1 Pegachumbile makani ago, ndikapulike lichwi ngita lipinga likomi lya vanu kuluhano kwa Nguluvi vakilonga, "Ajumwe Nguluvi, ulowo na ukomi na umwimike wihuma kwa Nguluvi vetu. 2 Kwakuva luhigo lwa Nguluvi ihela uhumwilila, Nguluvi akamuhigile yula msasi mkomi yeavagitile vanu vagite mawofu muinyi kwa usasi vake. Akamuhigile uyo kwakuva akadochile vanyigenda va Nguluvi." 3 Vakalonga kangi, "Anjumwe Nguluvi! Lyosi lya lyoto lyeunyanyile mwani mkomi dawikang'ala kukyanya mbepali!" 4 Vala vavaha isilini na vatai pamwi na vala fiwumbe wumi vatai vakaguwe ufuma, vakamfunya Nguluvi yeakali akalile mukigoda kya ung'achale. Vakalonga kwa lichwi ngomi, "Ndakyene, anjumilwe Nguluvi!"

5 Baho, ikahumile lichwi kuhuma pakigoda kya ung'achale, ikilonga "Mnjume Nguluvi vetu, nyenye vanyigendwa vonda, nyenye vonda vemukumginya hilo Nguluvi, vadodo na vakomi!" 6 Baho, ndikapulike ngita lichwi lya lipinga likomi hilo lya vanu. Kangi lichwi ilyo likali ngita lichwi lya malenga pegipogoma ngita mdilimo gwa lado vakitova kyovo vakilonga, "Anjumwe Nguluvi! Kwakuva Mtwa Nguluvi vetu va umwimike vonda itavala. 7 Tukeduke na tunemele na tumjume Nguluvi ukomi! Kwakuva lihungu lya Mwanang'ondolo lifikile na mdala va lihungu ayivikile unofu. 8 Nguluvi akamgavile mwenda veuhonilwe kwa kitambala kivalafu hilo neke afwale, valafu yeimelemeta unofu." Ugo mwenda mnofu nde magito manofu gya vanu va Nguluvi. 9 Baho, ndumindumi va kuluhano kwa Nguluvi akandilongiye, "Simbe aga, vafunyilwe vala vevalalikwe mukyakula kya lihungu lya kutola lya Mwanang'ondolo!" Mwene akaendeliye kulonga, "Aga gyealongiye nde malichwi gya undakyene lya Nguluvi." 10 Baho, ndikaguwe ufuma pautalo lyake ndikasakile kumlumba, ila mwene akandilongiye! "Ubihile kugita ndena! Nene mnyegendwa myago pamwi na lukolo vako, vevali vaswida va Yesu. Mulumbe Nguluvi!"

Kwakuva uswida va Yesu nde ukuvang'alicha va uvichi.

11 Baho, ndikawene luhano ludindwike na pautalo lyangu pakali na falasi mvalafu, yeakang'ale falasi uyo akali yeihela likolakola na mndakyene. Kwakuva mwene ihiga ngita peing'ang'wa na akwitova fita 12 Meho gyake ndi ngita lumuli lwa lyoto na kukyanya lya mtuwe vake kukali na ingela chongofu. Akali na litawa lyelisimbilwe lyeseachelile munu yungi ila mwene hela. 13 Akali afwalile lihingila lyelijabikwe mudanda na litawa lyake ndi, "Luchowo lwa Nguluvi." 14 Mapinga makomi gyevakwikala kuluhano vakali vakimfwatila, vakiva vakang'iye falasi vavalafu, kuno vafwalile myenda gyeuwonile kwa kitambala kivalafu hilo na nofu hilo. 15 Mumulomo gwake wihuma lipanga litema hilo daitumila kuvawesa vanu va inyi chonda. Mwene ndedaitavala kwa lusaga lwake lwa kyuma. Daakuikama mukinu kya kukamila sabibu va luvipo lukomi lwa Nguluvi munya ludali vonda. 16 Palihingila lyake na pawuso gwake lisimbilwe litawa lyake, "Ng'achale va Vang'achale na Mtwa va Vatwa."

17 Kangi ndikamwene ndumindumi yumwi imile mugati lya lichuwa, akavakemeliye fidege wonda veviguluka kwa lichwi likomo, "Mwache, mwilundise pamwi kwakuva lya lihungu likomi lya Nguluvi, 18 neke mwache kuliya huchi va vang'achale na cha va komi va vapuga na cha va vanu venye ludali na cha va falasi na cha lyavakang'ala falasi na huchi va vanu, vonda vevalekilwe na vachulila, vadodo na vakomi."

19 Baho, ndikamwene yula mng'oko mng'ali na ng'achale va inyi pamwi na mapuga gyawo. Baho, vakayilundise pamwi neke kutova fita pamwi na yula mkang'ala falasi mvalafu na vapuga vake. 20 Ila yula mng'oko mng'ali akabatilwe pamwi na yula mvichi va udesi akali agitile kimanyilo kwakuva lya mng'oko uyo, kwa fimanyilo akavachangile vala vevawanuke gumba lya mng'oko uyo na kuifunya ling'omong'omo lyake. Ava vavili vakatagilwe vali wumi mgati lya lihiva lyelikwaka lyoto va kikwatilo, 21 na vala vevasigaliye vakadochilwe kwa lipanga weuhumile mumulomo gwa yula yeakang'iye falasi mvalafu, ndapu vonda vakagwite kwa huchi cha vala vachindama vawo vevadochilwe.