1 एक्सां नेबी केरे टोली मरां केन्चे एलीशा सेइं ज़ोवं, "ई ठार ज़ैस मां अस तेरे सामने रहतम, ई इश्शे लेई बड़ी निकड़ीए। 2 एल्हेरेलेइ अस यरदन दरियाए तगर गाम, ते तैट्ठां असेईं अक-अक टम्मन एन्हतां, इड़ी अपने रानेरे लेई अक ठार बनाम;" तैनी ज़ोवं, "ठीके गाथ।" 3 तैखन तैन मरां एक्‍के ज़ोवं, "अपने सेवकन सेइं साथी च़ल;" तैनी ज़ोवं, "च़ला।" 4 एल्हेरेलेइ तै तैन नेबन सेइं साथी च़लो ते तैना यरदन दरियारे बन्ने पुड़ पुज़तां बुट कटने लगे। 5 पन ज़ैखन तैन मरां अक नबी बुट कटने लगोरो थियो, त मैकेरो डण्डो छुटतां मैक्‍कु पैनी मांजो बिछ़ड़ो; एल्हेरेलेइ तै चिन्डां मैरतां ज़ोने लगो, "ओहो! मेरे मालिक, तै त कोन्ची करां मेगतां आनोरो थियो।" 6 परमेशरेरे नेबे पुछ़ू, "तै कोढ़ी हेरोरोए?" ज़ैखन तैनी तै ठार हिराई तैखन तैनी अक कैड़ोवं केटतां तैड़ी जो शारू, ते तै मैक्‍कु पैनी पुड़ तेरने लगो। 7 एलीशा तैस जो ज़ोवं, "मैक्‍कु ट्ला।" तैखन तैनी हथ अग्रोवं केरतां तै मैक्‍कु ट्लाव।

8 तैन दिहाड़न मां अरामेरो राज़ो इस्राएले सेइं जंग केरने लगोरो थियो, ते तैनी सलाह केरतां अपने सेनापेतन सेइं ज़ोवं, "फलाने ठैरी पुड़ मेरे डेरे भोल्हे।" 9 पन परमेशरेरे नेबे इस्राएलेरे राज़े कां समाद भेज़ो, "एहतियात केरां ते फलाने ठारी मेइं न गेइयां, किजोकि तैड़ी अरामी सिपाही हमलो केरनेबालेन।" 10 तैखन इस्राएलेरे राज़े तैस जगाई जो, ज़ेसेरे बारे मां परमेशरेरे नेबे तैस ठाकेरू थियूं, मैन्हु भेज़तां, अपनि हिफाज़त की; ते एन्च़रे सेइं एक्‍की दूई बार नईं बलके बड़े बार भोवं।

11 एस वजाई सेइं अरामेरे राज़ेरो दिल बड़ो घेमरोई जेव; ते तैनी अपने सेनापति कुजेइतां पुछ़ू, "कुन तुस मीं सेइं न ज़ोले कि इश्शे लोकन मरां कौन इस्राएलेरे राज़ेरे पासे?" तैसेरे एक्‍की सेनापेते ज़ोवं, हे मेरे मालिक! हे मेरे राज़ा! एरू नईं, 12 एलीशा ज़ै इस्राएले मां नबीए, तै इस्राएलेरे राज़े सेइं तैना गल्‍लां भी ज़ोते, ज़ैना तुस अपने कमरन मां ज़ोतथ। 13 राज़े ज़ोवं, "गेइतां हेरा कि तै कोड़ि आहे, तैखन अवं सिपाही भेज़तां तैस ट्लुवालो।" तैस ई खबर मैल्ही कि, "तै दोतान नगरे मांए।" 14 तैखन अरामेरे राज़े तैड़ी घोड़े ते रथ्थन सने अक सेनारी भारी टोली भेज़ी, ते तैनेईं राती एइतां दोतान नगरे घेरो दित्तो।

15 झ़ेझ़ां एलीशा नेबेरो सेवक उठ्ठो ते गेइतां कुन हेरते कि घोड़न ते रथ्थन सेइं साथी एक्‍की टोलां नगरे घेरो दित्तोरोए। तैखन तैसेरे सेवके तैस सेइं ज़ोवं, "ओहो! मेरे मालिक, अस कुन केरम?" 16 तैनी ज़ोवं, "डर न; किजोकि ज़ैना इश्शे पासेन, तैना तैन करां जादेन, ज़ैना तैन केरे पासेन।" 17 तैखन एलीशा नेबे ई प्राथना की, "हे यहोवा, एसेरी एछ़्छ़ी खोल्‍ल कि एस लेइहोए।" तैखन कुन हेरते, कि एलीशारे च़ेवरे पासन पहाड़ अग्गरे घोड़न ते रथ्थन सेइं भेरतांए। 18 ज़ैखन अरामी सिपाही हमलो केरनेरे लेई नेड़े आए, तैखन एलीशा यहोवा कां प्राथना की, कि इस टोली काने केर। एलीशारे ज़ोनेरे मुताबिक तैनी तैना काने किये। 19 तैखन एलीशा तैन सेइं ज़ोवं, "ई त बत नईं, ते न ई नगरे, मीं पत्ती एज्जा; अवं तुसन तैस मैन्हु कां पुज़ेइलो ज़ैस तुस तोप्पने लगोरेथ।" तैखन तैनी तैना सामरिया नगरे मां पुज़ाए।

