1 एक्सां एलीशा नेबे बाकी नेबी केरि टोली मरां अक मैन्हु कुजेइतां तैस सेइं ज़ोवं, "कमरबन्ध, ते हथ्थे मां ज़ैतूनेरे तेलेरी कुप्पी नेइतां गिलाद प्रदेशेरे रामोत नगरे जो गा।✝ 2 ते तैड़ी पुज़तां येहू जो ज़ैन यहोशापातेरू मट्ठू ते निमशी एरू पोट्लड़ूए तोप; तैखन अन्तर गेइयां, तैस खड़े केरतां तैसेरे ढ्लान करां अलग एक्‍की कमरे मां अलग नेइयां। 3 तैखन तेलेरी ई कुप्पी नेइतां तेल तैसेरे दोग्गे पुड़ एन ज़ोइतां छ़ेडां, ‘यहोवा इन ज़ोते, कि अवं इस्राएलेरो राज़ो भोनेरे लेई तेरू अभिषेक केरताईं।’ तैखन दार खोलतां नेश्शी गेइयां, ते च़िर न लेइयां।"

4 ते तै जुवान नबी गिलाद प्रदेशेरे रामोत नगरे मां जेव। 5 तैड़ी पुज़तां तैने हेरू, कि सेनापति बिशोरेन; तैखन तैनी ज़ोवं, "हे सेनापति, मीं तीं सेइं किछ ज़ोनूए।" येहूए पुछ़ू, "असन सेभन मरां कैस सेइं?" तैनी ज़ोवं, "हे सेनापति, तीं सेइं!" 6 तैखन येहू उठतां नेबी सेइं साथी घरे मां जेव; ते तैनी नेबे एन ज़ोइतां तैसेरे दोग्गे पुड़ तेल छ़डो, "इस्राएलेरो परमेशर यहोवा इन ज़ोते, अवं अपने इस्राएली लोकन पुड़ राज़ो भोनेरे लेई तेरू अभिषेक केरताईं। 7 त तू अपने मालिक अहाबेरे घराने मैरां, ज़ैस सेइं मीं अपने दास नेबी केरे बल्के अपने सारे दासां केरो खून ज़ै अहाबेरी कौन्श ईजेबेलां बगाव, बदलो मैल्हे।✝ 8 किजोकि अहाबेरो सारो घरानो नाश भोइ गालो, ते अवं अहाबेरे खानदानेरे हर एक्‍की मट्ठे ते इस्राएले मरां गुलाम, कुन आज़ाद, हर एक्‍की नाश केरेलो। 9 ते अवं अहाबेरो घरानो हाल नबातेरे मट्ठे यारोबामेरो ज़ेरो, ते अहिय्याहेरे मट्ठेरो हाल बाशारो ज़ेरो केरेलो। 10 ते ईजेबेलरी लाश दबने बालो कोई न भोल्हो, ते यिज्रेलेरी ज़मीनी मां कुतरां खालां।" इन ज़ोइतां तै नबी दार खोलतां नेश्शी जेव।

11 तैखन येहू कमरे मरां बेइर अव ते अपने मालिकेरे अधिकैरन कां अव, ते एक्‍के तैस पुछ़ू, "कुन ठीके, तै पागल तीं कां किजो एवरो थियो?" तैनी तैन सेइं ज़ोवं, "तुसन पतोए कि तै कौने ते तैस सेइं कुन गलबात भोइ।" 12 तैनेईं ज़ोवं, "तू झूठ ज़ोने लगोरोस, असन सेइं सच़ ज़ो।" तैनी ज़ोवं, "तैनी मीं सेइं ज़ोवरू त बड़ू तगरे, पन मतलब ई आहे ‘यहोवा इन ज़ोते कि अवं इस्राएलेरो राज़ो भोनेरे लेई तेरू अभिषेक केरताईं।’" 13 तैखन तैनेईं लूशी अपने-अपने चोगे खोलतां तैस हैठ पेवड़ी पुड़ बिछ़ाए, ते नरशिंगो बज़ेइतां ज़ोने लगे, "येहू इश्शो राज़ोए।"✝ 14 ई येहू ज़ेसेरे दादेरू नवं निमशी ते तैसेरे बाजी केरू नवं यहोशापात थियूं, तैनी योराम राज़े सेइं राज़ेरी-मुखालफ केरनेरी साज़िश की। (योराम त सारे इस्राएले सने अरामेरे राज़े हजाएलेरे वजाई सेइं गिलादेरे रामोतेरी हिफाज़त केरतो थियो; 15 पन योराम राज़ो एप्पु अपने ज़खमां केरे ज़ैना अरामेरे राज़े हजाएले सेइं जंग केरने मौके तैस अरामी सेना करां लगोरे थिये, तैन केरो आलाज़ करानेरे लेई यिज्रेल नगरे जो वापस जेवरो थियो।) तैखन येहूए ज़ोवं "अगर तुश्शो एरहो मन भोए, त एस नगरे मरां कोई निस्तां यिज्रेल नगरे मां शुनाने जो न गेइ बटे।" 16 तैखन येहू रथे पुड़ां च़ेढ़तां, यिज्रेल नगरे जो च़लो ज़ैड़ी योराम ज़खमी भोइतां रेई जेवरो थियो; ते यहूदा प्रदेशेरो राज़ो अहज्याह योरामे हेरने जो तैड़ी एवरो थियो।

