1 Baho, ndikafiwene fimanyilo fingi fikomi lya filuviluwi palulanga, ndumindumi saba vevakali na matovo ga mwiso. Matovo ago pegisila Nguluvi daseivecha na luvipo kangi.

2 Baho, ndikawene kinu kyekiwonike ngita inyanza lya lulandala yeihanganike na lyoto. Ndikawawene vanu vevamuwesile mng'oko na ling'omong'omo lyake na gumba lya litawa lyake vemile mung'umbung'umbu lya inyanza. Vanu avo vakali vakolile ligombogombo vevagavilwe na Nguluvi. 3 Vene vakali vakisomola msambo va Musa, mnyigendwa va Nguluvi na msambo va Mwanang'ondolo vakisomola,

Mtwa yeugehe na umwimike,

magito gyako nde makomi na filuviluvi!

Veve nde ng'achale va vanu va inyi chonda,

Magito gyako gyeugita na gyeulonga nde gya undakyene!

4 Nde ani daseakukogopa veve Mtwa?

Na kulinjuma litawa lyako,

kwakuva veve weka hela ndi msanzi hilo.

Vanu va inyi yonda davikwacha na kukulumba,

na kukufunya kulutalo lwako

kwakuva magito gyako gyegihela sambi.

5 Baho, pendiwonile ago, ndikalolile kangi ndikawene Kaye lya Nguluvi idinduliwe. Kaye iyoikali ngita kyama lya Nguluvi yeikali akwikala Nguluvi pagatigati lya vanu ukoya kukwelu. 6 Mugati lya yila Kaye lya Nguluvi vakahumile vandumindumi saba vevakali na matovo saba. Vakali vafwalile myenda gyegihonile kwa kitambala kivalafu kyeking'ala na vayiwopile lufunga lya sahabu mukihafu kyawo. 7 Suwe, yumwi va vala fiwumbe wumi vatayi akavagavila vala vandumindumi saba fimbunde saba fya sahabu fyefimemile luvipo lwa Nguluvi, mwene yeakwikala mbepali. 8 Ukomi na ludali lwa Nguluvi ukagitile Kaye lya Nguluvi ikamemile lyosi. Sepakali na munu yeyonda yeawesile kwingila mu Kaye lya Nguluvi mbaka pegisila matowo saba gya vala vandumindumi saba.