1 Baho, ndikawene ndumindumi va kuluhano kwa Nguluvi yumwi ikwika kuhuma kuluhano, kuno abatile udindulo va lila lilindi litali lya inyi lya vanu vevafuwe na akiva na ndegeyi ngomi lya kyuma mumuwoko gyake. 2 Suwe, ndumindumi yula akalikolela lila lyioka lya daha lyelikemelwa Ibilisi awu Setani, akamuwopile kwa ndegeyi lya kyuma kwa myaka elufu yimwi. 3 Akalidagila mulilindi litali lya inyi lya vanu vevafuwe, akamdindila mlyangilo na kuvopa kihundo, neke abihile kwendelela kuchichanga inyi cholofu mbaka myaka igyo elufu imwi gisile. Pambele daadinduliwe kwa chipindi kidodo.

4 Baho, ndikawene figoda fya ung'achale, fyefikali fikalilwe na vanu na vagavilwe umwimike va kuhiga. Ndikawene muhe gya vala vevadumulwe mituwe kwakuva lya uswida va Yesu na kwakuva lya luchowo lya Nguluvi. Avo sevamgundamiye mng'oko uyo vala ling'omong'omo lyake na sevakuwanuka yila gumba lyake pawuso gyawo awu paliwoko lyawo. Ndumindumi avo va Nguluvi vakapatile kangi uwumi na kutavala pamwi na Kilisito kwa myaka elufu yimwi. 5 Vangi vevafuwe sevachulubuke kangi mbaka myaka elufu yimwi peichumbile. Ugu nde uchulubuko va kwanja. 6 Ngulivi daakuvafunya hilo vala vanu veavachulubuwe mala lya kwanja! Kufuwa kya uvili uhela ludali pakyanya lyao, kwakuva davivecha vatekechi va Nguluvi na va Kilisito na davitavala pamwi na Kilisito kwa chipindi kya miyaka elufu yimwi.

7 Pegichumba chipindi kya myaka elufu yimwi, Setani dailekelwa kuhuma mukiwopo, 8 suwe, daihuma kwivala na kuvanga kuvachanga vanu vonda va inyi vevatavanyike kila pono muinyi, avo vanu vonda vevatawanyike kila pono muinyi, avo nde vachwindama va Nguluvi muinyi na vikemelwa Gogu na Magogu. Setani daakuvalundasa vanu avo kwakuva lya fita vanu avo davivecha vongofu ngita mhanga va muinyanza. 9 Vene vakali vakigenda mupono lyonda lya inyi, vakichungutila kyama kya vanu va Nguluvi na ula mwani yeaukeliye Nguluvi. Ila lyoto kuhuma kuluhano kwa Nguluvi ukavakwikila na kuvadocha. 10 Na Setani yeavachangile akatagilwe mulihiva lyelikwaka lyoto veseuchima pevakali vatagilwe yula mng'oko na mvichi va udesi. Davagudiswa kula pamunyi na pamiye, mbepali.

11 Baho, ndikawene kigoda kikomi kivalafu kya ung'achale na ndikamwene yeakalile pakigoda ikyo. Inyi na luhano chikanyilile pautalo pameho gyake na pono baho sepaonekine kangi. 12 Pambele ndikawene vanu vevafuwe vakomi kwa vadodo, vakali vimile pautalo lya kigoda ikyo kya ung'achale na figanulo fikagubutuliwe. Baho, kiganulo kingi kya uwumi kikagubutulwe kangi. Vanu vevafuwe vakahigilwe kuwana na magito gyawo ngita peisimbilwe mufiganulo ifyo. 13 Inyanza ikavahumicha vanu vevafuwe vevakali mugati lyake. Kufuwa na inyi lya vanu vevafuwe chikavahumicha kwivala vanu vevafuwe vevakali mugati lyake. Kila yumwi ihigwa kuwana na magito gyake. 14 Baho, kufuwa na inyi lya vanu vevafuwe chikatagwa lihiva lya lyoto. Lihiva ilyo lya lyoto ndi kufuwa kya uvili. 15 Munu yeyonda litawa lyake selisimbilwe mukiganulo kya uwumi, daitagwa mulihiva lya lyoto lyeseuchima.