17 यिज्रेल नगरेरे गुम्मटे पुड़, ज़ै पहरदार खड़ो थियो, तैनी येहूए सेइं साथी एइते सेना हेरतां ज़ोवं, "मीं अक सेना लेइहोतीए;" योरामे ज़ोवं, "अक घोड़ सुवार सिपाही कुजेइतां तैन लोकन सेइं मिलने जो भेज़ ते तै तैन पुछ़े, ‘कुन सब ठीके?’" 18 तैखन अक सुवार तैस सेइं मिलने जो जेव, ते तैस सेइं ज़ोवं, "राज़े पुछ़ोरू, ‘कुन सब ठीके?’" येहूए जुवाब दित्तो, "सब ठीके इस सेइं तेरू कुन कम्मे? मीं पत्ती च़ल।" तैखन पहरदारे ज़ोवं, "तै भेज़ोरो मैन्हु तैन कां पुज़ोरो त थियो, पन वापस नईं एवरो।" 19 तैखन योराम राज़े होरो घोड़ सुवार सिपाही भेज़ो, ते तैनी तैन कां पुज़तां ज़ोवं, "राज़े पुछ़ोरूए, ‘कुन सब ठीके?’" येहूए ज़ोवं, "सब ठीके इस सेइं तेरू कुन कम्मे? मीं पत्ती च़ल।" 20 तैखन पहरदारे ज़ोवं, "तै भी तैन कां पुज़ोरो त थियो, पन वापस नईं एवरो। तैसेरू रथ च़लानू निमशीएरे पोट्लड़े येहूएरो ज़ेरू आहे; तै त पागलां केरो ज़ेरो दौड़ाते।"

