम केरनू, लालच़, दुष्ट कम केरनू, बेइमानी, बदचलन, जलन, तुहीन, घमण्ड, ते बेवकूफी एच्‍चन। 23 एना सैरी बुरी गल्‍लां मैन्हेरे अन्त्रेरां, यानी दिले मरां निस्तां मैन्हु ज़ुट्ठो केरचन।"

12 हे ढ्लाव ते बेइनव खबरदार राथ, तुसन मरां केन्चेरो दिल एत्रो बुरो ते बेइमान न भोए, कि ज़ै तैस ज़ींते परमेशरे करां दूर केरे।

इस्राएल परमेशरे करां दूर भोते

1 "तैना ज़ोतन, ‘अगर कोई एपनी कौन्शी शारे, ते तै तैस करां च़ली गाए ते होरि मड़देरी भोइ गाए, त तै पेइलो कुन तैस कां फिरी गालो?’ कुन तै मुल्ख बड़ो अशुद्ध न भोइ गालो? यहोवा एन ज़ोते कि तीं बड़े प्यार केरनेबालन सेइं व्यभिचार कियोरोए, कुन तू हुनी मेरे पासे फिरेली?✝ 2 पहैड़ी केरे पासे तक! एरी कौ ज़ेरि ठारे ज़ैड़ी तीं कुकर्म न कियोरो भोए? बत्तन मां तू एरी बिश्शी ज़ेन्च़रे अक अरबी लूटरो जंगले मां बिश्शो। तीं मुल्ख अपने व्यभिचार ते दुष्टता सेइं अशुद्ध कियोरोए। 3 एल्हेरेलेइ झ़ड़ी रोकी जेई ते बरसांतरे वक्ते मां झ़ड़ी न भोए, फिरी भी तेरू तुत्तर वेश्यारू ज़ेरूए, तीं कोई शर्म नईं। 4 कुन तू हुनी मीं उच्‍ची आवाज़ी सेइं ज़ोली, ‘मेरे बाजी, तूए मेरी जुवानेरो साथी आस? 5 कुन तै हमेशा क्रोधे रालो? कुन तेरो क्रोध ठंडो न भोल्हो?’ तीं एरू ज़ोवरू त आहे, पन तीं बड़ां बुरां कम्मां कियां।"

इस्राएल ते यहूदा मन फिरानो भोल्हो

6 फिरी योशिय्याह राज़ेरे राज़ केरनेरे वक्ते मां यहोवा मीं सेइं एन भी ज़ोवं, "कुन तीं लाव कि भटकने बाली इस्राएले कुन कियूं? तैसां सब उच्‍चे पहाड़न पुड़ ते सब सब्ज़ बुट्टन हैठ गेइतां व्यभिचार* कियोरोए। 7 तैखन मीं सोचू, ज़ैखन इना सब कम्मां तैसां केरि छ़डे तैखन तै मेरे पासे फिरेली; पन तै न फिरी, ते तैसेरी धोखेबाज़ बेइन यहूदा इन हेरू। 8 फिरी मीं लाव, ज़ैखन मीं भटकने बाली इस्राएल तैसेरे व्यभिचार केरनेरे वजाई सेइं शारी ते तैस फारख्ती दित्ती; फिरी भी तैसेरी धोखेबाज़ बेइन यहूदा न डरी, बल्के गेइतां तै भी व्यभिचार केरनेबाली बनी। 9 तैसेरे बेशर्म व्यभिचार* केरनेबाली भोनेरे वजाई सेइं मुल्ख अशुद्ध भोव, तैसां घोड़ ते लेकड़री मूरती केरि पूज़ा केरतां व्यभिचार कियो। 10 एत्रू भोने पुड़ भी तैसारी धोखेबाज़ बेइन यहूदा पूरे मने सेइं मेरे पासे न फिरी, पन कपटे सेइं, यहोवा एन ज़ोते।"

11 यहोवा मीं सेइं इन भी ज़ोवं, "भटकने बाली इस्राएल, धोखेबाज़ यहूदा करां घट दोषी निसोरीए। 12 तू गेइतां इस्राएलेरे उत्तरेरे पासे इना गल्‍लां प्रचार केर, यहोवा एन ज़ोते, हे भटकने बाली इस्राएल वापस एई, अवं तीं पुड़ क्रोधेरी नज़र न केरेलो; किजोकि यहोवा एन ज़ोते, अवं दया केरनेबालो आईं; अवं हमेशा क्रोधे न रेइलो। 13 सिर्फ अपनो ई अधर्म मन्न कि तू अपने परमेशर यहोवा करां दूर भोइ ते सब सब्ज़ बुट्टन हैठ इरां उरां होरन कां जेई, ते मेरी गल्‍लां न मेन्नी, यहोवा एन ज़ोते।

