1 Baho, ndikawene ndumindumi yungi va kuluhano kwa Nguluvi mwene ludali ikwika kuhuma kuluhano. Akali agubikwe na lifunde na linyuwa malenga pakituwe kyake. Wuso vake ung'alile ngita lichuwa mumutwe na magulu gyake ikali ngita lisimbili gya lyoto. 2 Mumawoko gyake akali abatile kiganulo kidodo kyekikali kidinduliwe. Akauvikile ligulu vake wumwi va ndewo pakyanya lya inyanza na mgulu vake va kusoto akauvikile pakanya lya inyi ng'afu, 3 akakemela kwa lichwi likomi ngita simba yeidilima. Peabwatuke kwa lichwi likomi, ndilimo saba ikapulikike. 4 Ata milindimo saba peihumicha lichwi chawo, ndisaka kusimba gala gyegilongilwe na ludilimo, ila ndipulike lichwi kuhuma kuluhano ikalonga, "Njowo icho cha mdilimo chila saba nde lupwepo ubihile kugasimba!"

5 Baho, yula ndumindumi yendimwene imile kukyanya painyanza na kukyanya painyi ng'afu akatanamule liwoko lyake lya ndewo kukyanya kuhelela kuluhano, 6 akailapile kwa Nguluvi yeakwikala mbepali, yeaumbile luhano na inyi na nyanza na fiwumbe fyonda fyefigehe muinyi, akandilongiye, "Chipindi cha kuchindila kisilile. 7 Ila chipindi yula ndumindumi va saba, daipula lila lingalapi lyake. Nguluvi daigita gala makani gyake gya lupyepo ngita peavalandulile vanyegendwa vake vavichi."

8 Baho, yila lichwi lyendikapulike pamwandi kuhuma kuluhano ikandilongiye kangi. "Helele ukanyamule kiganulo kyekigubutuliwe kikoleliwe na ndumindumi yeaimile pakyaya lya inyanza na inyi ng'afu."

9 Baho, ndikamhelelilye yula ndumindumi na kumsuka kila kiganulo kidodo. Akandongiye, "Nyamule kiganulo na uliye. Dakivecha na ung'ali mulileme lyako, ila mumulomo gwako dakivecha kinofu ngita luki."

10 Suwe, ndikakitolile kila kiganulo kidodo kuhuma mumuwoko va yula ndumindumi na ndiliye. Kikali kinofu mumulomo ngita luki, pendimilile kiganulo ikyo kikali king'ali mulileme lyangu. 11 Baho, vakandongiye, "Ung'ang'wa kulonga uvichi ugu na uendelele kuvalongela vanu dakyekihumila muinyi cholofu na makabila gyolofu na luga chongofu na vang'achale volofu."