2 राज़े 7

1 तैखन एलीशा नेबे ज़ोवं, "यहोवारू वचन शुना, यहोवा इन ज़ोते, ‘कालां इस्से मौके सामरिया नगरेरे फाटके पुड़ ट्लाई किल्‍लो अट्टू चैंदरे एक्‍की सिक्‍के मां ते शा किल्‍लो जौ भी चैंदरे एक्‍की सिक्‍के मां बिकेले।’"*7:1 पुराने नियमेरे वक्ते मां, फाटक बज़ार भोतू थियूं ते फाटके मां भी पंचायत भोती थी ज़ैड़ी मुकादमे शुने गाते थिये। इड़ी बज़ारेरे बारे मां लिखेरूए। 2 तैखन तैनी सेनापति ज़ैस पुड़ राज़ो भरोसो केरतो थियो, परमेशरेरे नेबी जो जुवाब देइतां ज़ोवं, "शुन, चाहे यहोवा अम्बरेरी दैरी खोल्‍ले, फिरी भी कुन एरी गल भोइ बटेली?" तैनी ज़ोवं, "शुन, तू इन अपने एछ़्छ़न सेइं त हेरेलो, पन तैस अन्ने मरां किछ खेइ न बटेलो।" 3 तैस वक्त च़ेवर कोढ़ी तैस नगरेरे फाटके करां बेइर थिये; तैना एप्पु मांमेइं ज़ोने लगे, "अस किजो इड़ी बिश्शोरे-बिश्शोरे मेरि गाम? 4 अगर अस ज़ोम, ‘नगरे मां गाम,’ त तैड़ी मेरि गामेले; किजोकि तैड़ी काल पेवरोए, ते अगर अस इड़ी बिश्शोरे रहम, त फिरी भी मेरि गामेले। त एज्जा अस अरामेरी सेनाई मां ट्लेइयोम; अगर तैना असन ज़ींते छ़डेले त असां ज़ींते रामेले, ते अगर तैना असन मारन, त असेईं मरनू त आहे।" 5 ज़ैखन आंधरू भोने लगू तैखन तैना अरामेरे डेरन मांजो च़ले, ते अरामेरे डेरां केरे कूने तगर पुज़तां कुन हेरतन, कि तैड़ी कोई नईं। 6 किजोकि यहोवाए अरामेरी सेनारां रथां ते घोड़ां केरि बड़े सेनारी छ़ेड़ शुनेवरी थी, ते तैना एप्पु मांमेइं ज़ोने लगोरे थिये, "शुना, इस्राएलेरे राज़े हित्ती ते मिस्री राज़े उजरती पुड़ कुजेवरेन कि असन पुड़ हमलो केरन।" 7 एल्हेरेलेइ तैना ड्लवझ़ां उठतां एन्च़रे नश्शे, कि अपने डेरे, घोड़े, गधे, ते डेरे ज़ेरे थिये तेरहे छ़ेडतां अपनि-अपनि जान बच़ानेरे लेई नश्शे। 8 ज़ैखन तैना कोढ़ी डेरां केरे कूने कां पुज़्ज़े, तैखन एक्‍की डेरे मां अन्तर गेइतां खावं पीवं, ते तैस मरां चाँदी, सोन्नू ते लिगड़ां नेइतां छ़ुपेइतां रख्खां; फिरी वापस एइतां होरी डेरे मां जे ते तैस मरां भी नेइतां छ़ुपेइतां रख्खां।

9 तैखन तैना एप्पु मांमेइं ज़ोने लगे, "ज़ैन अस केरने लगोरेम तैन रोड़ू कम नईं, ई खुशरे खबरारी दिहाड़ीए, पन अस कोन्ची सेइं नईं ज़ोने लगोरे। अगर अस लौ भोने तगर रुकोरे राए त असन सज़ाह मैल्हनी; एल्हेरेलेइ हुनी एज्जा अस राज़ेरे अधिकैरन कां गेइतां ई गल ज़ोम।"

