2 राज़े 19

यशायाह नेबेरे ज़िरिये अश्शूरेरे राज़े करां छुटकारेरी नबूवत

1 ज़ैखन हिजकिय्याह राज़े तैन गल्‍लां केरे बारे मां शुनू, तैखन तैनी दुखेरे मारे अपना लिगड़ां छ़िंदतां, ते टाट पलेटतां यहोवारे भवने मां जेव। 2 ते तैनी एलयाकीम ज़ै राज़ेरे मेहलेरो अधिकारी थियो, ते शेबना मंत्री, ते याजक केरे बुज़ुर्गन जो, ज़ैना सारे टाट पलेटतां थिये, आमोसेरे मट्ठे यशायाह नेबी कां भेज़े। 3 तैनेईं यशायाह नेबी कां गेइतां ज़ोवं, "हिजकिय्याह राज़ो इन ज़ोते, अज़्ज़ेरी दिहाड़ी मुसीबत ते सज़ाह ते निन्दारी दिहाड़ी आए; इश्शी हालते तैस कौन्शरी ज़ेरि ज़ैसारो बच्‍चो ज़र्मनेरो मौके त एवरोए पन ज़र्म देनेरी ताकत नईं। 4 कोन्च एरू न भोए कि तेरो परमेशर यहोवा रबशाकेरी सैरी गल्‍लां शुने, ज़ैस सेइं तैसेरे मालिक अश्शूरेरे राज़े ज़ींते परमेशरेरी निन्दा केरने जो भेज़ोरोए, ते ज़ैना गल्‍लां तेरे परमेशर यहोवा शुनोरिन तैन डांटे; एल्हेरेलेइ तू एन थोड़े बच़ोरां केरे लेई ज़ैना रेई जेवरेन तैन केरे लेई प्राथना केर ज़ैना यरूशलेम नगरे मां बच़ोरेन।"

5 ज़ैखन हिजकिय्याह राज़ेरे अधिकारी यशायाह नेबी कां आए, 6 तैखन यशायाह तैन सेइं ज़ोवं, "अपने राज़े सेइं ज़ोथ, ‘यहोवा इन ज़ोते, कि ज़ैना गल्‍लां तीं शुनोरिन, ज़ैन केरे वजाई सेइं अश्शूरेरे राज़ेरे मैन्हेइं मेरी निन्दा कियोरीए, तैन केरे वजाई सेइं न डर। 7 शुन, अवं अश्शूरेरे राज़े सन्हेरीबेरे मने मां अफवा शुनेइतां डरेइलो ते अपने मुल्खे जो वापस च़लो गाए, ते अवं तैस तैसेरे मुल्खे मां तलवारी सेइं मारेइलो।’"✝19:7 यशा. 37:8-20. 8 तैखन रबशाके वापस एइतां अश्शूरेरो राज़ो लिब्ना नगरे सेइं जंग केरतो मैल्हो, किजोकि तैनी शुनोरू थियूं कि तै लाकीश नगरे मरां च़लो जेवरोए। 9 ज़ैखन तैनी कूश मुल्खेरे राज़े तिर्हाकारेरे बारे मां एन शुनू, "कि तै मीं सेइं लड़नेरे लेई एवरोए," तैखन तैनी हिजकिय्याह कांजो मैन्हु भेज़तां चिट्ठी भेज़ी, 10 तुस यहूदारे राज़े हिजकिय्याह तैस चिट्ठी मां इन लिखोरू थियूं, "तेरो परमेशर ज़ैस पुड़ तू भरोसो केरतस, एन ज़ोइतां तीं धोखो न देइ सके, कि यरूशलेम नगरे अश्शूरेरे राज़ेरे कब्ज़े मां भोल्हु। 11 हेर, तीं त शुनेरूए कि अश्शूरेरे राज़े सारे मुल्खन सेइं केरहो बर्ताव कियोरोए ते तैन केरो सत्यानाश कियोरोए। फिरी कुन तू बच़ेलो? 12 गोजान ते हारान ते रेसेप ते तलस्सारे मां रानेबाले एदेनी, ज़ैना कौमां मेरे दादे-पड़दादेईं नाश केरतां छ़ेडी, कुन तैन नगरन मरां कोन्ची कौमरे देबतेईं तैन मरां कोई बच़ाव? 13 हमात नगरेरो राज़ो, ते अर्पाद नगरेरो राज़ो, ते सपर्वैम नगरेरो राज़ो, ते हेना ते इव्वा नगरां केरो राज़ो एना सब कोड़ि थिये?"

