2 राज़े 21

मनश्शेरी हुकूमत

1 ज़ैखन मनश्शे यहूदा प्रदेशे पुड़ राज़ केरने लगो, तैखन तैसेरी उमर 12 साल थी, ते यरूशलेम नगरे मां तैनी 55 साल राज़ कियूं; ते तैसेरी अम्मरू नवं हेप्सीबा थियूं। 2 तैनी तैन कौमां केरे भिट्टे कम्मां केरे मुताबिक, ज़ैना यहोवा इस्राएली लोकां केरे सामनेरां मुल्खे मरां केढोरी थी, तैनी यहोवारे नज़री मां बुराई की। 3 तैनी तैना मूरती पूज़ा केरि उच्‍ची ठारां ज़ैना तैसेरे बाजी हिजकिय्याहे बर्बाद कियोरी थी, फिरी बनेई, ते इस्राएलेरो राज़ो अहाबेरी ज़ेरि बाल देबतेरी लेई वेदी ते अशेरा बनावेई, ते अम्बरेरे सारे तारन कां झुको ते तैन केरि पूज़ा केरतो राव। 4 तैनी यहोवारे तैस भवने मां वेदी बनेई ज़ेसेरे बारे मां यहोवा ज़ोवरू थियूं, "यरूशलेम नगरे मां अवं चाताईं लोक मेरी आराधना केरन।" 5 बल्के यहोवारे भवनेरे दूईये अंगन्न मां भी तैनी अम्बरेरे सारे तारां केरि बड्डी वेदी बनावेई। 6 फिरी तैनी अपनु मट्ठू अग्गी मां बलि केरतां च़ाढ़ू; ते रोड़ो-बुरो वक्त मनतो, ते मंत्र, ते जैदूगिरन ते भूत साधने बालन सेइं संगती केरतो थियो; तैनी एरां बड़ां कम्मां कियां ज़ैना यहोवारे नज़री मां बुरन, ते ज़ैन सेइं तै सेरकोते। 7 अशेरा देबरी ज़ै मूरती तैनी बनेवरी थी, तै तैनी तैस भवने मां रख्खी, ज़ेसेरे बारे मां यहोवा दाऊद ते तैसेरे मट्ठे सुलैमाने सेइं ज़ोवरू थियूं, "इस भवने मां ते यरूशलेम नगरे मां, ज़ै मीं इस्राएली केरे सारे गोट्लन मां च़ुनोरोए, ते तैड़ी लोक हमेशा मेरी आराधना केरन। 8 ते अगर तैना मेरे सारे हुक्म ते मेरे दास मूसेरे दित्तोरे कानूनेरे मुताबिक केरनेरी एहतियात केरन, त अवं एरू न केरेलो कि ज़ै मुल्ख मीं इस्राएलेरे बुज़ुर्गन जो दित्तोरो थियो, तैस मरां निस्तां तैना मारे-मारे फिरेले।" 9 पन तैनेईं न मन्नू, पन मनश्शे तैना इड़ी तगर भड़काए कि तैनेईं तैन कौमन करां भी जादे बुराई की ज़ैना कौमां यहोवा इस्राएली केरे सामने नाश कियोरी थी।