10 तैखन तैना च़ले जे ते नगरेरे दिवारारे पहरदारन जो कुजेइतां ज़ोवं, "अस अरामेरे डेरन मां जेवरे थिये, असेईं हेरू कि तैड़ी कोई नईं, ते मैन्हु केरि किछ छ़ेड़ नईं, सिर्फ बन्धोरे घोड़े ते गधे आन, ते डेरे ज़ेरे थिये तेरहे आन।" 11 तैखन बाकी पहरदारेईं हक देइतां राज़ेरे मेहले मां खबर दित्ती। 12 इस्राएलेरो राज़ो राती उठ्ठो, ते अपने अधिकैरन सेइं ज़ोवं, "अवं तुसन सेइं ज़ोताईं कि अरामी लोकेईं असन सेइं कुन कियोरूए? तैना ज़ानतन, कि अस लोक नियन्ने अहम एस वजाई सेइं तैना डेरन मरां मैइदाने मां छ़पने जो एन ज़ोइतां जेवरेन, कि ज़ैखन तैना नगरे मरां निस्सन, तैखन अस तैन ज़ींते ट्लेइतां नगरे मां गाम।" 13 पन राज़ेरे एक्‍की अधिकैरे जुवाब देइतां ज़ोवं, "ज़ैना घोड़े नगरे मां बच़ोरेन तैन मरां लोक पंच़ घोड़े नेन, ते तैना भेज़तां अस हाल ज़ानम। तैना त इस्राएली केरि सैरी भीड़ारे सामनेन ज़ै नगरे मां रेइ जेवरीए बल्के ज़ै इस्राएलेरी भीड़ मिटी जेवरीए तैना तैसेरे सामनेन।" 14 एल्हेरेलेइ तैनेईं दूई रथ ते तैन केरे घोड़े ने, ते राज़े तैना अरामेरी सेनाई पत्ती भेज़े कि, "गेइतां हेरा।" 15 तैखन तैना यरदन दरियाए तगर तैन पत्ती च़ेलि जे, ते कुन हेरतन, कि पूरी बत लिगड़न ते भांडन सेइं भेरतां पेवरीए, ज़ैना अरामी सेना लूशी मां शारोरां थियां; तैखन भेज़ोरे मैन्हु वापस आए, ते राज़े सेइं इन सब ज़ोवं।

16 तैखन सामरिया नगरेरे लोकेईं निस्तां अरामेरे डेरे लुट्टे; ते यहोवारे वचनेरे मुताबिक ट्लाई किल्‍लो अट्टू चैंदरे एक्‍की सिक्‍के मां, ते शा किल्‍लो जौ भी चैंदरे एक्‍की सिक्‍के मां बिकने लगे। 17 हुनी राज़े तैस सेनापति जो ज़ैस पुड़ तै भरोसो रखतो थियो फाटकेरो अधिकारी रख्खो; तैखन तै फाटके मां लोकां केरे पव्वन हैठ ढ्लेन्च़ोइतां मेरि जेव। इन परमेशरेरे नेबेरे तैस वचनेरे मुताबिक भोवं ज़ैन तैनी राज़े सेइं तैस कां एजनेरे वक्ते ज़ोवरू थियूं। 18 परमेशरेरे नेबे ज़ेन्च़रे राज़े सेइं ज़ोवरू थियूं, "कालां इस्से मौके सामरिया नगरेरे फाटके पुड़ शा किल्‍लो जौ चैंदरे एक्‍की सिक्‍के मां, ते ट्लाई किल्‍लो अट्टू चैंदरे एक्‍की सिक्‍के मां बिकेलू," फिरी तेरहु भोवं। 19 ते तैनी अधिकैरे परमेशरे नेबी जो जुवाब देइतां ज़ोवरू थियूं, "शुन चाहे यहोवा अम्बरे मां दैरी खोल्‍ले त फिरी भी कुन एरी गल्‍लां भोइ बटेली?" ते तैनी ज़ोवं, "शुन, तू इन अपने एछ़्छ़न सेइं हेरेलो, पन तैस अन्ने मरां खेइ न बटेलो।" 20 ते तैस सेइं ठीक तेन्च़रे भोवं, तै फाटकेरे दारे मां लोकां केरे पव्वन हठ ढ्लेन्च़ोइतां मेरि जेव।