1 Baho, ndikawene luhano miya na inyi miya, kwakuva luhano ila lya pamwandi na inyi ila lya pamwandi chikali chichumbile suwe, vala sepakali na inyanza kangi. 2 Ndikawene mwani va Nguluvi yumwene, veukemelwa Yelusalemu miya, wikwika kuhuma kuluhano kwa Nguluvi, ukiva ugelanichwe ngita mdala va lihungu afwaliswe unofu kwakuva lya mgosi vake. 3 Baho, ndikapulike lichwi likomi kuhuma pakila kigoda kya ung'achale ikilonga, "Pulikiche! Nondee Nguluvi daakwikala pamwi na vanu. Akwikala mugati lyao, navo davivecha vanu vake na mwene daivecha Nguluvi vao. 4 Mweni daifyangula kila lihochi lyelihuma mumeho gyawo, vala kufuwa sekuvecha kangi vala makivilicho vala kutamika kwakuva makani gya daha gakali gachumbile."

5 Yula yeakalile kukyanya lya kigoda kya ung'achale akalongile, "Lole, ndigita makani gyonda kuva miya!" Baho akalongile, "Simbe aga, kwakuva malichwi aga nde gya na undakyene na ging'ang'wa kwidikila." 6 Akandilongiye, "Ivechile suwe. Nene ndi Mwanso na Mwiso. Yeiwona ng'elu ndikumgavila kyakunyuwa kuhuma mukilwitu kya malenga gya wumi ngajila kuhomba kinu. 7 Yoyonda yedaakumuwesa Setani, daiwanuka aga, nene dandiveche Nguluvi vake, kangi daivecha mwanavangu. 8 Ila vanu vawogofi na sevadikila na vahafu na vadocha na vasasi na vahavi na vefunya ling'omong'omo pamwi na vadesi vonda, pono lyawo mulihiva lyelikwaka lyoto veseuchima na vakikwatilo. Iyi ndi kufuwa kwa uvili."

9 Yumwi va vala ndumindumi saba vevakali na fimbunde saba gya ago matowo saba gya mwiso achile na kundilongela, "Wache, dandikuwonese mtwa va lihungu, mwene ndi mdala va Mwanang'ondolo." 10 Akanitolile kwa Muhe mbaka pakidunda kikomi na kitali, akiniwonesa wula mwani mkomi Yelusalemu wikwika kuhuma kuluhano kwa Nguluvi, 11 ukali wing'ala kwa ukomi va Nguluvi, lulangala vake ngita liganga lya madini gyegikemelwa yasipi liganga ling'alile ngita inyanza lya lundala. 12 Kukali na lukanji lukomi na mtali weugehe na milyangilo mikomi kyumi na givili, pakali na ndumindumi kyumi na vavili pa milyangilo igyo. Pamilyangilo igyo pasimbilwe matawa gya makabila kyumi na gavili gya Isiliaeli. 13 Kukali na milyangilo mikomi gidatu lubali lwa kuhumila lichuwa na milyangilo mikomi gidatu kulidibala lichuwa na milyangilo mikomi gidatu kukyanya na milyangilo mikomi gidatu lubali lwa kwivindi. 14 Lukanji va mwani ugo ukachengilwe kitamiko kya maganga kyumi na fiwili na pakyanya lya fitamiko ifyo gasimbilwe matawa gya vala vachulila kyumi na vavili va Mwanang'ondolo. 15 Ndumindumi yealongile pamwi na nene akali na ndegeyi lya kigelo kya kugelela mwani ugo na kugelela milyangilo gyake mikomi na kugelela lukanji chake. 16 Suwe, mwani ugo ukingika na utali vake uhwana. Akaugelanicha mwani ugu kwa ndegei akawene kuva ukali na kilomita elufu chivili na miya chitai, ukingika na utali vake va kuhelela kukyanya ukali wihwana. 17 Ndumindumi akagela lukanji lwake udutu ukali mita sitini, kwa kigelo kya meho gya munu ndi kikila kya ndumindumi va kuluhano. 18 Lukanji vake ukachengilwe kwa maganga madung'u gyegikemelwa yesipi kangi mwani gwene ukachengilwe kwa chumangandu nofu weung'ala ngita lulandala. 19 Kitamiko kyake lukanji va mwani ugu ukalembichwe kwa kila ayina lya madini. Kitamiko kya kwanja ukali liganga lidung'u lya yespi na kitamiko kya uvili liganga lya safilo na liganga lya udatu lya kalekedoni na lya utai liganga lya sumalidi, 20 na lya uhano liganga lya saludoniki na lya saba liganga lya kilisolitu na lya nane belulo na lya tisa liganga lya topasi na lya kyumi na limwi liganga lya yasitu na lyakyumi na givili liganga lya amesisito. 21 Gila milyangilo mikomi kyumi na givili gikali gya lulu kyumi na givili, kila mulyangilo mkomi gumwi ugelanishwe kwa lulu yimwi. Ng'asi lya mwani ugo chikali cha sahabu nofu yeing'ala ngita lulandala. 22 Sendiwene Kaye lya Nguluvi mugati lya mwani ugo kwakuva Mtwa Nguluvi Mkombola na Mwanang'ondolo ndi Kaye lya Nguluvi mumwani ugo. 23 Mwani ugo sewikela lichuva vala mwechi kulangacha, kwakuva ukomi va Nguluvi ndi welu gwake na Mwanang'ondolo. 24 Vanu va Inyi chonda davilangachilwa welu vake na vang'achale va inyi dafileta umosi vawo mugati lyawo mugati lya mwani ugo. 25 Milyangilo mikomi gya mwani ugo segididwa ng'odo, kwakuva dakwihela pamiye. 26 Vanu kuhuma inyi chonda davileta umosi vawo na finu fyawo fya sendi ngomi mumwani ugo. 27 Ila kinu kihafu sekikwingila mu mwani ugo, vala munu yeigita makani gya soni awu gakuchanga. Ila davikwingila umo nde vala hela matava gyawo gasimbilwe mukiganulo kya wumi kya Mwanang'ondolo.