1 अराम* मुल्खेरे राज़ेरे सेनारो अक सेनापति थियो, तैसेरू नवं नामान थियूं, तै अपने मालिकेरे नज़री मां बड़ो खास ते आदरारे काबल थियो, किजोकि यहोवा तैसेरे ज़िरिये सेइं अराम मुल्खे बड़े बार ज़ींत दिवेवरी थी, तै बड़ो बहादर थियो, पन तैस कोढ़ थियूं। 2 किछ दिहाड़े पेइले अरामी सिपाही टोली बनेइतां इस्राएल मुल्खे मां गेइतां अक निकड़ी कुई गुलाम बनेइतां आनोरी थी। ते तै कुई नामानेरी कौन्शरी सेवा केरती थी। 3 एक्सां तैसा कुइयां अपने मालकिन सेइं ज़ोवं, "अगर मेरो मालिक सामरिया नगरेरे एक्‍की नेबी कां भोथो, त केत्रू रोड़ू भोथू! किजोकि तै तैस कोढ़े करां ठीक केरेथो।" 4 ज़ैखन नामाने इन शुनू त तैनी अपने मालिक राज़े कां गेइतां ज़ोवं, "इस्राएली कुई एन्च़रां सेइं ज़ोचे।"

5 अरामेरे राज़े ज़ोवं, "तू गा, अवं इस्राएलेरे राज़े कां अक चिट्ठी भेज़ेलो।" तैखन तै लगभग 350 किल्‍लो चाँदी ते लगभग 68 किल्‍लो सोन्नू, ते 10 लिगड़ां केरि जोड़ी साथी नेइतां च़लो जेव। 6 ते सेनापति इस्राएलेरे राज़े कां तै चिट्ठी नेइतां जेव ज़ैस मां इन लिखोरू थियूं, "ज़ैखन ई चिट्ठी तीं मैल्हे, तैखन समझ़ कि मीं नामान नंव्वेरो अक सेवक तीं कां एल्हेरेलेइ भेज़ोरोए, कि तू तैसेरू कोढ़ दूर केरस।" 7 ई चिट्ठी पढ़ने पुड़ इस्राएलेरे राज़े अपना लिगड़ां छ़िंदतां ज़ोवं, "कुन अवं मारनेबालो ते ज़ींतो केरनेबालो परमेशर आईं कि तीं तै मैन्हु मीं कां एल्हेरेलेइ भेज़ोरोए कि अवं तैसेरू कोढ़ दूर केरीं? इस गल्‍ली पुड़ सोच विचार केरा, तै मीं सेइं लड़ाई केरनेरी वजा तोपते।"

8 एन शुन्तां कि इस्राएलेरे राज़े अपना लिगड़ां छ़िन्दोरन, परमेशरेरे नेबे एलीशा राज़े कां समाद भेज़ो, "तीं किजो अपना लिगड़ां छ़िंदां? तैस मीं कां एजने दे, तैखन तैस पतो च़लेलो कि इस्राएले मां अक नबीए।" 9 तैखन नामान घोड़े ते रथ्थन सने एलीशा नेबेरे दारे पुड़ एइतां खड़ो भोव। 10 तैखन एलीशा अक मैन्हु तैस कां इन ज़ोने भेज़ो, "तू गेइतां यरदन दरियाए मां सत बार चुभी दे, तैखन तेरी जान ज़ेरि थी तेरही भोइ गाली, ते तू शुद्ध भोइ गालो।" 11 पन नामाने बड़ी सरक अई ते इन ज़ोइतां च़लो जेव, "मीं त सोचोरू थियूं, कि ज़रूर तै मीं कां बेइर एज्जेलो, ते खड़ो भोइतां अपने परमेशर यहोवा कां प्राथना केरतां कोढ़ेरे जगाई पुड़ अपनो हथ रेखतां कोढ़ दूर केरेलो! 12 कुन दमिश्क नगरेरे अबाना ते पर्पर दरिया इस्राएली केरे सारे दरियान करां रोड़े नईं? कुन अवं तैन मां निहेइतां शुद्ध न भोइ सेखी?" एल्हेरेलेइ तैस बड़ी सरक अई ते वापस च़लो जेव। 13 पन तैसेरे सेवक नेड़े आए ते तैन मरां अक ज़ोने लगो, "हे इश्शे मालिक अगर नबी तीं कोई भारी कम केरनेरो हुक्म देथो, त कुन तू तैस न केरेथो? फिरी अगर तै ज़ोते, कि निहेइतां शुद्ध भोइ गा, त इन त मन्नू तेरे लेई केत्रू आसान आहे।" 14 तैखन तैनी परमेशरेरे नेबेरे ज़ोनेरे मुताबिक यरदन दरियाए मां गेइतां तैस मां सत बार चुभी दित्ती, ते तैसेरी चमड़ी निकड़े बच्‍चेरी ज़ेरि भोइ जेई; ते तै कोढ़े करां शुद्ध भोइ जेव।✝

