1 Baho, ndikapulike lichwi likomi kuhuma Mukaye lya Nguluvi ukoya kuluhano ikivalongela vala ndumindumi saba va kuluhano kwa Nguluvi, "Muhelele mkasukule muinyi ifi fimbunde saba fya luvipo lwa Nguluvi."

2 Ndumindumi va kwanja achile kusukula kimbunde kya luvipo mukyanya lya inyi. Bahobaho, vanu vonda vevakali na gumba gya yula mng'oko na vevakali vafunyile ling'omong'omo lyake vakapatile mipu gyegivava hilo.

3 Baho, ndumindumi va uvili akasukule kimbunde kyake muinyanza, malenga gyonda gakagalambuke kuva ngita danda lya munu yeafuwe na kila kiwumbe wumi kikwikala muinyanza fikafuwe.

4 Ndumindumi va udatu akasukule kimbunde kyake mumgoka na mufilwitu fya malenga fyonda fikagalambuke danda. 5 Baho, ndikampulike ndumindumi yegehe na umwimike kukyanya lya malenga gonda, akamlongiye Nguluvi, "Veve Nguluvi mng'alile yeugehe na yeukali! Veve uhigile ngita peukeliye. 6 Kwakuva vakavadochile vanu va Nguluvi na vavichi, vavakavagitile vanyigendwa vako va hulule danda kufuwa nondee uvagavile vanu sevanofu danda vanyuwe. Ving'ang'wa kugitilwa ndeni!" 7 Baho, ndikapulike kindangavala kya maganga ikilonga, "Veve Mtwa Nguluvi va umwimike vonda, peuhiga luhigo lwako lwihela luhumwilila ndeni nde ing'ang'wa."

8 Baho, ndumindumi va utayi akasukule kimbunde kyake mulichuva, likagavilwe ludali lya kunyanya vanu kwa lupiyo lyake. 9 Baho, vanu vakanyanyilwe kwa lupiyo lulo, vakaliligile litawa lya Nguluvi, yeakali na umwimike kukyanya lya matovo agyo, kangi vakakanile kumsedukila Nguluvi na kumnjuma Nguluvi.

10 Baho, ndumindumi va uhanu akasukule kimbunde kyake mukigoda kya ung'achale kya yula mng'oko mng'ali. Kisi ikagubike ung'achale vake vonda, vanu vakalumile lulimi chayo kwakuva lya uvavi vevaupatile, 11 vakamligile Nguluvi va kuluhano kwakuva vali na uvavi na mipu yevakali nagyo. Ila sevalekile magito gyawo manjanganifu.

12 Baho, ndumindumi va sita akasukule kimbunde kyake mumgoka mkomi yeukemelwa Filati, malenga gakagamile neke igelanichwe ng'asi lya vang'achale vevihuma kwekuhumila lichuwa. 13 Baho, ndikawene muhe chidatu chihafu cha mahoka vevawane ngita midokwa. Yumwi akahumile mumulomo va liyoka, yungi kuhuma mumulomo va yula mng'oko mng'ali na yungi kuhuma mumulomo va yula mvichi va udesi. 14 Muhe icho, chikali na umwimike va kugita umanyitu. Kasi chawo kuhelela kwa vang'achale vonda muinyi na kuvakung'asa kwakuva lya kutovana fita mukigono kila kikomi kya Nguluvi munya Umwimike.

15 Suwe, Mtwa Yesu akalongile, "Mupulikiche! Ndikwacha ngita mhichi! Afunyilwe yula munu yeikwikala meho na kufwala myenda gyake neke abihile kugenda ufula na kupata nyoni."

16 Baho, muhe icho chikavakung'ese vang'achale pono pepikemelwa kwa Kibulania Halimagedoni.

17 Baho, ndumindumi va saba akasukula kimbunde kyake kululanga na lichwi likomi ikahumila mula mukigoda kya ung'achale, Mukaye lya Nguluvi, ikilonga, "Isilile suwe!" 18 Kukahumila na ming'ali gyongofu gya ladi na midilimo gyongofu na mhogoseko mkomi va inyi. Muhogoseko ugu ukali mkomi kuchumba gyonda kuhuma Nguluvi peawumbile munu muinyi. 19 Baho, mwani mkomi va Babeli ukagavanyikile pono chidatu na myani mikomi gya inyi yingi ikatunywike gyonda. Nguluvi akauwuwike wula mwani mkomi va Babeli, akauswitilicha unyuwe mnechi va difayi lya luvipo lwake. 20 Muhogoseko ula ukagitile figunguli fyonda fikayagile na fidunda fyonda sefikawoneka kangi. 21 Ndoya ngomi lya maganga ikatonyile. Maganga makomi gegakali na usito va kilo hamsini kila limwi, gegaguwe kuhuma kululanga. Vanu vakamligile Nguluvi kwakuva matovo ago ga ndonya ga maganga, kwakuva gakavagitile magudo gyolofu.