1 Baho, ndikawene ndumindumi yungi va kuluhano kwa Nguluvi ekwika kuhuma kuluhano kwa Nguluvi. Akali na umwimike mkomi na inyi ikang'alikwe kwa welu vake. 2 Suwe, akalandula kwa lichwi likomi na akilonga, Uguwe, uguwe gula mwani mkomi va Babeli! Nondee uvechile pono pakwikala setani na mahoka na pono pa kwikala nyambongo mhafu. 3 Kwakuva vanu va inyi chonda vakagalile difayi ng'ali lwa usasi vake na vag'achale va inyi vagonile nave. Na vachulusi va inyi vavechile vamosi kwakuva lya wongofu va finu fya mwani uwo.

4 Baho, ndikapulike lichwi lingi kuhuma kuluhano ikilonga,

vanu vangu muhege mumwani ugo!

Neke mbihile kugita kyokyonda chevigita vanu va mwani ugo,

dasemwiwanuka magudo ambagyo Nguluvi dakuvagavila.

5 Kwakuva sambi chake chilutiye hilo,

chimemile mbaka kuluhano kwa Nguluvi,

na Nguluvi awiwuke kutova mawofu gyako.

6 Mgitile ngita peavagitile nyenye,

mhombe mala chivili kwa gala gyeagagitile.

Mumhanganisile mumnechi vake difai ng'ali,

mala chivili lya difai yeavagavile nyenye.

7 Mumtove na mgavile magudo ngita peakali akwidumba mwene,

na kuhumila kwa kwikala maisa manofu cheajipatiye.

Kwakuva akwilongela munumbula lyake, ndikwikala baha nene nde mdala va ng'achale.

Nene semwigane vala sendivecha na uvafi!

8 Kwakuva matovo gyake gakumpata kigono kimyi,

matamwa na lusugwimo na lumyayi.

Na dainyanywa na lyoto,

kwakuva yeihiga ndi Mtwa Nguluvi mwene ludali.

9 Vang'achale va inyi vevagitile usasi na mwene na kwikala maisa manofu gyake, dapeviwona lyosi lya kupiya kwa mwani ugo, davivemba na kumkivilicha. 10 Vang'achale avo davikwima kutali na kuvemba kwa wogofi kuhumila na magudo gyake. Davivemba na kulonga, "Daulola, daulola! Mwani ula veugehe na ukomi, Babeli ndi mwani weuchelwa hilo na ugehe na ludali! Kwakuva kwa lisaa limwi Nguluvi akuhigile!"

11 Vachulusi va inyi davivemba na kumkivilichila, kwakuva kwihela ata yumwi yeasigalile vakugula finu fyako, 12 kwihela kangi vanu va kugula maganga gya sahabu na maganga gya feza na maganga gya samani ngomi na lulu. Mwenda va weuhonilwe kwa kitambala kivalafu na myenda gya sambalau na halili na myenda midung'u. Ayina chonda gya mibiki gya manung'ililo na finu fya mino gya ndembo na ayina gyonda gya mibiki gya galama hilo na saba nditu na kyuma na malumalu. 13 Ayina chongofu mdalasini na ndimbililo na manung'ililo na udi. Difwayi na mafuta gya miseyituni na utine mnofu na nganu. Senga na ngo'ndolo na falasi na mageleti na vasutu na vanu vangi. 14 Suwe, vachulusi davakumlongela, "Finu fyonda finofu fyeukeliye kuwanuka fihegile. Finu fyonda dafihega na fyeukuidumbila daseukufilola kangi!" 15 Na vachulusi vevapatile umosi kwa mwani uwo, davakwima kutali, kwa wogofi va magudo gyake, davivemba na davikivilicha, 16 Davilonga, "Makani mawofu gakuhumiye! Ula mwani veugehe mkomi. Veukali ufwaliswe mwenda veuhonilwe na kitambala kivalafu hilo na lya langi lya sambalau na idung'u, ikimelemeta kwa sahabu, maganga gya sendi ngomi hilo na maganga gya lulu! 17 Kwa lisaa limwi hela umosi vako vonda uyagile!"

Filongosi vonda va wato mkomi na vanu vonda vevagehe mulugenda kwa wato mkomi. Vasola wato mkomi na vonda vevigita kasi muwato mkomi na vachuusi vevichuusa muinyanza davikwima kutali. 18 Dapevilola lyosi na kupiya kwake ula mwani daviwemba na kulonga, "Kwihela, mwani wungi mkomi ngita ugu!" 19 Vanu avo vakavembile hilo na kukivilicha na kwisukulila lifuna kukyanya gya mituwe gyawo kuno vakilonga, "Mawofu gakupatile! Veve mwani mkomi, mwani vonda ugehe na wato gyolofu muinyanza, vakapatile umosi kuchumbila myato gyako. Kwa lisaa limwi hela uyagiche kila kinu!"

20 Mkeduke nyenye nyemwikukala kuluhano. Mkeduke kwakuva Nguluvi tovile mwani va Babeloni mkeduke vanu va Nguluvi na vachulila na vavichi! Kwakuva Nguluvi auhigile vanu va mwani ugo kwagala mawofu gyemkagitilwe nyenye.

21 Baho, ndumindumi yumwi yeali na ludali, akanyamule liganga likomi lihwana na lwala akalitaga mu inyanza akilonga, "Ndeni nde mwani mkomi Babeli, daitagwa panyi kwa ludali vala daseuwoneka ng'odo. 22 Lusambo lya vatowa ligombogombo na vasomola, vatowa mluli na lichwi lya vatowa ngalapi! Mbepali se lipulikika kangi mugati lyao, mugati lyao seiwoneka kangi mgelanicha yeyonda, vala lichwi lya liganga lwa lwala daseipulika mgati lyako! 23 Welu gwa taa daseuwoneka mugati lyako kangi. Lichwi lya Mtwa va lihungu na mdala lya lihungu daseipulika mugati lyako kangi, vachulusi vako vakali vakomi mu inyi na inyi chonda ikachangilwe na uhavi vako!"

24 "Mwani ugo ukatovilwe kwakuva lya kuvadocha vanu va Nguluvi, kukali na danda lya vavichi na vanu va Nguluvi pamwi na danda lya vanu vonda chikawonike muinyi."