1 सिदकिय्याहे बाबेलेरे नबूकदनेस्सरे राज़े सेइं बगावत की। तैसेरे राज़ेरे नंवोवं सालेरे दशोवं महीनेरे दशोवं दिहाड़े बाबेलेरे राज़े अपनि पूरी सेना नेइतां यरूशलेमे पुड़ चढ़ाई की, ते तैस च़ेवरे पासन घेरो दित्तो। 2 एन्च़रां सेइं नगर सिदकिय्याह राज़ेरे हुकूमतरे यारहे सालन तगर बाबेलेरे घेरे मां राव। 3 यारोवं सालेरे च़ेवरोवं महीनेरे नंवोवं दिहाड़े करां लेइतां यरूशलेम नगरेरे लोकां केरे लेई खाने जो किछ न राव। 4 तैखन नगरेरी शहरपनाही मां गत कोश्शू, ते दूईये दिवारां केरे मझ़ाटे ज़ै फाटक राज़ेरे बागरे नेड़े थियो तैस बत्तां सारे जंगी मड़द रातो रात नश्शे कसदी लोक त नगरे घेरतां थिये, राज़ो अराबा जो च़लो जेव। 5 तैखन कसदी केरि सेना सिदकिय्याह राज़ेरो पीछो कियो, ते तै यरीहो नगरेरे मैइदाने मां गेइतां ट्लाव, ते तैसेरी सारी सेना तैस करां तितर-बितर भोइ जेई। 6 तैखन बाबेलेरे सिपैहेईं सिदकिय्याह राज़ो ट्लेइतां रिबला नगरे मां बाबेलेरे राज़े नबूकदनेस्सरे कां नियो, ते तैस सज़ारो हुक्म दित्तो जेव। 7 तैनेईं सिदकिय्याहेरां मट्ठां तैसेरे सामने मारां ते सिदकिय्याहेरी एछ़्छ़ी केढतां छ़ेडी ते तै पितलरी बेड़ी सेइं च़िकतां बाबेले जो नियो।

8 बाबेलेरे राज़े नबूकदनेस्सरे उनियों सालेरे पंच़ोंव महीनेरे सत्तोवं दिहाड़े अंगरक्षकां केरो प्रधान नबूजरदान ज़ै बाबेलेरे राज़ेरो अक अधिकारी थियो तै यरूशलेम नगरे मां अव। 9 तैनी यहोवारे भवने ते राज़ेरो मेहल ते खास केरतां यरूशलेम नगरेरां सारे खास लोकां केरां घरां अग्गी सेइं फुक्‍की छ़डां। 10 यरूशलेमेरे च़ेवरे पासां केरि दिवार कसदी पूरी सेना ज़ै अंगरक्षकां केरे प्रधाने सेइं साथी थी बिछ़ोड़ी छ़डी। 11 ज़ैना लोक नगरे मां रेई जे, ते ज़ैना लोक बाबेलेरे राज़े कांजो नेशतां जेवरे थिये, ते आम मैन्हु ज़ैना रेई जेवरे थिये, इना सब अंगरक्षकां केरे प्रधान नबूजरदाने गुलाम बनेइतां निये। 12 पन तैनी यहूदा प्रदेशेरे गरीब लोकन मरां भी किछ दाछ़रे बागां केरे कम्मे ते ज़मीनदारी केरनेरे लेई छ़डे।