14 "हे भटकने बाले बच्‍चव, मीं कां वापस एज्जा, किजोकि अवं तुश्शो मालिक आई; यहोवा एन ज़ोते। तुश्शे हर एक्‍की नगरे मरां अक, ते हर एक्‍की कुले मरां दूई नेइतां अवं सिय्योने मां पुज़ालो।

15 "अवं तुसन अपने मनेरे मेर्ज़रे मुताबिक पुहालां केरे ज़ेरे प्रधान देइलो, ज़ैना ज्ञान ते अक्ली सेइं तुसन च़ारेले। 16 ते तैन दिहाड़न मां ज़ैखन तुस एस मुल्खे मां बद्धथ, ते च़ेवरे पासन फैलथ, तैखन लोक फिरी एरू न ज़ोले, यहोवारे करारेरो सन्दूख; यहोवा एन ज़ोते। तैसेरो खियाल भी तैन केरे मने मां न एज्जेलो, न लोक तैसेरे न राने सेइं फिक्र केरेले; ते न तैसेरी मरम्मत भोल्ही। 17 तैस मौके यरूशलेमे जो यहोवारो तखत ज़ोले, ते सब कौमां तैस्से यरूशलेमे मां मेरे नंव्वेरे खातर अकोट्ठी भोल्ही, ते तैना फिरी अपने बुरे मनेरे ज़िद्दी पुड़ न च़लेली। 18 तैन दिहाड़न मां यहूदारो घरानो इस्राएलेरे घराने सेइं साथी च़लेलो ते तैना दूईये मिलतां उत्तरेरे मुल्खे मरां एस मुल्खे मां एज्जेले ज़ै मीं तैन केरे दादे-पड़दादन तैन केरो हिस्सो केरतां दित्तोरो थियो।"

परमेशरेरे लोक मूरती केरि पूज़ा केरतन

19 "मीं सोचोरू थियूं, अवं केन्च़रे तीं मट्ठन मां गेनतां तै मन पसंद मुल्ख देईं ज़ै सेभी कौमां केरे मुल्खां केरो शिरोमणि आहे। मीं सोचू कि तू मींजो बाजी ज़ोली, ते मीं करां फिरी न भटकेली।✝ 20 एसमां त शक नईं कि ज़ेरि धोखेबाज़ कौन्श अपने मुन्शे करां मन फिरातीए, तेन्च़रे हे इस्राएलेरे घराना, तू मीं करां दूर भोव, यहोवा एन ज़ोते।"

21 पहाड़न पुड़ इस्राएली केरि लेरां देनेरी ते बिनती केरनेरी आवाज़ शुनोने लगोरीए, किजोकि तैना टारी चाल च़लने लगोरेन ते तैनेईं अपनो परमेशर यहोवा बिसरोरोए। 22 यहोवा तैन सेइं ज़ोवं, "हे भटकने बाले बच्‍चव, वापस एज्जा, अवं तुश्शू भटकनू सुधारेलो। तैनेईं जुवाब दित्तो, हेर, असां तीं कां एवरे अहम; किजोकि तूए इश्शो परमेशर यहोवा आस। 23 सच़्च़े पहाड़न ते पहैड़न पुड़ मूरती पूज़ा फुज़ूले। इस्राएलेरो छुटकारो सच़्च़े इश्शे परमेशर यहोवारे ही ज़िरिये आहे। 24 पन इश्शी जुवैनी करां तैस बदनैमरे देबते बाले इश्शे दादे-पड़दादां केरि कमाई यानी तैन केरे गब्बां ते गोरू ते तैन केरे मट्ठन-कुइयन निगली जेव। 25 असां शरमिन्दा भोइतां लेटी गाम, ते इश्शी बदनामी इश्शू छ़ुंहूं बेनि जेई; किजोकि इश्शे दादे-पड़दादे ते असां भी जुवैनरे हालती करां लेइतां अज़्ज़ेरे दिहाड़े तगर अपने परमेशर यहोवारे खलाफ पाप केरते एवरेम; ते असेईं अपने परमेशर यहोवारी गल्‍लां न मेन्नी।"