1 इस्राएलेरे राज़े अहाबेरां मरनेरे पत्ती मोआब मुल्ख इस्राएल मुल्खेरे खलाफ बगावत केरने लगो। 2 एक्सां अहज्याह राज़ो सामरिया नगरे मां अपने मेहलेरे बेइयें छतरां दैरी मरां खिरको, ते बड़ो ज़खमी भोइ जेव। तैखन तैनी एन ज़ोइतां किछ मैन्हु भेज़े, "तुस गेइतां पलिश्ती केरे एक्रोन नगरेरे बाल-जबूब देबते कां इन पुछ़तां एज्जा, कि कुन अवं बच़ेलो या नईं?" 3 तैखन यहोवारे स्वर्गदूते तिशबे नगरेरे एलिय्याह नेबी हुक्म दित्तो, "उठतां सामरिया नगरेरे राज़ेरे भेज़ोरे मैन्हन सेइं मिलनेरे लेई गा, ते तैन सेइं ज़ो, ‘कुन इस्राएल मुल्खे मां कोई परमेशर नईं ज़ै तुस पलिश्ती केरे एक्रोन नगरेरे बाल-जबूब देबते कां पुछ़ने गातथ?’ 4 एल्हेरेलेइ हुनी राज़े सेइं ज़ोथ कि यहोवा इन ज़ोते, ‘ज़ैस बिछ़ाने पुड़ तू रेई जेवरोस, तैस पुड़ेरां तू कधी न उठी बटेलो, पन मेरि गालो।’" तैखन एलिय्याह इन ज़ोइतां तैट्ठां च़लो जेव।

5 ज़ैखन अहज्याहेरे भेज़ोरे मैन्हु तैस कां वापस आए, तैखन तैनी तैन पुछ़ू, "तुस किजो वापस एवरेथ?" 6 तैनेईं तैस जुवाब दित्तो, "अक मैन्हु असन सेइं मिलने अव, ते तैनी ज़ोवं, ‘ज़ैनी राज़े तुस भेज़ोरेथ तैस कां वापस गेइतां ज़ोथ, यहोवा इन ज़ोते, कि कुन इस्राएले मां कोई परमेशर नईं ज़ै तू एक्रोन नगरेरे बाल-जबूब देबते कां पुछ़ने जो भेज़तस? एस्से वजाई सेइं ज़ैस बिछ़ाने पुड़ तू रेई जेवरोस, तैस पुड़ेरां कधी न उठी बटेलो, पन मेरि गालो।’" 7 राज़े तैन पुछ़ू, "ज़ै मैन्हु तुसन सेइं मिलने अव, ते तुसन सेइं इना गल्‍लां ज़ोई, तैसेरू रंग-रूप केरहु थियूं?" 8 तैनेईं तैस जुवाब दित्तो, "तैनी मैन्हे त बालन बालां लिगड़ां लेवरां ते तैनी अपने मझ़े चमड़ेरो पटको बन्धोरो थियो।" अहज्याह राज़े ज़ोवं, "तै त पक्‍को तिशबे नगरेरो एलिय्याह भोल्हो।"✝

9 तैखन राज़े एलिय्याह नेबी कां अक सेनापति तैसेरे 50 सिपेहिन समेत भेज़ो। तैने एलिय्याह कां गेइतां कुन हेरू कि तै पहाड़ेरे च़ोटी पुड़ बिशोरोए। तैखन तैनी एलिय्याह सेइं ज़ोवं, "हे परमेशरेरे नबी, राज़े ज़ोवरूए, ‘तू ओस्तां बुन एई।’" 10 पन एलिय्याह नेबे तैस सेनापति सेइं ज़ोवं, "अगर अवं परमेशरेरो नबी आईं त अम्बरेरां अग बिछ़ड़तां तीं ते तेरे 50 सिपेहिन समेत भस्म केरि छ़डे।" तैखन अम्बरेरां अग अई ते तै ते तैसेरे 50 सिपाही फुकतां भस्म किये।*

11 ज़ैखन राज़े ई खबर मैल्ही, तैखन तैनी फिरी तैस कां अक होरो सेनापति 50 सिपेहिन समेत भेज़ो। सेनापति तैस कां गेइतां ज़ोवं, "हे परमेशरेरे नबी, राज़े एन ज़ोवरूए, ‘जल्दी सेइं तू ओस्तां बुन एई।’" 12 पन एलिय्याह नेबे जुवाब देइतां तैन सेइं ज़ोवं, "अगर अवं परमेशरेरो नबी आईं त अम्बरेरां अग बिछ़ड़तां तीं ते तेरे 50 सिपेहिन फुकतां भस्म केरे।" तैखन अम्बरेरां परमेशरेरी अग अई ते तै ते तैसेरे 50 सिपाही फुकोइतां भस्म किये।

13 ज़ैखन राज़े ई भी खबर मैल्ही, फिरी तैने ट्लेइयोवं बार अक होरो सेनापति 50 सिपेहिन समेत भेज़ो, ते तै सेनापति पहाड़े पुड़ च़ेढ़तां, एलिय्याह नेबी कां सामने ज़ैधू केरे भारे बिशतां, ते छंदे केरतां तैस कां बिनती की, "हे परमेशरेरे नबी मेरे प्राण ते तेरे इन दासां केरे प्राण तेरी नज़री मां कीमती भोन। 14 50-50 सिपाही केरे ज़ैना दूई सेनापति अपने-अपने सिपेहिन समेत पेइले एवरे थिये, तैना त अम्बरेरां अग्गां बिछ़ड़तां भस्म केरि छ़डे, पन हुनी मेरे प्राण तेरी नज़री मां कीमती भोन।" 15 तैखन स्वर्गदूते एलिय्याह नेबी सेइं ज़ोवं, "तैस सेइं साथी बुन गा, तैस करां न डेरां।" तैखन एलिय्याह नबी उठतां तैस सेइं साथी राज़े कां जेव, 16 ते तैनी राज़े सेइं ज़ोवं, "यहोवा इन ज़ोते, ‘तीं त एक्रोन नगरेरे बाल-जबूब देबते कां पुछ़नेरे लेई मैन्हु भेज़ोरे थिये त कुन इस्राएले मां कोई परमेशर नईं कि ज़ैस करां तू पुछ़ी सखतस? एल्हेरेलेइ तू ज़ैस बिछ़ाने पुड़ रेई जेवरोस, तैस पुड़ेरां कधी न उठेलो, पन मेरि गालो।’"

17 एन्च़रे सेइं यहोवारे इस वचनेरे मुताबिक ज़ैन एलिय्याहे ज़ोवरू थियूं, अहज्याह राज़ो मेरि जेव। ते तै बेऔलाद थियो एल्हेरेलेइ तैसेरो ढ्ला यहोराम राज़ो बनो। इन यहूदा प्रदेशेरे राज़े यहोशापातेरे मट्ठे यहोरामेरे राज़ केरनेरे दूइयोवं साले मां भोवं। 18 अहज्याह राज़ेरां बाकी कम्मां ज़ैना तैनी कियां तैना इस्राएलेरे राज़ां केरे इतिहासेरी किताबी मां लिखोरन।