Reino dos céus

Mufanu va umosi veufyamile

44 "Ung’achale va kuluhano uwanine na lusanja veufiamile kumgunda. Munu yumwi akauwene, akafihile kangi. Akakeduka hilo akahele kugucha finu fyonda fye agehe nafyo, akagulile mgunda wula.

Mufanu va lulu

45 "Kangi, ung’achale va kuluhano uwana na mguchaji yumwi yeisaka lulu yimwi nofu. 46 Peapatile lulu yimwi yeigehe na senti ngomi, akahelela kugucha fyonda fyeanafyo na kugula lulu yila.

Mufano va mbeyu yeikemelwa haladali

31 Yesu akavalongie vanu mufano wungi, "Ung’achale va kuluhano uwana na mbeyu yeikemelwa haladali yeahechile munu yumwi, akavyalile mumgunda vake. 32 Mbeyu yene ndi ndodo kuchumba mbeyu chonda, ila peimela daivecha umelo mkomi kuchumba mimelo gyonda na kangi daivecha mkomi ngita libiki na fidege vakwacha na kuchenga mumakwati gyake."

Mufanu va amila

33 Yesu akavalongiye mufano wungi, "Ung’achale va kuluhano uwanine na amila yeanyamuwe maye yumwi, ahanganyise na utine va ngano lidebe chivili na nusu, ata utine wonda ukatupile."

Luwano lwa misapi

24 Yesu akavalongie vanu mufano wungi, "Ung’achale va kuluhano uwana na munu yeavyalile mbeyu chinofu pamgunda vake. 25 Ila vanu pevagonile, muchwindama vake akachile, akavyalile mitendya pagati lya mipunga, akahele. 26 Suwe, mimelo peimelile na kuvanga kuhomola, mitendya nagyo gakavanga kuwoneka. 27 Vachulila va yula mwene mgunda vakamuhelelile, vakamlongiye, ‘Mkomi, seukavyalile mbeyu nofu mumgunda vako. Nondee mitendya gihumila kwiya?’ 28 Mwene akavahigile, ‘Mchwindwama nde yeagitile ago.’ Suwe, vachulila vake vakamuhuchila, ‘Wuli, wisaka twelele tukagakule?’ 29 Nave akavahigile, ‘Hamu, mbihile kugakula mitendya, kwakuva pemuvecha mukula mitendya muvecha kukula na mipunga. 30 Muleke ikule pamwi mbaka chipindi kya mabenelo. Chipindi icho ndikuvalongela vabenaji. Mulundase tandi mitendya na mugawope filundofilundo na kunyanywa. Ila mipunga muilundase mkaivike mulusanja vangu.’"

Yesu ihumulila mifanu gya misapi

36 Baho, Yesu akavalekile vala vanu, akaingile mukaye. Vachulila vake vakamuhelelie vakamlongie, "Utulongele ula mufano va mitendya ga mumgunda." 37 Yesu aka valongiye, "Mvyalaji va chila mbeyu chinofu nde mwana va munu. 38 Ula mgunda nde inyi. Chila mbeyu chinofu ndi vanu vala ambavo ung’achale nde vawo, ila gila mitendya ndi vala vanu va yula muwofu. 39 Mchwindama yeavyalile chila mitendeya ndi Setani. Mabenelo nde mwiso va chipindi na vabenaji nde vandumindumi va kuluhano kwa Nguluvi. 40 Suwe, ngita pemulola pemulundasa mitendya na kunyanywa lyoto, ndeni daivecha mwiso va inyi. 41 Mwana va Munu akuvalagilicha vandumindumi vake na vene davalundasa kuhuma muung’achale vake na vala vonda vevakuvagita vanu vangi vagite sambi na vonda vevagita sambi, 42 na kuvataga mulitanuli lya lyoto na ukoya davivemba na kusiginya mino kwa uwafi mkomi. 43 Ila vala vevagitile gala gegakumkelesa Nguluvi, davang’ala ngita lichuwa muung’achale va Daada vao. Mwene masigicha na apulike!