14 ई चिट्ठी हिजकिय्याहे भेज़ोरे मैन्हु केरे हथ्थे मरां नेइतां पढ़ी। तैखन यहोवारे भवने मां गेइतां तैनी यहोवारे सामने खोल्‍ली। 15 ते यहोवा कां ई प्राथना की, "हे इस्राएलेरे परमेशर यहोवा! हे करूबन पुड़ बिशने बाला! धेरतरे सारे रियासतन पुड़ सिर्फ तूए परमेशर आस। अम्बर ते धरती तींए बनाई। 16 हे यहोवा! कन लेइतां शुन, हे यहोवा एछ़्छ़ी खोलतां हेर, ते सन्हेरीबेरे वचन शुन, ज़ै तैनी ज़ींते परमेशरेरी निन्दा केरने जो समाद भेज़ोरोए। 17 हे यहोवा, सच़ त आहे, कि अश्शूरेरे राज़े कौमां ते तैन केरे मुल्ख उज़ाड़ोरेन। 18 ते तैन केरे देबते अग्गी मां छ़डे किजोकि तैना ईश्वर न थिये: तैना मैन्हेरे बनेवरे लकड़ी ते घोड़ ही थिये; एल्हेरेलेइ तैना तैन नाश केरि सके। 19 एल्हेरेलेइ हुनी हे इश्शो परमेशर यहोवा तू असन तैसेरे हथ्थे करां बच़ा, कि धेरतरे रियासतां-रियासतां केरे लोकन पतो लग्गे कि सिर्फ तूए यहोवा आस।"✝19:19 यशा. 37:21-38. 20 तैखन आमोसेरे मट्ठे यशायाह हिजकिय्याह कां समाद भेज़ो, "इस्राएलेरो परमेशर यहोवा एन ज़ोते: ज़ै प्राथना तीं अश्शूरेरे राज़े सन्हेरीबेरे बारे मां कियोरीए, तै मीं शुनोरीए। 21 तैसेरे बारे मां यहोवा एन ज़ोवरूए,

सिय्योनेरी कुवारी कुई*19:21 कुवारी कुई मतलब लोक तीं घटिया ज़ानती

ते तेरो मज़ाक बनातीए,

यरूशलेम नगरेरी कुई, तीं पुड़ क्रोड़ी हिलातीए।

22 तीं ज़ै बदनामी ते निन्दा कियोरीए, तै केसेरी कियोरीए?

ते तीं ज़ै बड्डी गल ज़ोइतां घमण्ड कियोरूए

तैन केसेरे खलाफ कियोरू?

इस्राएलेरे पवित्र परमेशरेरे खलाफ तीं कियूं!

23 तीं अपने भेज़ोरे मैन्हु केरे ज़िरिये मेरी निन्दा केरतां ज़ोवरूए,

कि बड़े रथ नेइतां अवं पहाड़ां केरि च़ोटन पुड़,

बल्के लबानोनेरे मझ़ाटे तगर च़ेढ़तां एवरोईं,

ते अवं तैसेरे उच्‍चे-उच्‍चे गैइड़न ते

रोड़े-रोड़े सनोवर बुट केट्टी छ़डेलो;

ते तैस मां ज़ै सेभन करां उच्‍ची रानेरी ठारी भोल्ही

तैस मां ते तैसेरे जंगलेरे फल देने बैली

बागन मां दाखल केरेलो।

24 मीं त घड़ेइतां प्रदेशेरू पानी पियूं;

ते मिस्र मुल्खेरे नील दरियारे नहरन मां पव रखते तैना शुकेई छ़ेडी।

25 कुन तीं नईं शुनोरू, कि पुराने ज़माने करां लेइतां मीं एन ठहरावरू?

