1 Baho, ndikawene mng'oko yumwi mng'ali akihuma muinyanza. Mwene fituwe saba na mapembe kyumi na kila pembe ikali na ingela. Matawa gya kumliga Nguluvi gasimbilwe mumitwe gyake. 2 Mng'oko yendimwene akali ngita duma, magulu gyake gakali ngita mng'oko ikemelwa dubu na mlomo vake ngita simba. Lila liyoka likamgavile ludali lwake na kigoda kyake kya ung'achale na umwimike mkomi. 3 Kituwe kimwi kya mng'oko uyo kikawonike ngita kinakikong'o kikomi hilo, ila kikong'o ikyo kikananile. Vanu vonda va inyi yonda vakamfwatile. 4 Vakagundamiye lila liyoka kwakuva akamgavile yula mng'oko uweso vake. Kangi vakamgundamiye yula mng'oko na kulonga, "Nde ani yeihwana na mng'oko uyo? Nde ani yeiwesa kwipinja na mwene?"

5 Baho, mng'oko uyo akalongilwe alonge malichwi gya kwidumba na kumliga Nguluvi na kutumila umwimike vake kwa chipindi cha miechi alobaini na givili. 6 Suwe, avangile kumliga Nguluvi, alilige litawa lyake na alige pono peakwikala na vonda vevakwikala kuluhano kwa Nguluvi. 7 Kangi akagavilwe umwimike va kwitova fita na kuvavesa vanu va Nguluvi, akagavilwe umwimike kwa vanu va kila kabila ng'ombelo na inyi. 8 Na vanu vonda vevikwikala muinyi davakumlumba mng'oko uyo. Ila sevala matawa gyao gyegasimbilwe kuhuma pamwandi peiwumbilwe inyi mukiganulo kya wumi va Mwanang'ondolo, yeainjilwe.

9 Yeagehe na masigicha gyakupulika na apulike. 10 Yeyonda yeing'ang'wa kuvecha msutu na mwene daivecha msutu,

yeyonda yeing'ang'wa kudochwa kwa lipanga, daidochwa kwa lipanga.

Suwe, vanu va Nguluvi ving'ang'wa kuhuvilila na kudikila.

11 Baho, ndikawene mng'oko yungi, ikang'ala kuluhano kwa Nguluvi kuhuma painyi. Akali na mapembe gavili ngita ng'ondolo, ila akalongile ngita liyoka. 12 Nave akatumile umwimike vonda va mng'oko yula va kwanja na akatumile umwike uwo pautalo lyake. Akavaswitilicha vanu va inyi yonda vevagehe mumo vamlumbe mng'oko uyo va kwanja, yeakali na kikong'o kikomi hilo kyekinanile. 13 Suwe, uyo mng'oko mg'ali va uvili akagitile umanyitu mikomi na akagitile lyoto ukwike kuhuma kuluhano kwa Nguluvi kuno vanu vilola. 14 Akavachangile vanu va inyi kwa umanyitu gyeakali igita pautalo lya yula mng'oko va kwanja. Akavalongiye vanu vevakwikala muinyi vagelaniche ling'omong'omo kwa uginyange va yula mng'oko va kwanja, yeakali alemichwe kwa lipanga ila akananile. 15 Baho, akagavilwe umwimike va kuipulilila muhe mulila ling'omong'omo lya mng'oko va kwanja, ata likawesile kulonga na kuvadocha vala vanu vonda vevakanile kuligundamikila ilyo ling'omong'omo. 16 Kangi, akamuswitilicha kila yumwi, mdodo na mkomi na mmosi na mhangala na munu va pekesu na msutu, vavikwe gumba paliwoko lyao lya ndewo awu pawuso. 17 Kwakuva munu yoyonda seivikwa gumba daseiwesa kugula vala kugucha. Gumba ilyo ndi litawa lya mng'oko va kwanja awu namba cha litawa lyake.

18 Lukani ulu linga'ng'a uginyange! Munya luhala iwesa kuganula namba lya mng'oko uyu kwakuva nde namba lya munu tunga. Namba iyo ndi miya sita na sitini na sita.