15 तैखन तै अपने सारे अधिकैरन समेत एलीशा नेबी कां वापस अव, ते तैसेरे सामने खड़े भोइतां ज़ोने लगो, "शुन, हुनी मीं पतो च़लो, कि सैरी ज़मीनी पुड़ इस्राएलेरां अलावा कोन्च परमेशर नईं! एल्हेरेलेइ हुनी अपने दासेरो तोफो कबूल केर।" 16 पन एलीशा ज़ोवं, "यहोवा ज़ेसेरे सामने अवं हाज़र रहताईं तैसेरी कसम अवं कोई तोफो न नेइलो;" ते तैनी तै बड़ो मजबूर कियो कि तोफो कबूल केर, पन फिरी भी तै इन्कार केरतो राव। 17 तैखन नामाने ज़ोवं, "ठीके, त तेरे दासे दूई खचर मित्ती नेने देथ, किजोकि अज़्ज़ेरां बाद तेरो दास यहोवारे अलावा कोन्ची देबते जो होमबलि या मेलबलि न च़ाढ़ेलो। 18 अक गल यहोवा तेरे दासेरी माफ़ केरे, कि ज़ैखन मेरो मालिक रिम्मोन देबतेरे मन्दरे मां मथ्थो टेकने जो गाए, ते तै मेरे हथ्थेरो सहारो ने, ते मीं भी रिम्मोन देबतेरे मन्दरे मां मथ्थो टेकनो पे, तैखन यहोवा तेरे दासे मीं माफ़ केरे कि अवं रिम्मोन देबतेरे मन्दरे मां मथ्थो टेकी।" 19 एलीशा तैस सेइं ज़ोवं, "सुखे सेइं गा।"

पन ज़ैखन तै तैस करां थोड़े ज़ेरे दूर च़लो जेव, 20 कि परमेशरेरो नबी एलीशारो सेवक गेहजी सोचने लगो, "मेरे मालिके त तै अरामी नामान एन्च़रे गाने दित्तो कि ज़ैन तैनी देनेरे लेई साथी आनोरू थियूं तैनी न नियूं, पन यहोवारी कसम अवं तैसेरे पत्ती दौड़तां तैस करां किछ न किछ नेइलो।" 21 तैखन गेहजी नामाने पत्ती दौड़ो, नामाने कोई एप्पु पत्ती दौड़तो हेरतां, तैस सेइं मिलने जो रथे पुड़ेरां ओस्सो, ते पुछ़ू, "सब ठीक त आहे?" 22 तैनी ज़ोवं, "हाँ, सब ठीके; पन मेरे मालिके अवं इन ज़ोनेरे लेई भेज़ोरोईं, ‘एप्रैमेरे पहाड़ी इलाके मरां नेबी केरे टोली मरां दूई जुवान मीं कां एवरेन, एल्हेरेलेइ तैन केरे लेई लगभग 34 किल्‍लो चाँदी दे ते दूई जोड़ी लिगड़ां दे।’" 23 नामाने ज़ोवं, "खुशी सेइं लगभग 68 किल्‍लो चाँदी ने।" तैखन तैनी तैस कां लगभग 68 किल्‍लो चाँदी अलग थेलन मां बेन्धतां, दूई जोड़ी लिगड़न समेत अपने सेवकन कां छ़ूने जो दित्तू, ते तैना तैन अग्री-अग्री च़ले। 24 ज़ैखन तैना टैपू कां नेड़े पुज़्ज़े, तैखन तैनी तैना चीज़ां नेइतां घरे मां रेखी, ते तैना मैन्हु भेज़े, ते तैना च़ले जे। 25 ते अन्तर गेइतां तै एलीशा नेबेरे सामने खड़ो भोव। एलीशा तैस पुछ़ू, "हे गेहजी तू कोरहां जेवरो थियो?" तैनी ज़ोवं, "तेरो दास अवं त कोन्च न थियो जेवरो।" 26 पन एलीशा गेहजी सेइं ज़ोवं, "ज़ैखन तै मैन्हु नामान तुत्तर फिरेइतां तीं सेइं मिलने जो अपने रथे पुड़ेरां ओसोरो थियो, तैखनेरो तै पूरो हाल अवं ज़ानताईं; कुन ई मौको चाँदी या लिगड़ां या ज़ैतून या दाछ़री बागां, गब्बां, गोरू ते नौकर-नौकरैनी नेनेरो आहे? 27 एस वजाई सेइं नामानेरू कोढ़ तीं ते तेरे खानदाने हमेशा लगोरू रालू।" तैखन तै हिंवेरो ज़ेरो छ़ितो सुफेद कोढ़ी भोइतां तैसेरे सामनेरां च़लो जेव।