1 Baho, ndikawene Mwanang'ondolo imile pakidunda kya Sayuni na vanu laki yimwi na elufu alobaini na chitayi vaimile pamwi. Na vanu avo vakali na litawa lya Mwanang'ondolo na litawa lya Daada vake lisimbilwe pawuso gwao. 2 Suwe, ndikapulike lichwi kuhuma kuluhano, ngita lichwi lya kibulubutu na ngita lichwi lya ladi ngomi. Ndeni, lichwi yendiipulike ndingita lichwi lya vatova ligombo vakitova ligombo lyao, 3 na vakasomola msambo mya pautalo lya kigoda kya ung'achale na pautalo lya vala fiwumbe fitayi wumi na pautalo lya vavaha. Sepakali na munu yoyonda yeawesile kwiwulanicha msambo ugu, ila vala vanu laki imwi na elufu alobaini na chitayi vevakomboliwe kuhuma muinyi. 4 Vanu ava ndi vala vevaihafuwe kwa kugona na vadala. Vene humfwatila Mwanang'ondolo kokonda peihelela. Vakali va kwanja kuhechelwa kwa Nguluvi na Mwanang'ondolo. 5 Sevakalongile vadesi ng'odo, vala sevakali na nongwa lyolyonda.

6 Baho, ndikawene ndumindumi yungi akiguluka palulanga, kuno akolile Njowo Nofu lya Nguluvi cha mbepali. Ayilanduche kwa vanu vekwikala painyi na kwa inyi yonda na makabila gyonda na vanu veviywanga ng'ombelo chonda na kila luga na lukolo chonda. 7 Akalongiye kwa lichwi likomi, "Mumginye Nguluvi na kumnjuma, kwakuva chipindi kya Nguluvi kuhiga vanu vonda kyachile. Mgundamikila Nguluvi yeawumbile luhano na inyi na inyanza na filwitu fya malenga." 8 Ndumindumi va uvili yeamfwatile yula va kwanja akilonga, uguwe! Uguwe gula mwani yeukali mkomi va Babeli, mwani gula ukavagitile vanu va inyi chonda vanyuwe difai lyake. Difai lyake ng'ali lya ugoni vake.

9 Ndumindumi va udatu yeavafwatile vala vavili, akalongiye kwa lichwi likomi, ngita kuna munu yeyonda akumgundamila mng'oko uyo na ling'omong'omo lyake na kuvikwa gumba pakipanji kya wuso vake awu liwoko lyake, 10 mwene dainywa difaia luvipo lwa Nguluvi yeisukulilwe mumnechi lya luvipo lwake ngajila kuhanganiswa na malenga. Munu uyo daigudiswa mugati lya lyoto pautalo lya ndumindumi vang'alile na pautalo lya Mwanang'ondolo. 11 Lyosi lya lyoto veukuvagudisa ukang'ala kukyanya mbepali na mbepali. Vanu avo vevakwimlumba uyo mng'oko uyo na ling'omong'omo lyake awu kwa yeyonda yeavikilwe gumba lya litawa lyake se itulula pamiye na pamunyi.

12 Ndeni, vanu va Nguluvi vevikolela malagilicho gya Nguluvi na kumwidikila Yesu, ving'ang'wa kuhuvilila.

13 Baho, ndikapulike lichwi kuhuma kuluhano ikilonga, "Simbe, vafunyilwe vala vonda kuvangila nondee yevifuwa kuno vamwidikiye Mtwa!"

Muhe va Nguluvi ilonga "Ndakyene! Davatulula kuhuma mukasi chawo ng'angafu, kwakuva magito gyao gyakuvafwatila."

14 Pendilolile pautalo lyangu pakali na lifunde livalafu, yeakali akalile kukyanya lya lifunde ilyo akawonike, "Ngita Mwana va Munu" yeali na ingela lya sahabu pamutuwe gwake na kikwakwa kyekitema hilo mumawoko gwake. 15 Baho, ndumindumi yumwi akachile kuhuma mu Kaye lya Nguluvi akamukemeliye kwa lichwi likomi yula yeakalile kukyanya lya lila lifunde akalonga, "Nyamule kikwakwa kyako ukabene kwakuva chipindi cha mabenelo kifikile, kwakuva mabenelo gya inyi gakangiye." 16 Suwe, yula yeakali ikalile kukyanya lya mafunde, akahengile mabenelo gyonda gyegakangie muinyi na mabenelo gyake muinyi gakabenilwe.

17 Baho, ndumindumi yungi kuhuma Mukaye lya Nguluvi ukoya kuluhano, nave akali akolile kikwakwa kyekifyulilwe hilo.

18 Baho, ndikamwene ndumindumi yungi, yeakali na umwimike gya lyoto, akahumile masabawu, nave akamkeliye kwa lichwi ngomi yula ndumindumi yeakali na kikwakwa kyekifyulilwe hilo mumuwoko na akamlongiye, "Nave tumile kikwakwa kyako ukahengile kisanya fya misabibu gya inyi, kwakuva sabibu chake chikangiye." 19 Ndeni, yula Ndumindumi akadumula kisanya kwa kikwakwa kyake na kulundasa pamwi na kunokola sabibo gya inyi na kuvika pono pa kukamila difwayi. Pono baho pa kukamila difai nde luvipo lwa Nguluvi kwa vanu vevigita sambi. 20 Sabibu chikakamilwe pono pa kukamila difai ndi kwivala lya mwani mkomi. Chikahumiche danda, na danda icho chikasukike na kuvecha mgoka mkomi. Ukomi vake ukali kilomita mia chidatu na utali vake kuhelela panyi ukali na futi chihanu.