1 Pegakachumbile makani aga ndikalolile kuluwano kwa Nguluvi mlyangilo ugehe wachi.

Kangi ndikapulike lichwi ngita pendipulike pamwandi lipembe lya ngalapi ikalonga, "Wache ukang'ale kukyanya, neke ndikuwonese makani dagihumila pambele." 2 Baho baho, ndikalongochwa na Muhe va Nguluvi, pautalo lyangu kukali na kigoda kya ung'achale kuluhano, kyekikali kikalilwe na munu yumwi. 3 Mwene yeakalile eng'anyima ngita langi dung'u gya maganga ga sendi ngomi. Kigoda ikyo kikali kichungutilwe na lupinde lwa ndonya veukali ung'anyime hilo ngita sumalidi. 4 Kangi, kuchungutila ikyo kigoda kya ung'achale pakali na figoda isilini na fitayi na pakyanya pa figoda ifyo vakakalile vavaha isilini na vatayi, vevafwalile myenda mivalafu pee vakiva na ingela lya sambalawo pamituwe gyawo. 5 Kwene kigoda kya ung'achale kukali kuhumila lung'ali na mudilimo gwa ladi. Kuutalo lwa kigoda kya ung'achale, pakali na taa saba chechikwaka. Ichi ndi Muhe saba cha Nguluvi. 6 Kangi, pautalo lya kigoda kya ung'achale kukali na kinu ngita inyanza lya lundala yeing'ala hilo!

Pagatigati pakigoda kya ung'achale na vala vavaha, pakali na fiwumbe fitai figehe na wumi. Vakachungutile lubali chonda cha kigoda kya ung'achale, kuno vagehe na meho kuutalo na kumbele. 7 Ndena kiwumbe kya kwanja akali iwana na simba na kiwumbe va upili akali iwana ngita ngwada, vaudatu akali na wuso va munu na kiwumbe va utai akali iwana na ndapu yeiguluka. 8 Fiwumbe avo fitai vakali na fipapatilo sita kila yumwi na meho kuchungutila muvili vonda, mbaka panyi lya fipapatilo. Pamihe na pamunyi sevalekile kusomola.

"Mnga'alile, Mng'alile, Mng'alile ndi Mtwa Nguluvi munyaludali,

yeakali na yeagahe na yeikwacha."

9 Fiwumbe avo vatai vakali vakumnjuma na kumginya na kuhongecha, yula yeakalile pakigoda kya ung'achale, kangi yeakwika mbepali. Chipindi pevigita ndeni, 10 vala vavaha isilini na vatai viguwa panyi lya yula yeakalile pakigoda kya ung'achale navo vakimgundamila yula yeikala mbepali, kuno vakuchifula ingela chawo na kuchivika pautalo lya kila kigoda kwa ung'achale, vakilonga, 11 "Mtwa na Nguluvi vetu,

wing'ang'wa kujumwa kuginywa na kuvecha na ludali wonda.

Kwakuva veve ndiuwumbile kila kinu,

kwa lukelo lwako fikaumbilwe na kangi fikwendelela kwikala."