1 Ugu nde ugubutulo va Yesu Kilisito, agavilwe na Nguluvi neke avawonese vanyigendwa vake makani gyeging'ang'wa kuhumila pepi. Baho, Yesu Kilisito akamlagiliche ndumindumi vake va kuluhano kwa Yohani neke amgubutulie makani ago. 2 Mwene Yohani akalongie makani gyonda gyealolile, makani ago ndi kutigila undakyene veugubutuliwe na Yesu Kilisito, ugo nde Luchowo lwa Nguluvi. 3 Afunyilwe yula munu yeikwimba kiganulo iki na afunyilwe vala vevapulike njowo ichi cha uvichi ugu na kugakolela gyegasimbilwe mukiganulo iki, kwakuva chipindi cha makani aga gagehe pepi kuhumila.

4 Nene Yohani, ndikuvasimbila nyenye mapinga saba ga vanu vevamuidikiye Kilisito gegagehe muinyi lya Asia.

Ndikuvasukila usanzi na lutengamaso kuhuma kwa Nguluvi, yeagehe na yeakali na yeikwacha na kuhuma kwa Muhe saba vevakali pautalo lya kigoda kya ung'achale, 5 na kuhuma kwa Yesu Kilisito, mwene figono fyonda ilonga unanzi va undakyene. Mwene nde va kwanja kuchulubuka na mwene nde mtavala va vang'achale vonda muinyi.

Yesu akutukela na kufuwa kwa mwene atuvikile pekesu kuhuma musambi chetu, 6 akatugitile nefwe kuva ung'achale vake na vatekechi vake vevakumgumbanikila Nguluvi na Daada vake. Yesu Kilisito anjumwe na umwimike uveche kwa mwene mbepali! Ndakyene.

7 Lole! Ikwacha mumafunde vanu vonda davakumlola ata vala vevamhomile mgoha. Na vanu va makabila gyonda muinyi iyi davamkivilicha mwene. Ndakyene daivecha ndeni! Ndakyene.

8 Mtwa Nguluvi munya ludali ilonga, "Nene ndi Alufa na Omega, yani va kwanja na va mwiso, nene yendigehe na yendikali na yeikwacha."

9 Nene Yohani, lukolo venu kwa kwiwunga na Kilisito, yetwihuvulila pamwi na nyenye magudo Muung'achale vake kwakuva lya Yesu. Ndikali ndikasindikwe mukiwopo mukigunguli kyekikemelwa Patimo nongwa lyangu lya kulanducha Njowo cha Nguluvi na kulonga undakyene va Yesu. 10 Mukigono kya kumfunya Mtwa, ndikali ndilongochwa Mumuhe va Nguluvi ndikapulike lichwi ngomi ngita lya ngalapi kumbele lyangu, 11 ikilonga, "Simbe mukiganulo gala gyeukugalola na ukisindike kwa gala mapinga saba gya vanu vevamuidikiye Kilisito, ukoya Efeso na Similina na Peligamo na Tiatila na Salidi na Filadelifia pamwi na Leodekia."

12 Suwe, ndikasedukile neke ndilole ndi ani akali ilonga, ndikawene finu fyefigalanichwe kwa madini ga sahabu saba fya kuvikila taa, 13 pagatigati pafinu fyefigalanichwe na madini ga sahabu akawonile munu ngita Mwana va Adamu akali afwalile lihingila litali na lifunga lya sahabu lwewopilwe pakihafu pake. 14 Fwili chake chikali valafu pee, meho gyake gakang'alile ngita lwenge lwa lyoto. 15 Lwayo chake chikali ngita saba yeinyanyilwe mulitanuli lya lyoto na lichwi lyake ikali ngita mahata. 16 Muliwoko lyake lya ndewo akakolela nondwa saba na mumulomo gwake ukahumile kimage kikomi kyekitema kuno na kuno. Wuso vake ukali ung'ala ngita lichuwa lya pamunyi. 17 Ila pendimuwene, ndikaguwe kumaguli gyake ngita munu yeafuwe. Baho, akavikile liwoko lyake lya ndewo na kundilongela, ubihile kogofya! Nene nde va kwanja na va mwiso. 18 Nene nde wumi, yendikali ndifuwe ila nondee ulole ndiwumi mbepali! Nene ndigehe na umwimike pakyanya pa kufuwa na inyi lya vanu vevafuwe. 19 Suwe, simbe makani geukugalola na makani gyegagehe nondee na makani dagebwituka pambele. 20 Nondee ndisaka kukugalanulia kuva chila nondwa saba cheuchilolile muliwoko lyako lya ndewo na finu fyefigalanichwe kwa madini ga sahabu fya kuvikila taa. Chila nondwa saba ndi ndumindumi va vala mapinga saba gya vanu vevamuidikiye Kilisito, nafyo finu fyefigalanichwe kwa madini ga sahabu fya kuvikila taa saba ndi mapinga saba gya vanu vevamuidikiye Kilisito.