1 Msimbile ndumindumi yeihimilila lipinga lya vanu vevakumuidikila Kilisito lya ukoya Salidi.

Ugu nde unanzi va yula yeali na Muhe saba cha Nguluvi na nondwa saba. Ndichela magito gyenu, muwoneka kuva wumi ila mufuwe! 2 Lamuke! Ugagite gala makani manofu madodo gegasigiye gaveche na ludali, kwakuva ata ago gagehe pepi kufuwa, ndiwene kuva magito gyako segagehe ngita Nguluvi peikela. 3 Suwe, uwiwuke gala geupulike na kuwulanichwa na kudikila, ubate unofu na kuleka sambi chako. Ila ukale kwa kumsuka Nguluvi, ngita sewigita ndeni dandikwacha ngita mhichi peikwacha, vala seuchela saa yendikwacha kwa veve. 4 Ila kugehe na vanu vevakwimwidikila Nguluvi vadodo hela ukoya ku Salidi sevahafule uwumi vawo kwa kugita sambi. Suwe, avo davivecha pamwi na nene kuno vafwalile myenda mivalafu, kwakuva vanu ava ving'ang'wa kugitilwa ndeni. 5 Munu yoyonda daiwesa, daifwaliswa mwenda mvalafu ngita avo. Nene dasenditiligicha litawa lyake mukiganulo kya Uwumi, ila dandikudikila kuva nde vanene pautalo lya Daada vangu na kuutalo lya ndumindumi vake.

6 Mwene masigicha gya kupulika na apulike gala Muhe va Nguluvi, akuvalongela mapinga gya vanu vevakumwidikila Kilisito!

7 Msimbile ndumindumi yeihimilila lipinga lya vanu vevamwidikiye Kilisito ukoya Filadelifia.

Ugu nde unanzi uhumile kwa mng'alile na mndakyene, mwene agehe na udindulo va mng'achale Dawudi, vala kyeadindue kwihela yeiwesa kudinda, vala kyeadindile kwihela yeiwesa kudindula. 8 Ndikugachela magito gyako. Lole, ndidinduwe mulyangilo pautalo lyako, vala kwihela munu yeiwesa kuudinda. Ndichele kuva una ludali ludodo ila ubatile mawulanicho gyangu na kulidikila litawa lyangu. 9 Pulikicha! Ndikuvasindika kwa veve vanu va lipinga lyake Setani, vanu vevakwikemela Vayawudi, undakyene avo ndi vadesi. Dandikuvagita vache kukufugamila na davachela kuva nene ndikukeliye veve. 10 Kwakuva ukalidikile luchowo lwangu lwa uhuvililo, dandikuvadima nyenye chipindi kya utumama kyekikwacha kya kuvagela vanu vonda muinyi chonda. 11 Ndikwacha kwa veve kisatu. Muyakolele unofu ago ganofu gyemnagyo neke munu abihile kuvanyaga fupo lyenu lya usindi. 12 Mwene yeiwesa dandikumgita kuva lisimbili mukaye lya Nguluvi vangu, vala seihuma ng'odo mumo. Ndeni ndeni dandisimba kukyanya lyao litawa lya Nguluvi vangu na litawa lya mwani mkomi va Nguluvi vangu, vene ndi Yelusalemu miya, veukwika kuhuma kuluhano kwa Nguluvi vangu. Kangi dandisimba kukyanya lyao litawa lyangu limiya.

13 Yeyonda yeagehe na masingicha gya kupulika na apulikiche gala gegalongilwe na Muhe va Nguluvi kwa gala mapinga gya vanu vevamwidikiye Kilisito!

14 Msimbiliye ndumindumi yeihimilila lipinga lya vanu vevamwidikiye Kilisito lya ukoya Leodekia kuva.

Ugu ndi unanzi uhumile kwa yula yeikemelwa Ena, muswida yeihela likolakola na mndakyene mwene nde luvangilo va kila finu fyeawumbile Nguluvi. 15 Ndikugachele magito gyako! Ndichela kuva veve sevauchichimu vala sevaupiyo. Ngiba uveche uchichimu awu va upiyo! 16 Ila kwakuva veve ndi lupyopyo, kuva veve semchichimu vala seva lyoto, dandikuvakana na dandikukulokola kuhuma mumlomo vangu. 17 Veve wilonga, nene ndi mmosi, sendipwemwike na kila kinu, ndigehe na vala sendikela kinu kyokyonda. Ila seuchela kuva veve ndimsosovafu, munu va kutangwa na muhangala na ubofwike meho kangi yegehe ufula. 18 Ndikukusuka ugule kwa nene sahabu yeinyanyilwe ku lyoto, neke uveche mmosi. Kangi ufwale mwenda mvalafu, neke ugubike uwumi vako va sambi neke ubihile kulola soni. Gule mgoda gwa kubaka kumeho neke ulole. 19 "Vala ndivakeliye ndikuvalakilila na kuvatova. Suwe, ugangamale na useduke na kuleka sambi. 20 Pulikiche! Ndimile pamlyangilo ndihodisa. Ngita munu yeyonda peapulika lichwi lyangu na kunidindulila mlyangilo, dandikwingila na dandiliya pamwi na mwene. 21 Munu yeyonda daiwesa, dandikumdikila kwikala pamwi na nene pakigoda kyangu kya ung'achale ngita ndeni pendiwesile kukalila pamwi na Daada vangu pa kigoda kyake kya ung'achale.

22 "Yeyonda yeali na masigicha gyakupulika na apulike makani gyealongile na Muhe va Nguluvi kwa lipinga lya vanu vevakumuidikila Kilisito!"