20 ज़ैखन तैना सामरिया नगरे मां पुज़्ज़े, तैखन एलीशा प्राथना की, "हे यहोवा, इन लोकां केरि एछ़्छ़ी खोल्‍ल कि एन लेइहोए।" तैखन यहोवाए तैन केरि एछ़्छ़ी खोल्‍ली, ते ज़ैखन तैना लहंने लगे तैखन कुन हेरतन कि तैना सामरिया नगरेरे मझ़ाटे मां आन। 21 तैन हेरतां इस्राएलेरे राज़े एलीशा पुछ़ू, "हे मेरे मालिक, कुन अवं एन मैरी? अवं तैन मैरी?" 22 तैनी जुवाब दित्तो, "नईं। कुन तू तैन मारतस, ज़ैन तू तलवारी ते धनुषे सेइं कैदी बनातस? तैन खाने पानी जो दे, कि खेइ पीतां अपने राज़े कांजो च़ले गान।" 23 तैखन तैनी तैन केरे लेई धाम दित्ती, ते ज़ैखन तैनेईं खाव पियूं, तैखन तैनी तैना भेज़े, ते तैना अपने राज़े कांजो च़ले जे। इसेरां बाद अरामेरे सिपाही इस्राएलेरे मुल्खे मां फिरी कधे न आए।

24 किछ दिहाड़ना बाद अरामेरे राज़े बेन्हददे अपनि सारी सेना अकोट्ठी की, ते सामरिया नगरे पुड़ हमलो केरतां तैन घेरी छ़डू। 25 इस वजाई सेइं तैस वक्त सामरिया नगरे मां बड़ो काल पेव ते तैन एरू घिरोरू राव, कि आखर एक्‍की गधेरी क्रोड़ी चैंदरे एश्शी सिकन मां ते अध्धो लीटर कबूतरेरू ट्लिक पंच़ टुक्ड़े चैंदरे सिक्‍कन मां बिकने लगू। 26 एक्सां इस्राएलेरो राज़ो शहरपनाही पुड़ सहर केरने लेवरो थियो, कि एक्‍की कौन्शां हक देइतां तैस सेइं ज़ोवं, "हे मालिक, हे राज़ा बच़ा।" 27 तैनी ज़ोवं, "अगर यहोवा तीं न बच़ाए, त अवं केन्च़रे सेइं तीं बच़ेइ? कुन खलाड़ी मरां, या दाछ़रे रसेरे कुण्डे मरां?" 28 फिरी राज़े तैस पुछ़ू, "तीं कुन भोवं?" तैसां जुवाब दित्तो, "इस कौन्शां मीं सेइं ज़ोवं, ‘मीं अपनु मट्ठू दे, कि असां अज़ तैस खाम, फिरी कालां अवं अपनु मट्ठू देली, ते असां तैस भी खामेली।’" 29 तैखन मेरू मट्ठू बनेइतां असेईं खावं, फिरी होरसां ज़ैखन मीं इस सेइं ज़ोवं "अपनु मट्ठू दे कि असां तैस खाम, तैखन एसां अपनु मट्ठू छ़ुपेइतां रख्खू।" 30 तैस कौन्शरी इना गल्‍लां शुन्तां, राज़े दुख बांदो केरनेरे लेई अपना लिगड़ां छ़िन्दां (तै त शहरपनाही पुड़ सहर केरने लेवरो थियो), ज़ैखन लोकेईं हेरू, तैखन तैनेईं इन लाऊं कि तै अन्तर दुख बांदो केरनेरे लेई अपने जानी पुड़ टाट पलेटतां बिशोरोए। 31 तैखन तै अपने आपे सेइं ज़ोने लगो, "अगर अवं अज़ शापातेरे मट्ठे एलीशारे क्रोड़ी तैसेरे धड़े पुड़ राने देईं, त परमेशर मीं सेइं सखते करां सखत बर्ताव केरे।"

32 एलीशा अपने घरे मां बिशोरो थियो, ते बुज़ुर्ग भी तैस सेइं साथी बिश्शोरे थिये। त ज़ैखन राज़े एप्पु करां अक मैन्हु भेज़ो, त तैखन तैस मैन्हेरां पुज़ने करां पेइले बुज़ुर्गन सेइं ज़ोवं, "हेरा, इस खूनेरे मट्ठे कोई मेरी क्रोड़ी कटनेरे लेई भेज़ोरोए; एल्हेरेलेइ ज़ैखन तैना भेज़ोरे मैन्हु एज्जन, तैखन दारां बंद केरतां रोकतां रेखथ। कुन तैसेरे मालिकेरे पव्वां केरि छ़ेड़ तैसेरे पत्ती न शुनोए?" 33 एलीशा तैन सेइं इना गल्‍लां ज़ोने लगोरे थियो कि भेज़ोरो मैन्हु तैस कां पुज़्ज़ो। ते राज़ो ज़ोने लगो, "ई आफत यहोवारे तरफां एवरीए, हुनी अवं अग्रोवं जो यहोवा किजो बलगतो रेईं?"