1 Baho, Ndumindumi va uhanu akapulile lingalapi lyake. Ndikawene nondwa yeikali iguwe kuinyi kuhuma kuluhano, ikagavilwe udindulo va kudindulila lilindi lya inyi lya vanu vevafuwe. 2 Nondwa ikalidinduwe lilindi lyelihelela inyi lya vanu vevafuwe, lyosi ukahuma mulilindi ngita lyosi weuhuma mulitanuli likomi hilo, lichuwa na lulanga fikali kisi kwakuva lya lila lyosi lyelihumile mulilindi. 3 Midedema vakahumile mula mulyosi, vakahelele kukyanya lya inyi, vakagavilwe ludali ngita ludali cha kuluma ngita kinjemi. 4 Vakalongilwe mbihile kuyaananga msoli gya inyi, vala mimelo vala mibiki gyogyonda, ila muvahanange vanu vevihela gumba lya Nguluvi pawuso chawo. 5 Vakalagilichwa kuvaguda kwa myechi gihano, ila vabihile kuvadocha. Uvafi va kulumwa na midedema uveche ngita vanu vevalumilwe na kinjemi. 6 Mukigono ikyo vanu davisaka lufuwo ila dasevakukipata, davidoboka kufuwa ila lufuwo dakikuvanyila.

7 Midedema gila vakali na wumbo lya falasi vevaandaliswe kwa fita. Mumutuwe gyawo kukali na kinu ngita ingela lya sahabu na wuso chawo chiwana na ngita wuso va vanu. 8 Vakali na fwili ngita vadadala na mino gyawo gakali ngita ga simba. 9 Vihafu fyao fikali figubikwe na finu ngita ngawo lya kyuma. Na lichwi lya mapapatilo gyao gikali ngita mageleti gye gikwega na falasi gyegagehe mulugendo kuhelela mufita. 10 Vakali na mikila gyegikali na mihomi ngita kinjemi, mikila ila ikali na ludali lwa kuvaluma vanu kwa chipindi kya miechi gihanu. 11 Baho, vakali na mng'achale vawo, mwene nde ndumindumi va lila lilindi litali hilo inyi lya vanu vevafuwe, litawa lyake kwa Kibulania ndi Abadoni na Kigiliki ndi Apolioni mana lyake nde mhananga.

12 Makani manjanganifu gya kwanja gachumbile, gave gangi gavili gikwacha.

13 Pegachumbile ago, ndumindumi va sita akapulile lingalapi lyake. Ndikapulike lichwi ikahumile mu chila mipembe chitai cha kindangavala kyekichengilwe kwa maganga kya sahabu kya kunyanyila manung'ililo yeikali pautalo lya Nguluvi. 14 Lichwi ilyo ikamlongiye yula ndumindumi va sita mwene lingalapi, "Valekelwe vala ndumindumi vatai vevawopilwe mula mumgoka mkomi Fulati." 15 Na vala vandumindumi vatai vakavopulwe vevakali vavikilwe unofu kwa yila saa na kigono na mwechi ugo na mwaka ugo, neke vavadoche selusi yimwe lya vanu vonda. 16 Ndipulike volofu lyao, wolofu lya vapuga vakang'ala falasi vakali milioni miya chivili. 17 Ndeni pendivawene avo vakang'ala falasi, vikang'ala falasi vakiva vafwalile mwenda va kyuma pakihafu, wukali na langi idung'u hilo na dakibuluu na langi ya baluti ndikawene fituwe fya falasi fikali ngita fituwe fya simba mulomo gwawo ikali ihumicha lwenge lya lyoto na lyosi na utine va kikwatilo. 18 Selusi lya vanu vakafuwe na matovo makomi ago madatu, kwa lyoto na lyosi na baluti, yeyahumilwe mumulomo gya avo falasi. 19 Ludali va avo falasi chikali mumulomo gwawo na mumikila gyawo, kwakuva mikila gyawo ikali ngita lyoka chechikali na mituwe gyevatumile kuvalemacha vanu. 20 Vanu vangi muinyi sevakafuwe kwa magudo ago. Ila vanu avo sevakamuwuyile Nguluvi na sevakagalambuche mawocho gyao na kuleka kulumba finu fyevagelaniche kwa mawoko neke kulumba. Vala sevakalekile kulumba mahoka na ming'omong'omo gyegigelanichwe kwa madini gya sahabu na cha madini gya fesa na gya madini gya saba na maganga na mibiki, finu sefiwesa kulola vala kupulika vala kugenda. 21 Vanu vala sevakamsedukile Nguluvi na kuleka magito gyawo manjanganifu gya kuvadocha vanu na uhavi na ugoni na uhichi.