21 योराम राज़े ज़ोवं, "मेरू रथ तियार केरा।" ज़ैखन तैसेरू रथ तियार कियूं, तैखन इस्राएलेरो राज़ो योराम ते यहूदारो राज़ो अहज्याह, दूईये अपने-अपने रथ्थन पुड़ च़ेढ़तां निस्सी जे, ते येहू सेइं मिलने जो बेइर गेइतां यिज्रेल नाबोतेरी ज़मीनी मां तैस सेइं मुलाकात की। 22 येहू हेरते योरामे पुछ़ू, "हे येहू कुन सब ठीके," येहूए जुवाब दित्तो, "ज़ांतगर तेरी अम्मा ईजेबेल मूरती पूज़ा केरती ते जैदू टूनो केरती राए, तैखन तगर सुख कोड़ि आहे?"✝ 23 तैखन योरामे घोड़ां केरि लगाम मोड़ी, ते अहज्याहे सेइं एन ज़ोइतां नश्शो, "हे अहज्याह धोखो आहे, लूशी नश।" 24 तैखन येहूए धनुष कन्ने तगर खिचतां योरामेरे कंधां केरे मझ़ाटे एरहो तीर मारो, कि तै तैसेरो दिल कोश्तां निस्सी जेव, ते तै अपने रथे मां लिकतां बिछ़ड़ी जेव। 25 तैखन येहूए अपने एक्‍की अधिकैरी सेइं ज़ोवं, ज़ेसेरू नवं बिदकर थियूं "तैस छ़ुइतां यिज्रेली नाबोतेरी ज़मीनी मां शार; याद त केर, कि ज़ैखन अवं ते तू, अस दूईये अकोट्ठे साथी सुवार भोइतां तैसेरे बाजी अहाबे पत्ती-पत्ती च़ेलि राहोरे थिये तैखन यहोवा तैस करां ई भारी वचन ज़ुवेवरो थियो, 26 ‘यहोवारू इन ज़ोनू आहे, कि नाबोत ते तैसेरां मट्ठां केरो ज़ै कत्ल भोव, तै मीं लाहोरोए, ते यहोवा इन ज़ोते, कि अवं तैस ज़मीनी मां तीं बदलो देइलो।’ त हुनी यहोवारे तैस वचनेरे मुताबिक एन्ने छ़ुइतां तैस ज़मीनी मां शार।" 27 एन हेरतां यहूदारो राज़ो अहज्याह बागरे मेहलेरे बत्तां नेश्शी जेव। ते येहूए तैसेरो पीछो केरतां ज़ोवं, "तैस भी रथे पुड़ मारा;" त तै भी यिबलाम नगरेरे गूर नंव्वेरी चड़ैई पुड़ मारो जेव, ते मगिद्दो नगरे तगर नेशतां मेरि जेव। 28 तैखन अहज्याहेरे अधिकैरेईं तैसेरी लाश रथे पुड़ यरूशलेम नगरे मां पुज़ेइतां दाऊदपुरे मां ज़ैड़ी तैसेरे पूर्वज दबोरे थिये तै भी तैड़ी दब्बो।

29 अहज्याह त अहाबेरे मट्ठे योरामेरे हुकूमतरे यारोवं साले मां यहूदा प्रदेशे पुड़ राज़ केरने लगोरो थियो। 30 ज़ैखन येहू यिज्रेल नगरे जो अव, तैखन ईजेबेल एन शुन्तां एपनी एछ़्छ़न मां सुरमो लाव, अपने दोग्गेरे बाल बनेइतां, दैरी मरां लिकतां तकने लगी। 31 ज़ैखन येहू नगरेरे फाटके मरां भोइतां एवरो थियो। तैखन तैनी ज़ोवं, "हे अपने मालिके मारनेबाले जिम्री, कुन सब ठीके?" 32 तैखन तैनी दैरारे पासे तुत्तर फेरतां पुछ़ू, "मेरे पासे कौने? कौन?" तैखन दूई ट्लाई खोजेईं तैसेरे पासे तक्‍कू। 33 तैखन तैनी ज़ोवं, "तैस बुन जो बिछ़ोड़।" एल्हेरेलेइ तैनेईं तै उन्ढी बिछ़ोड़ी ते तैसारे खूनेरी किछ छ़िड़की दिवारी पुड़ ते किछ घोड़न पुड़ पेई, ते घोड़ेईं तै पव्वन हैठ ढ्लन्च़ी। 34 तैखन येहू मेहले मां अन्तर गेइतां खाने-पीने लगो; ते किछ सेवकन सेइं ज़ोने लगो, "गाथ तैस लानती कौन्शी हेरा, ते तैस दब्बा; किजोकि तै त राज़ेरी कुइये।" 35 ज़ैखन लोक तैस दबने लगे, तैखन तैसारी खोपड़ी ते पव ते हथ्थां केरि तेई केरे अलावा तैसेरू किछ न मैल्हू। 36 एल्हेरेलेइ तैनेईं वापस एइतां येहू सेइं ज़ोवं; तैखन तैनी ज़ोवं, "इन यहोवारू तैन वचने, ज़ैन तैनी अपने दास तिशबे नगरेरे एलिय्याहेरे ज़िरिये ज़ोवरो थियूं, कि ईजेबेलरू मास यिज्रेल नगरे मां कुतरां खालां।✝ 37 ते ईजेबेलरी लाश यिज्रेल नगरे मां खादरी ज़ेरि पेवरी राहेली, इड़ी तगर कि कोई न ज़ोलो, ‘ई ईजेबेले।’"