1 Peamalile kugawona ago, baho ndikawene ndumindumi va kuluhano kwa Nguluvi vatayi vemile mulubali chitayi cha inyi. Vakichipinga lukala kuhuma mulubali chonda cha inyi, neke lukala lubihile kupungila kukyanya lya inyi vala kukyanya lya inyanza vala kusung'a libiki lyolyonda. 2 Baho, ndikawene ndumindumi yungi va kuluhano ikang'ala kukyanya kuhuma lubali lwa pelihumila lichuwa, kuno akolile unepo va Nguluvi yeagehe wumi. Akavakemela kwa lichwi likomi na kuvalongela awo ndumindumi vatayi vevagavilwe umwimike gya kuhananga inyi na inyanza, 3 "Mubihile kuhananga inyi vala inyanza, vala mibiki, mbaka petukuvavikila gumba pawuso cha vanyigendwa vonda va Nguluvi." 4 Baho, ndikapulike jumula vala vanu vevavikilwe gumba laki yimwi na elufu alobaini na chitayi va makabila gyonda gya Isilaeli. 5 Vanu vevavikilwe gumba vevahumile mukabila lya Yuda vanu elufu kyumi na vavili na kabila lya Lubeni vanu elufu kyumi na vavili na kabila lya Gadi vanu elufu kyumi na vavili, 6 na kabila lya Asheli vanu elufu kyumi na vavili na kabila lya Nafitali vanu elufu kyumi na vavili na kabila lya Manasi vanu elufu kyumi na vavili, 7 na kabila Simoni vanu elufu kyumi na vavili na kabila lya Lawi vanu elufu kyumi na vavili na kabila lya Isakali vanu elufu kyumi na vavili, 8 na kabila la Sabuloni vanu elufu kyumi na vavili na kabila lya Yosefu vanu elufu kyumi na vavili na kabila lya Benjamini vanu elufu kyumi na vavili.

9 Baho, ndikalolile pautalo lyangu pakali na lipinga likomi lya vanu kwihela munu yeyonda yeiwesa kuvalanga, kuhuma kila inyi na kuhuma kila kabila na lukolo kuhuma kila luga, vemile pautalo lya kigoda kya utwa na kuutalo lya Mwanang'ondolo. Vevakali vafwalile myenda mivalafu na vakolile makwati ga mitende mumawoko gyawo. 10 Vene vakali vakitova kyowo kwa lichwi likomi vakilonga, "Ulowolo vetu wihuma kwa Nguluvi vetu, mwene akalile pakigoda kya ung'achale na kuhuma Mwanang'ondolo!" 11 Vandumindumi va kuluhano kwa Nguluvi vonda vevakali vemile kuchungutila kigoda kya ung'achale na vala vavaha isilini na vatayi na fiwumbe vatai wumi. Vakaguwe ufuma pautalo lya kigoda kya ung'achale na kumulumba Nguluvi, 12 vakilonga, "Ena! Nguluvi vetu injumwa na ahongechwe na aginywe kangi aveche na mwimike vonda na ludali, mbepali. Ndakyene!"

13 Baho, yumwi va vala vavaha isilini na vatai vakanihuchile, "Vanu ava nde ani vevafwalikle myenda mivalafu? Na vahumile kwiya?"

14 Ndikamhigile, "Mtwa veve ukuvachela."

Mwene akalonga, "Ava nde vala vevahumile mumagudo makomi na vahechilwe sambi chawo kuchumbila kufuwa kwa Mwanang'ondolo na kuvafwalisa myenda mivalafu. 15 Ava veukuvawona vagehe pautalo lya kigoda kya ung'achile kya Nguluvi na kumgumbanikila pamunyi na pamiye Mukaye lyake, na mwene yeikala pakigoda kya ung'achale na daakuvagubika kwakuva mwene agehe navo na kuvadima. 16 Dasevivecha na njala vala ng'elu kangi. Lichuwa vala lifuke selikuvanyanya kangi. 17 Kwakuva Mwanang'ondolo yeakali pagatigati lya kigoda kya ung'achale daivecha mkwamila vawo, mwene daakuvalongocha kuhelela mukilwitu cha malenga manofu. Nguluvi daifyangula mihochi gyawo gyonda kuhuma mumeho gyawo."