13 यहोवारे भवने मां ज़ैना पितलरे खम्भे थिये ते कुर्सी ते पितलरू कुण्ड ज़ैन यहोवारे भवने मां थियूं, तैना कसदी लोक ट्लोड़तां तैन केरि पितल नेइतां बाबेल जो जे। 14 मटको, फेहोड़ी, चिमटे, धूपदान ते पितलरां सारां भांडां भी ज़ैन सेइं सेवा भोती थी, तैना सब नियां। 15 कड़छ़ ते कुटोरे ज़ैना सोन्ने थिये, ते ज़ैन किछ चैंदरू थियूं, तैन सब सोन्नू, चाँदी, अंगरक्षकां केरे प्रधाने नेव। 16 दूईये खम्भे, अक कुण्ड ते कुर्सी ज़ैना सुलैमाने यहोवारे भवनेरे लेई बनेवरे थिये, इन सब चीज़ां पितल तोलेरे करां बेइर थी। 17 एक्‍की-एक्‍की खम्भेरी ऊँचाई 18-18 हथ थी ते एक्‍की-एक्‍की खम्भे पुड़ सड़े ट्लाई-ट्लाई हथ उच्‍ची पितलरी अक-अक कंगनी थी, ते एक्‍की-एक्‍की कंगनी पुड़ च़ेवरे पासन जाली ते अनार बनेवरे थिये, तैना सारे पितलरे थिये। 18 अंगरक्षकां केरे प्रधाने सरायाह महायाजक ते तैस सेइं साथी कम केरनेबाले याजक सपन्याह ते ट्लाईए मन्दरेरे संत्री ट्लाए। 19 यरूशलेम नगरे मरां तैनेईं अक हाकिम ट्लाव ज़ै शूरबीर बहादरां केरो प्रधान थियो, ते ज़ैना मड़द राज़े कां हाज़र रहते थिये, तैन मरां पंच़ मैन्हु ज़ैना नगरे मां मैल्हे, ते सेनापेतेरो मुन्शी ज़ै लोकन सेना मां भरती केरतो थियो; ते बाकी लोकन मरां 60 मड़द ज़ैना नगरे मां मैल्हे। 20 इन केरो अंगरक्षकां केरो प्रधान नबूजरदान ट्लेइतां रिबलारे राज़े कां जेव। 21 तैखन बाबेलेरे राज़े तैना हमात मुल्खेरे रिबला मां तैन पुड़ एन्च़रे हमलो कियो कि तैना मेरि जे। ते यहूदी गुलाम बनेइतां तैन केरे मुल्खे मरां निये।

22 ज़ैना लोक यहूदा प्रदेशे मां रेई जे, ज़ैना बाबेलेरे राज़े नबूकदनेस्सरे छ़ेडी दित्ते, तैन पुड़ तैनी गदल्याह अधिकारी बनाव। तैसेरे बाजी केरू नवं अहीकाम ते दादेरू नवं शापान थियूं। 23 ज़ैखन टोली केरे सारे प्रधान लोकेईं मतलब नतन्याहेरे मट्ठे इश्माएल कारेहेरे मट्ठे योहानान, नतोपाई, तन्हूमेतेरे मट्ठे सरायाह ते कोन्ची माकाई एरे मट्ठू याजन्याहे ते तैन केरे लोकेईं एन शुनू, कि बाबेलेरे राज़े गदल्याह अधिकारी बनेवरोए, तैखन तैना अपने-अपने लोकन समेत मिस्पा नगरे मां गदल्याह कां आए। 24 गदल्याहे तैन सेइं ते तैन केरे लोकन सेइं कसम खेइतां ज़ोवं, "कसदी सिपेहिन करां न डरा, मुल्खे मां रहते तुस बाबेलेरे राज़ेरे अधीन राथ, तैखन तुश्शू भलू भोल्हु।" 25 पन तैस सालेरे सत्तोवं महीने मां नतन्याहेरू मट्ठू इश्माएल, ज़ैन एलीशामारू पोट्लड़ू ते राज़ेरे खानदाने मरां थियूं, तैनी दश मैन्हु साथी नेइतां गदल्याह कां गेइतां तैस पुड़ एन्च़रे हमलो कियो कि तै मेरि जेव, ते ज़ैना यहूदी ते कसदी लोक तैस सेइं साथी मिस्पा नगरे मां रहते थिये, तैना भी मारे। 26 तैखन निक्‍के बड्डे सारे लोक ते सेनापति कसदी लोकां केरे डरे सेइं मिस्र मुल्खे मां राने लगे।

27 फिरी यहूदारे राज़े यहोयाकीनेरी गुलैमरे सताइयोवं साले मां मतलब ज़ैस साल बाबेलेरो राज़ो एवील्मरोदक राज़गेद्दी पुड़ बिश्शी जेव, तैसेरे बारोवं महीनेरे सताइयोवं दिहाड़े तैनी यहूदारो राज़ो यहोयाकीन कैदखाने मरां केढतां तैस अक बड्डो दर्जो दित्तो। 28 तैस सेइं मिट्ठी-मिट्ठी गल्‍लां केरतां ज़ैना राज़े तैस सेइं साथी बाबेले मां गुलाम थिये तैन केरे तखते करां तैसेरो तखत उच्‍चो कियो, 29 यहोयाकीने कैदखानेरां लिगड़ां बदलां ते तै सैरी ज़िन्दगी राज़े सेइं साथी रोट्टी खातो राव। 30 ते रोज़ेरे खर्च़ेरे लेई राज़े करां खर्च़ रख्खो जेव ज़ै तैसेरे सैरी ज़िन्दगी भर बराबर तैस मैलतो राव।