10 एल्हेरेलेइ यहोवा अपने दास नेबी केरे ज़िरिये ज़ोवं, 11 "यहूदा प्रदेशेरे राज़े मनश्शे ज़ैना इना भिट्टां कम्मां कियोरन, ते ज़ेत्री बुरैई एमोरी लोकेईं की ज़ैना तैन करां पेइले थिये, तैन करां भी जादे बुराई की; तैनी यहूदा प्रदेशेरे लोकन करां अपनि बनेवरी मूरती केरि पूज़ा करावेइतां तैना पापे मां फसाए। 12 एस वजाई सेइं इस्राएलेरो परमेशर यहोवा इन ज़ोते कि शुना, अवं यरूशलेम नगरे ते यहूदा प्रदेशेरे पुड़ एरी मुसीबत छ़डनी चाताईं कि ज़ै कोई तैसेरी खबर शुनेलो तै बड़ो हैरान रालो। 13 ते ज़ै नापनेरी रस्सी मीं सामरिया नगरे पुड़ छ़डोरीए ते ज़ै सलाह मीं इस्राएलेरे राज़े अहाबे ते तैस तैसेरे खानदाने पुड़ टंगोरीए तैए यरूशलेम नगरे पुड़ छ़डेलो। ते अवं यरूशलेम नगरे एन्च़रे पूंछ़ेलो ज़ेन्च़रे कोई थैली मां पूंछ़ते ते तैस पूंछ़तां उलटालो। 14 अवं अपनो हिस्सो ज़ै बच़ोरे लोकन शैरतां तैन दुश्मना केरे हथ्थे केरि देइलो ते तैना अपने सारे दुश्मना केरे लेई लूट ते धन बेनि गाले। 15 एसेरी वजा ई आहे, कि ज़ेइसेरे देंते तैन केरे बुज़ुर्ग मिस्र मुल्खे मरां निस्से तेइसेरे देंते अज़्ज़ेरे दिहाड़े तगर तैना कम्मां ज़ैन मेरी नज़री मां बुरू आन, मीं सरकाते एज्जी राहोरेन।"

16 मनश्शे न सिर्फ तैन कम करावेइतां यहूदी लोकन करां पाप कराव, ज़ैन यहोवारी नज़री मां बुरू थियूं, बल्के बेकसूरां केरो बड़ो खून बगाव, इड़ी तगर कि तैनी यरूशलेम नगरे मां एक्‍की पासेरां होरी पासे तगर बेकसूर लोक मारे।

17 मनश्शेरां बाकी सारां कम्मां ज़ैना तैनी कियां, ते ज़ैना पाप तैनी किये, तैना सारे यहूदारे राज़ां केरे इतिहासेरी किताबी मां लिखोरेन। 18 आखरी मां मनश्शे अपने दादे-पड़दादां केरो ज़ेरो मेरि जेव ते तैन केरे कब्रां केरे ड्लखोरां दब्बो जेव, ते तै तैसेरे भवनेरी बागी मां ज़ैस जो उज्जारी बाग ज़ोतन दब्बो जेव; ते तैसेरू मट्ठू आमोन तैसेरे जगाई पुड़ राज़ो बनू।

आमोनेरू राज़

19 ज़ैखन आमोन राज़ो बनो, तैखन तैसेरी उमर 22 साल थी, ते यरूशलेम नगरे मां दूई साल राज़ कियूं; ते तैसेरी अम्मरू नवं मशुल्‍लेमेत थियूं ज़ै योत्बारी रानेबाली हारूसेरी कुई थी। 20 ते तैनी अपने बाजी मनश्शेरू ज़ेरू तैन कम कियूं, ज़ैन यहोवारी नज़री मां बुरू थियूं। 21 तै पूरे तरीके सेइं अपने बाजी केरि ज़ेरि चाली पुड़ च़लतो राव, ते ज़ैन मूरती केरि पूज़ा तैसेरो बाजी केरतो थियो, तैन केरि पूज़ा तै भी केरतो थियो ते तैन केरि आराधना केरतो थियो। 22 तैनी अपने दादे-पड़दादां केरो परमेशर यहोवा शारो, ते यहोवारी बत्ती पुड़ न च़लो। 23 आमोनेरे किछ अधिकैरेईं साज़िश केरतां राज़ो तैसेरे मेहले मां मारो। 24 तैखन आम लोकेईं तैना सब मारे, ज़ैनेईं आमोन राज़ेरे खलाफ साज़िश कियोरी थी, ते लोकेईं तैसेरू मट्ठू योशिय्याह तैसेरे जगाई पुड़ राज़ो बनाव। 25 बाकी ज़ैना कम्मां आमोने कियां तैना सब यहूदारे राज़ां केरे इतिहासेरी किताबी मां लिखोरन। 26 तै भी उज्जारी बागी मां तैसेरी कब्री मां दब्बो जेव; ते तैसेरू मट्ठू योशिय्याह तैसेरे जगाई पुड़ राज़ केरने लगू।