1 Baho, ndumindumi va Nguluvi akaniwonise mgoka va malenga gya uwumi weugehe wilangala ngita lundala, gakahumile mu kigoda kya ung'achale kya Nguluvi na Mwanang'ondolo. 2 Mgoka uwo upogoma kuchumbila ng'asi yeigehe pagati lya mwani. Mukila mung'umbung'umbu lwa mgoka kugehe na libiki lwa uwumi wewibaba manunu mala kyumi na chivili kwa mwaka, yani mala yimwi kila mwechi na makwati gyake huvananicha vanu va inyi chonda. 3 Kuhela kinu kyokyonda kyekikotoliwe dakivecha mumwani ugo.

Kigoda kya ung'achale kya Nguluvi na kya Mwanang'ondolo dakivecha mu mwani uwo na vandumindumi vake davamlumba. 4 Davaulola wuso vake na litawa lyake dalisimbwa pakyanya lya wuso chawo. 5 Pamiye sekuvecha kangi, vala seving'ang'a welu va lwenge awu va lichuwa, kwakuva Mtwa Nguluvi daavang'alichila na vene davitavala mbepali.

6 Baho, ndumindumi va kuluhano kwa Nguluvi akandilongiye, "Njowo ichi ndi cha undakyene na cha kwidikilwa. Mtwa Nguluvi eakuvalongocha vavichi vake valonge unanzi vake kuchumila Muhe vake amlagiche ndumindumi vake avawonese vachulila vake gala gegihumila pepi."

7 Yesu akalongile ndena, "Pulikiche! Ndigehe pepi kwacha. Afunyilwe yula yeakugakolela machowo gya uvichi va Nguluvi gyekagehe mukiganulo iki."

8 Nene Yohani, ndikapulike na kugalola makani aga. Pendikali ndigapulike na kugalola ndikaguwe lufuma pamagulu gya yula ndumindumi yeakali andiwonese makani ago. Neke ndimjume Nguluvi 9 Ila mwene akanilongiye, "Ubihile kugita ndena! Nene ndi mnyigendwa ng'ani ngita veve na lukolo vako vavichi na vonda vevakwidikila machowo gya kiganulo iki. Mugondamile Nguluvi!" 10 Baho, akandongiye, "Ubihile kugafiya machowo aga gya uvichi va kiganulo iki, kwakuva gyonda gyegalongilwe mukiganulo iki gagehe pepi kuhumila. 11 Yeigita mawofu na yeigendelele kugita mawofo, yeigita uhafu na kugendelela kugita uhafu na mwene yeigita gyegyakumkelesa Nguluvi na agite ndeni na munu yeidikilwa pautalo lya Nguluvi aendelile ndeni."

12 Yesu ilonga, "Pulikiche!" "Ndikwacha kisato! Pamwi na fupo yedandikumgavila kila yumwi kuwama na magito gyake. 13 Nene ndi Alufa na Omega, mana lyake ndi vakwanja na va mwiso va pamwandi na mwiso."

14 Vafunyilwe vala vevwikala hilo kwa kumlumba Nguluvi, neke vapatile kwidikilwa pautalo lya Nguluvi na kuhelela libiki lya uwumi na kwingila mumwani kuchumbila mulyangilo gya mwani ugo. 15 Ila mibuwa na vahavi na vagoni na vadochaji vevifunya ling'omong'omo na kila, munu yeikela kuchanga davakwikala kwivala lya mwani ugo.

16 "Nene Yesu, ndimlagiche ndumindumi vangu kulola makani aga kwakuva lya lipinga lya vanu vevamwidkiye Kilisito. Nene ndi ulelo va Dawudi, nde yila nondwa yeing'alicha pamilau."

17 Muhe na mdala va lihungu vakalongiye, "Wache!"

Kila munu yeipulika, ilonga "Wache!"

Yoyonda mwene ng'elu na ache na kila yeikela kunyamula malenga gya wumi anyumule anyuwe hela.

18 Nene Yohani ndikuvalakalila nyenye vonda ve mupulika machowo gya uvichi va kiganulo iki. Munu yeyonda yeikongelecha kinu kyokyonda mumachowo agya, Nguluvi daakumwongechela magudo gyegasimbilwe mukiganulo iki. 19 Ngita munu yoyonda akipungucha kyokyonda mumachowo gya uvichi va kiganulo iki, Nguluvi daakumnyaga pono lyake palila libiki lya wumi na ku mwani gula mkomi, chechisimbilwe mukiganulo iki.

20 Munu mwene yeuhumicha uswida pakyanya lya makani aga alonge ndeni, "Ndakyene, ndacha kisatu!"

Ndakyene, wache Mtwa Yesu.

21 Ndikuvang'angila vonda usanzi va Mtwa Yesu. Ndakyene.