Mufanu va nyafu lya kulowolela somba

47 "Kangi, Ung’achale va kuluhano kwa Nguluvi uwana na valowa somba vevakumbile wafu vawo muinyanza ukagomiche somba va kila ayina. 48 Peumemile, valowa vakakwegile kumuhanga, vikalile na kulundasa somba vanofu na kuvavika mundilu na vawofu vakatagile. 49 Ndeni, ivecha chipindi cha mwiso cha inyi ndumindumi va kuluhano kwa Nguluvi davikwacha na kuvanenga vanu vanofu na vanu vawofu, 50 na kuvataga avo vawofu mulitanuli lya liwoto. Ukoya vivemba na kusigina mino."

Lukeduko lwa undakyene

3 "Vafunyilwe vala vevikwichela kuva seviwesa kwikala ngajila Nguluvi,

kwakuva Ung’achale va Kuluhano ndi vawo."

4 "Vafunyilwe vevagehe na luswigimo,

kwakuva Nguluvi davanamachwa."

5 "Vafunyilwe vala vafokomasi,

kwakuva davihala inyi."

6 "Vafunyilwe vala vevali na njala na ng’elu lya kugita gyeikela Nguluvi,

kwakuva Nguluvi dakuvagwitisa."

7 "Vafunyilwe vala vevakuvawonela vangi lusungu,

na Nguluvi davawonelwa lusungu."

8 "Vafunyilwe vala vevakumjuma Nguluvi kwa numbula chawo chonda,

kwakuva davamwene Nguluvi."

9 "Vafunyilwe vala vevivika lutengamaso,

kwakuva davakemelwa vana va Nguluvi."

10 "Vafunyilwe vala vevigudwa kwa kugita gala gye ing’ang’a Nguluvi,"

kwakuva Ung’achale va Kuluhano nde vawo.

11 "Mfunyilwe nyenye, vanu pedavakuvaliga na kuvagudisa na kuvalongelela njowo cha udesi kwajili ya nene." 12 Muheke na kunemelela kwakuva fupo lyenu ngomi ivikilwe kuluhano kwa Nguluvi. Kwakuva ndeni peikali kwa vanu vevakali vakuvaguda vavichi va Nguluvi vevakali valonguwe pautalo lyenu.

Nde ani Mkomi?

1 Chipindi chila vachulila vakamuheleliye Yesu, vakamuhucha, "Nde ani mkomi kuchumba vangi muung’achale va kuluhano kwa Nguluvi?" 2 Yesu akamkemela mwana yumwi akamwimicha pagati lyao, 3 akalonga, "Ndakyene ndikuvalongela, ngita semseduka na kuvecha ngita vana, dasemwikwingila ng’odo muung’achale va kuluhano. 4 Yeyonda yeakwikwisa ngita mwana uyu, mwene nde mkomi muung’achale va kuluhano.

14 Yesu akalonga, "Muvaleke avo vana vache kwa nene, mubihile kuvakanicha, kwakuva ung’achale va kuluhano ndi va vanu vevagehe ngita vana ava."

23 Baho, Yesu akavalongile vachulila vake, "Ndakyene ndikuvalongela daivecha ukangafu hilo kwa mmosi kwingila muung’achale va kuluhano. 24 Kangi ndikuvalongela, nde upefu kwa mng’oko yeikemelwa ngamia kuchumba palibwenge lya sasia, kuliko kwa mmosi kwingila muung’achale va Nguluvi."

25 Vala vachulila pevapulike ago vakadudwive hilo vakamuhuchile, "Nde ani nonde dailowoka?"

26 Yesu akavalolile, akalonga, "Kwa munu njowo ichi sechiwesekana, ila kwa Nguluvi njowo chonda chiwesekana."

5 Vakolo vangu, Munipulikiche! Nguluvi avahaguwe vahangala va inyi iyi neke vapatile kuvecha vamosi muludikilo na kuwanuka ung’achale vevajangilwe vala vevakumkela.

