1 Kangi, Mwanang'ondolo akamatula unepo va saba, kuluhano kwa Nguluvi kukachikile yii! Kwa chipindi cha nusu saa. 2 Baho, ndivawene vala vandumindumi saba vevikwima pautalo lya Nguluvi, na vakagavilwe lya ngalapi saba.

3 Ndumindumi va kuluhano yungi yeakali na kiyonjo kyekigelanichwe kwa sahabu kya kunyanyila manung'ililo, achile na kwima pautalo lya kindangavala kya maganga kya kunyanyila. Akagavilwe manung'ililo neke aheche usembe pamwi na masuko gya vevahaguliwe vonda va Nguluvi. Usembe ugo uhechelwa pakindavala kyekichengilwe na maganga sahabu kyekigehe pautalo lya kigoda kya ung'achale. 4 Lila lyosi va manung'ililo pamwi na masuko gya vanu va Nguluvi, fikahelele kukyanya kwa Nguluvi, kuhuma mumawoko gya yula ndumindumi va kuluhano. 5 Baho, yula ndumindumi akanyamule kila kiyonjo kya sahabu kya kunyanyila manung'ililo, akavikile lyoto kuhuma mu kindangavala kya maganga, akatagile kukyanya lya inyi. Ikahumile lichwi lya lado ikadilima na lung'ali lya lado na mhogoseko va inyi.

6 Suwe, vala vandumindumi saba vevakali na ngalapi saba vakajivikile unofu kwa kupula.

7 Ndumindumi va kwanja akatalile kupula lingalapi lyake. Pakahumile na ndonya lya maganga na lyoto chechihanyangise na danda, vikatagilwe kwa ludali kukyanya lya inyi na selusi imwi lya inyi ikayanganike na selusi imwi lya mibiki ikapiye na makwati gyonda madodi gikapiye.

8 Baho, ndumindumi va uvili akapule ngalapi lyake. Kinu ngita kidunda kikomi weukwaka lyoto kikatagilwe mu inyanza. Selusi imwi lya inyanza ikaseduke kuvecha danda, 9 Selusi imwi lya viwumbe vene wumi vekwikala mu inyanza vikafuwe na wato mkomi chikefu chikapiye.

10 Ndumindumi va udatu akapule ngalapi lyake. Nondwa ngomi yeikali ikwaka ngita lwenge, ikaguwe kuhuma kuluhano, ikaguliye selusi imwi lya migoka na filwitu fwa malenga. 11 Nondwa iyo ikemelwa, "Ung'ali". Selusi imwi lya malenga gakali mang'ali na vanu volofu vakafuwe kwakuva lya malenga ago yakali na ung'ali.

12 Baho, ndumindumi va utayi akapulile lingalapi lyake. Baho, selusi imwi lya lichuwa na lya mwechi na nondwa chikatovilwe. Selusi imwi lya welu ikali kisi. Na selusi imwi lya pamunyi ikali ihela welu na selusi imwi pamiye ikali ihela welu.

13 Baho, ndikalolile na kupulika ndapu yumwi akiguluka kukyanya hilo kuno ekwimba kwa lichwi likomi, akilonga, "Sungamwilola, sungamwilola, sungamwilola! Nyenye vanu mkwikala muinyi, magudo makomi dagivanga baada lya ndumindumi vaudatu pevipula!"