1 Baho, akandigavile ludete va kigelo yeukali ngita lubiki, ndikalongilwe, "Helele ukagele Kaye lya Nguluvi pamwi na kindangavala kya maganga, kangi uvavalile vanu vevilumba umo. 2 Ila ubihile kuugela lidamo va kwivala lya Kaye lya Nguluvi, uwuleke kwakuva ugo vigavilwa vanu sevayahudi. Vene vakuukinyakinya mwani mng'alile kwa chipindi cha myechi alobaini na givili. 3 Nene ndikuvagavila vaswida vangu vavili ludali, valonge uvichi kwa chipindi kya figono elufu yimwi na miya chivili na kyumi sita, vakiva vafwalile maloboto."

4 Ava ndi vala vaswida vavili na mibiki givili gya miseituni na kinu kyekigelanichwe kwa sahabu fiwili fya kuvikila taa fyefimile pautalo lya Mtwa Nguluvi va inyi yonda. 5 Ngita munu yeyonda daikela kuvadocha, lyoto kuhuma mumulomo gyawo na kuvadocha vachwindama vawo. Ndena ing'ang'wa kufuwa munu yeyonda yeikela kuvalemacha. 6 Ava vana umwimike va kudinda luhano neke ndonya ibihile kutonya chipindi chonda vene davisaka kulandula uvichi vawo. Ndeni ndeni davaveche na umwimike va kugalambula malenga kuva danda na kuitova inyi kwa kila ayina gya matamwa ngita pevakeliye.

7 Suwe, pevasindile uswida vawo, yula mng'oko daihumila kuhuma mula mulilindi lya muinyi lya vanu vevafuwe selikali na mwisho akwitova nawo fita, pambele akuvadocha. 8 Mifimba gyao gisigala mung'asi lya mwani mkomi, Mtwa vawo akong'oliwe pakipindilihicho. Na litawa lya mwani ugo kwa ng'ombelo lya kiuvichi nde Sodoma na Misili. 9 Vanu va kila kabila na ng'ombelo chonda na inyi chonda na kila lukolo davakuchilola mifimba igyo kwa chipindi kya figono fidatu na nusu na dasevakuvalongela kusila. 10 Vanu vevikwikala munyi davikedukila kwa kufuwa awo vavili. Davigita lihungu na kwigavila fupo kwakuva awo vavichi va Nguluvi vakavagudise hilo vanu vevakwikala muinyi. 11 Ila pevichumbile figono fidatu na nusu, muhe lya uwumi kuhuma kwa Nguluvi ikavaingile, nawo vimile kwa magulu gyawo na vanu vonda vevalolile vingiye na wogofi hilo. 12 Baho, vala vavichi vavili vakapulike lichwi kuhuma kuluhano ikuvalongela, "Mwache kuno kukyanya!" Nawo vakahelela kuluhano mumafunde kuno vachwindama vawo vakivalola. 13 Bahobaho, kukahumila na mhogoseko mkomi va inyi na pono lya kyumi lya mwani ukaguwe. Vanu elufu saba vakadochilwe kuhumila na mhogoseko ugo, vene vevaponile vakaogwipe hilo na kumfunya Nguluvi va kuluhano. 14 Magudo gya uvili gachumbile, lole magudo gya udatu gagehe pepi kwacha.

15 Baho, yula ndumindumi va saba akapembile lila lingalapi lyake, pakahumila na lichwi likomi kuluhano yeilongile, "Ung'achale va inyi chonde nondee uvechile ung'achale va Mtwa vetu Kilisito mwene itavala mbepali na mbepali." 16 Baho, vala vavaha isilini na vatayi, vevakali vakalile pautalo lya Nguluvi, kwene figoda fya ung'achale vakaguwe ufuma na kumlumba Nguluvi, 17 vakilonga,

"Tukumhongecha Mtwa Nguluvi Mkombola,

yeali na yeakali,

uwonise umwike vako mkomi na nondee uvangile kutavala.

18 Vanu sevakwidikiye va inyi yingi vakakuvipile,

kwakuva chipindi kya magudo kyachile.

Chipindi kya kuvahiga vanu vevafuwe.

Ndeni ndeni ndichipindi kya kuvagavila fupo vanyigendwa vako vavichi,

vanu vonda va Nguluvi vevakulinjuma litawa lyako, vakomi kwa vadodo,

Nde chipindi kya kuvahananga vala vevihananga vanu muinyi."

19 Ndena, Kaye lya Nguluvi yeigehe kuluhano ikadinduliwe na lisanduku lya Lyagano lyake liwonike mugati lyake. Kukahumila ming'ali gya lado na midilimo na mhogoseko va inyi na ndonya ngomi lya maganga.