Sendikuvachela nyenye

21 "Se kila munu yeakunilongela, Mtwa, Mtwa, Daikwingila muung’achale va kuluhano kwa Nguluvi, ila daingila ndi yula yeigita gyeikela Daada vangu yeagehe kuluhano.

19 Ndeni, munu yeyonda daseidikila ata lulagilicho limwi ndodo kuchumba chonda na kuvawulanicha vangi vabihile kwidikila uyo daivecha mdodo hilo muung’achale va kuluhano kwa Nguluvi. Ila yula daikuchidikila na kuvawulanicha vangi, uyo daivecha mkomi muung’achale va kuluhano kwa Nguluvi. 20 Ndikuvalongela, mwing’ang’wa muidikile malagilicho ga Nguluvi geamgavile Musa kwa unofu kuchumba vala Vawulanichi va malagilicho na Vafalisayo. Ngita dasemgita ndeni, dasemwingila ng’odo muung’achale va kuluhano kwa Nguluvi.

9 Suwe, ndeni nde mwing’ang’wa kumsuka Nguluvi,

Daada vetu yeugehe kuluhano,

litawa lyako linjumwe.

10 Ung’achale vake wache.

Lyeung’ang’a kugita ukoya kuluhano gagitwe na baha muinyi.

Yohani mbatisa akuvadalikila vanu

1 Mufigono ifyo, Yohani Mbatisa akahachile kuno idalika mudasi lya Yudea. 2 Akavalongiye "Muleke sambi chenu mumuwuyile Nguluvi, kwakuva ung’achale va kuluhano ugehe pepi."

17 Kuhuma baho Yesu akavangile kudalika kuno akilonga, "Muhongeche sambi chenu, kwakuva ung’achale va kuluhano ugehe pepi!"

7 Pemuhelela kudalika, mukalonge kuva, ‘Ung’achale va kuluhano kwa Nguluvi ugehe pepi.’

11 Suwe, ndikuvalongela kuva vanu volofu vikwacha kuhuma pelihumila lichuwa na pelidibala lichuwa, navo vakwikala pamwi na Ibulahimu na Isaka na Yakobo muung’achale va kuluhano kwa Nguluvi.

11 Ndakyene ndikuvalongela, mugati lya vanu vonda yevakalile muinyi, kuhela yewonike kuva mkomi kuchumba Yohani mbatisa. Ata ndeni, yula yeakali mdodo hilo muung’achale va kuluhano kwa Nguluvi, ndi mkomi kuchumba Yohani. 12 Kuhuma chipindi cha Yohani mbatisa mbaka neng’uli, ung’achale va kuluhano kwa Nguluvi upatikana kwa kutumila ludali hilo, vanu vene ludali vigecha kunyamula kwa ludali.

28 Ndena, nefwe tuhongeche, kwakuva tuwanuke ung’achale weseuhogoseka. Tuveche na luhongecho na kumgumbanikila kwa kumkelesa na kumpulikicha na kwa kumukogopa, 29 kwakuva Nguluvi vetu ndakyene ndi lyoto mkali weuhanangicha.

10 Suwe, vakolo vangu, mugangamale hilo kuwugita kukemelwa na kuhaguliwe na Nguluvi na pemwigite ndeni semuguwa ha, 11 na kwa kugita ndeni damwikwanukwa unofu na kwingila mu ung’achale va mbepali va Mtwa na Mlowa vetu Yesu Kilisito.

18 Mtwa dakundilowa na njowo chonda cha uwofu, akuninyamula unofu mbaka mu ung’achale vake va kuluhano kwa Nguluvi. Ukomi ugehe na mwene mbepali na mbepali, Ndakyene.

Umosi kuluhano kwa Nguluvi

32 "Mbihile kwogofya, nyenye lipinga lidodo, kwakuva Daada venu va kuluhano ekela kuvagavila Ung’achale.

5 Kwa njowo lya makani aga aveche msasi yoyonda awu muhafu awu mwimi, munu uyo ndi ngita injuma ling’omong’omo. Na munu yoyonda yeagehe ngita uyo seipata kyokyonda muung’achale va Kilisito na va Nguluvi.