1 Suwe, msimbilie ndumindumi yeihimilila lipinga lya vanu vevamuidikiye Kilisito lya Efeso kuva.

Nene yendikolile nondwa saba muliwoko lyangu lya ndwewo na kugenda pagatigati pa fila finu fefigalanichwe kwa madini ga sahabu fya kuvikila taa. 2 Ndichela magito gyako gyonda, peugita kasi kwa ukangafu na seukafwahile. Ndichela kuva seuwesa kuvahuvilila vanu vawofu na kuvagecha vonda vakwikemela kuva vene vanjagila, kuno hamu na veve uchelie kuva vadesi. 3 Kangi, ndichela ugudile hilo kwakuva lya nene, ila uhuvilile na ata nondee seukafwahile. 4 Ila ndisaka kukulongela nongwa lyako, kuva, nondee seukunikela nene ngita peukali ukunikela pamwandi. 5 Suwe, uwuwike peugitile sambi, useduke na kuleka kugita sambi ukagite magito gala gya pamwandi. Ngita seuhongecha dandikwacha kwa veve na kuhecha finu fyefigalanichwe kwa madini ga sahabu kya kuvikila taa kuhuma pono pekigehe. 6 Ila kugehe na lukani limwi lweugita unofu, ukugalema makani manjanganifu gyevagita Vanikolai, ago ata nene gandikugavipila.

7 Mwene masigicha gya kupulika na apulike gala Muhe va Nguluvi geakuvalongela mapinga gya vanu vevakumuidikila Kilisito!

Muwecha dandikumgita awese kuliya manunu ga libiki veuhecha uwumi. Libiki lulo ugehe kuluhano mumgunda mdodo va Nguluvi.

8 Msimbile ndumindumi yeihimilila lipinga lya vanu vevamuidikie Kilisito lya ukoya Similina kuva.

Ugu ndi unanzi wihuma kwa yula va kwanja na va mwiso, yeakali afue na kuchulubuka na nondee agehe wumi. 9 Ndichela magudo gyako na uhangala vako, ila veve ndi mumosi! Ndichela peuligwa avo vevakwikemela Vayawudi, ila se Vayawudi avo ndi lipinga lya Setani. 10 Ubihile kogofywa magecho gyekukupata. Mpulike! Setani daakuvavika mukiwopo vamonga venu neke kuvagecha udikilo venu, nyenye damwipata utatala kwa figono kyumi. Muendelele kuvecha vadikilwa, nene dandikuvagavila ingela lya uwumi. 11 Mwene masigicha na apulike gala gyeilonga Muhe va Nguluvi akuyalongela lipinga lya vanu vevamuidikiye Kilisito.

Yeyonda yedaiwesa seihigwa ng'odo na kufuwa kwa awamu lya uvili.

12 Msimbiliye, ndumindumi yeihimilila lipinga lya vanu vevamwidikiye Kilisito la ukoya Peligamo kuva.

Aga nde njowo lya mwene yeali na kimage kikomi kye kitema kuno na kuno. 13 Ndipachela pono peikala, ukwikala pono peitavala Setani ila veve nde mwidikilwa kwa nene. Seukakanile kulonga kuva ukundidikila nene ata chipindi Anitipa mswida yeakali mwidikila vangu, yeakadochilwe mumwani venu mkomi veakwikala Setani. 14 Ila kugehe na makani madodo se manofu pakyanya lyako, kwakuva unavo vanu vevakolile mawulanicho gya Balamu, yula amuwulaniche Balaki kuvalongela Vaisilaeli vagite sambi kwa kuliya finu fyefitambikilwe kwa ling'omong'omo na kugita ugoni. 15 Ndeni ndeni, povali vanu pagati lyenu, yevefuatila mawulanicho gya Vanikolai. 16 Suwe, uhongeche! Ngaseuhongecha dandikwacha kisatu na kwitova na vanu avo kwa kimage kikomi kye kitema kuno na kuno kyekihuma mumulomo gwangu.

17 Yeali na masigicha gyakupilika na apulike gala geilonga Muhe va Nguluvi kwa mapinga gya vanu vevakwimwidikila Kilisito.

Mwene yeishinda dandikumgavila kyakula kyekikemelwa mana kyekifihilwe, nene dandimgavila liganga livalafu, lyelisimbilwe litawa limiya seakulichela munu, ila daakulichela yula munu dayeakuliwanuka.

18 Msimbiliye, ndumindumi yeihimilila lipinga lya vanu vevamwidikiye Kilisito la ukoya Tiatila kuva.

Aga nde malichwi gya Mwana va Nguluvi, mwene meho gyake ndi ngita lwenge lwa lyoto na magulu gyake nde ngita shaba yeikwililwe hilo. 19 Ndikuyachela magito gyako, lukelo gwako na ludikila lwako na kasi na uhuvililo vako na magito gyako nondee galutie hilo kuchumba pamwandi. 20 Ila ndigehe na lukani lumwi selinofu, ukumhuvilila yula mdala Yesebeli akwilonga mwene mvichi, ila akuvawulanicha na kuvachanga vanyigendwa vangu neke vagite ugoni na kuliya kyakuliya kekitambikilwe kwa ling'omong'omo. 21 Ndikamgavile figono fya kuhongecha sambi chake, ila akakanile. 22 Pulikiche! Nondee dandikumgavila matamwa gyakumgudisa gyegyakumgita alemwe kulamka paulili. Na vanu vonda yevigona nave dandikuvagudisa hilo ngita sevahongecha sambi chawo. 23 Kangi, dandikuvadocha vana vonda kwa utamwa mhofu. Baho, mapinga gya vanu vevamwidikiye Kilisito vachele kuva nene ndendilolesa numbula cha vanu na mahocho gyao. Kangi dandikumuhomba kila munu kuhumila na magito gyake.

24 Suwe, ndikuvalongila nyenye vangi mukwikala Tiatila, nyenye semfwatile mawulanicho gya Yesebeli vala semwiwulaniche makani gya mugati hilo gya Setani. Kangi sendikuvahongechela malagilicho gyogyonda kugina chila chemukuchichela. 25 Ila mwendelele kudikila unanzi vangu vemuwanuke suwe. Munidikile nene mbaka pendikwacha. 26 Munu yeyonda daiwesa kugita gala gending'ang'a mbaka mwiso, dandikumgavila umwimike va kutavala vanu va inyi yonda. 27 Daakuvalongocha kwa ludali, daakuvadenya fipande fipande ngita fiviya. 28 Ngita pendiwanuke umwimike kuhuma kwa Daada vangu na nene dandikumgavila yila nondwa lya pamilau.

29 Yeali na masigicha gakupulikila na apulike gala Muhe va Nguluvi akuvalongela gala mapinga ga vanu vevakumuidikila Kilisito!