ते पेइले दिहाड़न करां इसेरी तियारी कियोरीए,

तैन हुनी मीं पूरू भी कियोरूए,

कि तू क़िले बाले नगर भी खण्डर ही खण्डर बनातस,

26 इस्से वजाई सेइं तैन केरे रानेबालां केरि ताकत घेटी जेई;

तैना डेरि जे ते शरमिन्दे भोए;

तैना मैइदानेरे निक्‍के-निक्‍के बुट्टन ते सब्ज़ घासेरे ते लाए पुड़ेरे घासेरे

ते एरे अन्नेरे ज़ेरे भोइ जे, ज़ैन बेडोने करां पेइलो शुक्‍की गाते।

27 पन अवं त तेरू बिशोरू रानू, ते अग्रोवं गानू,

ते वापस एजनू ज़ानताईं,

ते इन भी कि तू मीं पुड़ अपनो क्रोध भड़कातस।

28 एस वजाई सेइं कि तू मीं पुड़ अपनो क्रोध भड़कातस

तेरे घमण्डेरी गल्‍लां मेरे शुन्ने मां एवरिन;

अवं तेरे नक्‍के मां अपनि नकेल छ़ेडतां

ते तेरे ऐशी मां अपनि लगाम लेइतां,

ज़ैस बत्तां तू एवरोस, तैस्से बत्तां तीं वापस भेज़ेलो।

29 "ते तेरे लेई ई निशान भोल्हो, कि इस साल तुस ज़ैन एप्पु उगे तैन खाएले, ते दूइयोवं साले तैस ज़ैन अन्न ज़ैन पैदा भोल्हु तैन खाएले; ते ट्लेइयोवं साले बीज़ बेई ते फसल केट्टी बटेले, ते दाछ़री बागां लाले ते तैन केरो फल खेइ बटेले। 30 ते यहूदारे खानदानेरे बच़ोरे लोक फिरी ज़ील छ़डेले ते फलेले। 31 किजोकि यरूशलेम नगरे मरां बच़ोरे ते सिय्योन पहाड़ेरे नश्शोरे लोक निसेले। यहोवा इन कम अपने जलनी सेइं केरेलो।

32 "एल्हेरेलेइ यहोवा अश्शूरेरे राज़ेरे बारे मां इन ज़ोते कि तै यरूशलेम नगरे मां दखल भोइ न बटेलो, बल्के इस पुड़ अक तीर भी न मैरी बटेलो, तै न त ढाल नेइतां एसेरे सामने एज्जी बटेलो, ते न एसेरे खलाफ दमदमो बेन्धी बटेलो। 33 बल्के ज़ैस बत्तां तै एवरो, तैस्से बत्तां तै वापस भी गालो, ते इस नगरे मां दखल न भोइ बटेलो, यहोवा एन ज़ोते। 34 ते अवं अपने खातर ते अपने दास दाऊदेरे खातर इस नगरेरी हिफाज़त केरतां बच़ेइलो।"

35 तैस्से राती मां कुन भोवं, कि यहोवारो स्वर्गदूत निस्तां अश्शूरी लोकां केरे डेरन मां 185000 सिपाही मारे, ते झ़ेझ़ां ज़ैखन लोक उठे, तैखन कुन हेरन, कि लाशा ही लाशा पेवरिन। 36 तैखन अश्शूरेरो राज़ो सन्हेरीब च़लो जेव, ते वापस एइतां नीनवे नगरे मां राने लगो। 37 एक्सां तैड़ी तै अपने देबते निस्रोकेरे मन्दरे मां पूज़ा केरने लगो, कि तैसेरे मट्ठेईं अद्रम्मेलेक ते शरेसेरे तै तलवारी सेइं मरो, ते अरारात मुल्खे जो नेश्शी जे। तैखन तैसेरू अक होरू मट्ठू एसर्हद्दोन तैसेरी जगाई पुड़ राज़ो बनू।