यहूदा प्रदेशेरी रानी अतल्याह
1 ज़ैखन अहज्याह राज़ेरी अम्मा अतल्याहां हेरू, कि तैसारू मट्ठू मारू जेवरूए, तैखन राज़ेरां सारां मट्ठां मारां ज़ैना राज़ो बेनि सकतां थियां। 2 पन यहोशेबा ज़ै योराम राज़ेरी कुई, ते अहज्याहेरी बेइन थी, तैसां अहज्याहेरू मट्ठू योआश मारे गानेबाले राज़ेरे मट्ठां केरे मझ़ाटेरां च़ोरतां घैई सने बिछ़ान रखनेरे घरे11:2 बिछ़ान रखनेरे घरे ई भोइ सकते अक कमरो ज़ैड़ी याजक ते तैन केरे टब्बरेरे लेई भोते। मां छ़ुपेइतां छ़डू। ते तैनेईं तैस अतल्याह करां एन्च़रे छ़ुपेइतां रख्खू, कि तैन मारू न जेवं। 3 ते तैन तैस कां यहोवारे भवने मां शा साल छ़पोरू रावं, इस दौरान अतल्याह यहूदा प्रदेशे पुड़ राज़ केरती राई।
4 सत्तोवं साले मां यहोयादा अंगरक्षकां ते पहरेदारां केरे सेनापति कुजाए, ते तैना यहोवारे भवने मां एप्पु कां आने; ते तैन सेइं करार कियो ते यहोवारे घरे मां तैन कसम खुवेइतां, राज़ेरू मट्ठू हिरावं। 5 ते यहोयादा तैन जो हुक्म दित्तो, "अक कम केरा: अक तिहाई सिपाही ज़ैना आरामेरे दिहाड़े मां एजने बाले भोन, तैना राज़ेरे मेहलेरो पेरहो देन। 6 ते अक तिहाई सिपाही सूर नंव्वेरे फाटके मां रुकन, ते अक तिहाई सिपाही पहरेदारां केरे पेत्रीं पासेरे फाटके मां रान; ते मेहलेरी पहरदारी केरतां लोकन रोकतां रेखथ; 7 ते तुश्शे दूई जथे ज़ैना आरामेरे दिहाड़े बेइर गानेबाले भोन तैना यहोवारे भवने मां राज़ेरी पहरदारी केरन। 8 तुस अपने-अपने हथ्थे मां हथियार ट्लेइतां राज़ेरे च़ेवरे पासन रेइयथ, ते ज़ै कोई घेरेरे अन्तरे एजनू चाए तै मारो गाए, ते तुस राज़ेरे एजने गानेरे वक्ते तैस सेइं साथी रेइयथ।"
9 यहोयादा याजकेरे इना सब हुक्मां केरे मुताबिक सेनापेतेईं कियूं। तैना आरामेरे दिहाड़े एजने बाले ते गानेबाले दूईये जथे अपने-अपने सिपाही साथी नेइतां यहोयादा याजक कां जे। 10 तैखन याजके सेनापतिन दाऊद राज़ेरे भाले, ते ढालां ज़ैना यहोवारे भवने मां थी दित्ती। 11 एल्हेरेलेइ तैना पहरदार अपने-अपने हथ्थे मां हथियार ट्लेइतां भवनेरे दक्षिणी कूने करां लेइतां उत्तरी कूने तगर वेदी ते भवनेरे दक्षिणी कूने करां उतरेरे कूने तगर वेदी ते भवने मां, राज़े कां च़ेवरे पासन घेरो देइतां खड़े भोए। 12 तैखन यहोयादा राज़ेरू मट्ठू बेइर एन्हतां तैसेरे क्रोड़ी पुड़ ताज, ते परमेशरेरे कानूनेरी नकल दित्ती; तैखन लोकेईं तैसेरू अभिषेक केरतां तै राज़ो बनाव; फिरी च़ेढ़ी बज़ेई-बज़ेइतां ज़ोने लगे, "राज़ो हमेशा ज़ींतो राए!"
13 ज़ैखन अतल्याह रैनी पहरेदारां ते लोकां केरि हलचल शुनोई, तैखन तै तैन कां यहोवारे भवने मां जेई; 14 ते तैसां कुन हेरू कि राज़ो रीतरे मुताबिक खम्भे कां खड़ोए, ते राज़े कां प्रधान ते नरशिंगे बज़ानेबाले खड़े आन। ते सारे लोक खुशी मनाते नरशिंगे बज़ाने लगोरेन। तैखन अतल्याह दुखेरे मारे अपना लिगड़ां छ़िन्दतां, "ई राजद्रोहे!" ई राजद्रोहे! ज़ोने लगी। 15 तैखन यहोयादा याजके सेनारे अधिकारी सेनापतिन जो हुक्म दित्तो, "एस अपने पहरेदारां केरे मझ़ाटेरां केढतां बेइर नेथ; ते ज़ै कोई तैस पत्ती च़ले तैस तलवारी सेइं मारा।" किजोकि याजके ज़ोवं, "तै यहोवारे भवने मां न मारी गाए।" 16 एल्हेरेलेइ तैनेईं दूईये पासना तैस ठार दित्ती, ते तै तैन केरे मझ़ाटेरां च़ली जेई, ते तैस बत्तां च़ली जेई, ज़ैस बत्तां घोड़े राज़ेरे मेहले जो गाते थिये; ते तैड़ी तै मारी जेई। 17 तैखन यहोयादा याजके यहोवारे, ते राज़े ते लोकां केरे मझ़ाटे यहोवारे लोक भोनेरे लेई अक करार कियो, ते तैनी राज़े ते लोकां केरे दरमियान करार कियो। 18 तैखन सारे लोकेईं गेइतां बाल देबतेरू मन्दर डोलू, ते तैसेरी वेदी ते मूरती रोड़ेच़ारे ट्लोड़ी छ़ेडी; ते मत्तान नंव्वेरे बाल देबतेरो याजक वेदी कां सामने मैरी छ़डो। याजके यहोवारे भवने मां पहरदार रख्खे। 19 तैखन तैना सेनापति ते पहरदारन ते सब लोकन साथी नेइतां राज़ो यहोवारे भवने करां उन्ढो नेव, ते पहरेदारां केरे फाटकां केरि बत्ती मरां राज़ेरे मेहले तगर पुज़व, ते योआश राज़ो तखते पुड़ बिश्शो। 20 तैखन सारे लोक खुशी भोए, ते यरूशलेम नगरे मां शान्ति भोइ। अतल्याह त राज़ेरे मेहले कां तलवारी सेइं मारी जेई।
21 ते ज़ैखन योआश राज़ो बनो तैस वक्ते तैसेरी उमर सत साल थी।