1 Baho, kukawoneka kimanyilo kikomi kya kududuvicha kuluhano. Pakali na mdala yumwi afwalile lichuwa na mwechi akiva panyi lya magulu gyake na ingela lya nondwa kyumi na chivili chikali pamutwe vake. 2 Mdala uyo akali na lusololo akavembile hilo kwa uvafi kwakuva akali pepi kubaba.

3 Baho, kikahumiye kimanyilo kingi kuluhano, likawoneke liyoka likomi lidung'u likali na mituwe saba na mapembe kyumi na kila kituwe kikali na ingela. 4 Mkila va liyoka ukali ukuluwula pono yimwi cha nondwa cha kuluhano na kuchigwisa muinyi. Na lyene limile pautalo lya mdala yeali pepi kubaba neke peibaba hela amumile mwana uyo. 5 Baho, maye yula peababile mwana mgosi, dailongocha inyi chonda kwa lusaga lwake lwa kyuma. Ila mwana uyo akanyamulwa na kusindikwa kwa Nguluvi mukigoda kya ung'achale. 6 Mdala yula akanyilila kudasi, Nguluvi akali amwandalie pono neke apatile kwikala ukoya kwa figono elufu moja na miya chivili na sitini.

7 Suwe, pakahumile na fita ukoya kuluhano. Ndumindumi yeikemelwa Mikaeli pamwi na vandumindumi vake vakatovine na lila liyoka pamwi na vandumindumi va liyoka. 8 Ila liyoka na ndumindumi vake vakalemwile fita, ndena sevakalekilwe kangi kuvecha kuluhano. 9 Suwe, liyoka likomi likatagwa panyi. Liyoka ilyo nde lila liyoka lya pamwandi lyelikemelwa Ibilisi awu Setani yeakachangile vanu vonda va inyi. Akatagilwe panyi muinyi, mwene pamwi na ndumindumi vake vonda.

10 Baho, ndikapulike lichwi likomi kuhuma kuluhano, ikilonga, "Nondee Nguluvi vetu avalowola vanu vake, atumile umwike vake kuvanga utavala vake. Nondee Kilisito vake nave awonise umwimike vake. Avechile ndeni kwakuva mlata va vakolo vetu atagilwe panyi. Yeakali akuvalata pautalo lya Nguluvi pamiye na pamunyi atagilwe panyi. 11 Vadikila vayetu, vamuwesile kwa danda lya Mwanang'ondolo na kwa unanzi va Nguluvi vevakavalongiye vanu. Vene vakaidikile kufuwa kuchumba kwikala. 12 Ndeni, mkeduke nyenye vonda vemwikwikala ukoya kuluhano! Ila mwisungamwilola nyenye vemwikwikala muinyi na fiwumbe fyefikwikala muinyanza, kwakuva Setani ikile kwa nyenye, akiva avipile hilo, kwakuva ekwacha kwa chipindi kyake kidodo!"

13 Liyoka peliwene atagilwe panyi muinyi, akamdagile yula mdala yeamubabile mwana mkigosi. 14 Ila yula mdadala akagavilwe mapapatilo gavili gya ndapu mkomi avese kuguluka kuhelela ukoya kudasi pono yeigelanichwe na Nguluvi. Ukoya daidimwa kwa miyaka gidatu na nusu akiva kutali na liyoka. 15 Suwe, liyoka akalokola malenga golofu ngita mgoka kuhuma mumulomo gwake, neke gamsung'e maye na kumdibacha mumalenga. 16 Ila inyi ikamtanga maye yula. Inyi akajidinduwe ngita mulomo ikamila malenga gegahumile mumulomo gwa liyoka lila. 17 Baho, lila liyoka likapatile luvipo lukomi kwakuva lya yula mdala, likahele kwitova fita na vana vevasigaliye va uyo mdala, vala vevakudikila malagilicho gya Nguluvi na vala vevikolela mawulanicho gya Yesu Kilisito. 18 Liyoka lila likaimile mung'umbung'umbu mwa inyanza.