1 Baho baho, ndikawonile Mwanang'ondolo akumatula unepo kya kwanja pagati lya fila saba. Ndeni, ndikapulike yumwi va vala fiwumbe wumi vatayi akilonga kwa lichwi ngomi ngita lya mudilimo, "Wache!" 2 Nene ndikalole pautalo lyangu pakali na falasi mvalafu. Ndeni, ndikamwene munu yula yeakang'ale falasi uyo akali na lukunji, mwene akagavilwe ingela lya ung'achale. Suwe, akahumile kuvawesa vanu na munya umwimike va kuendelela kuvawesa vanu.

3 Baho, Mwanang'ondolo akamatule lunepo va uvili. Ndikampulike yula kiwumbe wumi va uvili akilonga, "Wache!" 4 Baho, akahumule falasi yungi mdung'u hilo. Mwene yeakang'ie akagavilwe lipanga likomi na umwimike lwa kuhecha lutengamaso muinyi neke vanu vayidoche. 5 Baho, Mwanang'ondolo akamatula unepo va udatu. Ndikampulike yula kiwumbe kiwumi kya udatu akilonga, "Wache!" Ndikalolile pautalo lyangu pakali na falasi yungi mtitu! Yeakang'ie akali na mzani va kugela kuno na kuno muwoko gwake. 6 Ndeni, ndikapulike kila kyekikali ngita lichwi pagatigati lya vala fiwumbe wumi vatai ikilonga, "Jampani kimwi kya ngano kwa mahombo gya mnyigendwa kwa kigono kimwi. Majampani madatu ga upemba kwa mahombo gya mnyigendwa kwa kigono kimwi. Ila ubihile kuwananga mafuta gya miseituni vala divai!"

7 Baho, Mwanang'ondolo akamatula unepo va utayi, ndikampulike kiwumbe wumi va utayi akilonga, "Wache!" 8 Ndikalole pautalo lyangu pakali na falasi langi lya kifu! Yeakang'ie falasi yeakemelwe kifo na inyi lya vanu vevafuwe akali akimfwatila kwa kumbele lyake, navo vakagavilwe umwimike va lobo lya inyi kuvodocha vanu kwa fita na lumyai na matamwa na vang'oko vang'ali va inyi.

9 Baho, Mwanang'ondolo akamatule unepo va uhano. Ndikawene panyi lya kya kindangavala kya kunyanyila mang'ung'unilo, muhe cha vala vevakadochilwe kwakuva lya kulanducha unanzi va Nguluvi na kwakuva kulonga gala gyevagawene. 10 Suwe, vakavembile kwa lichwi likomi, "Veve Mtwa Nguluvi, veugehe Mng'alile na Mndakyene, pandili daukuvahiga vanu va muinyi na kuvapilusia makani manjanganifu geavatugitile na kutudocha nefwe?" 11 Baho, kila yumwi vawo akagavilwe mwenda mvalafu na vakalongilwe vachinde chipindi fidodo, mbaka jumula lya lukolo vawo yaani vanyigendwa vayawo vadochwe ngita vawo pevadochilwe neke itimile. 12 Pambele ndikalolile, ndikamwene Mwanang'ondolo akimatula unepo va sita, pakahumile na mhogoseko mkomi lya inyi na lichuwa likaveche lititu ngita mwenda va maloboto veuhonelwe kwa magala ga mene na mwechi vonda ukali mdung'u ndita danda. 13 Nondwa chonda kuluhano chikaguwe kumganga ngita manunu gya likuyu filelenjwa pegiguwa chipindi libiki lyake peuhogoswa na lukala veupuga hilo. 14 Lulanga luyagile ngita kiganulo yeinyengeliwe na kila kidunda na kigunguli kikahechilwe pekikali. 15 Pambele, vang'achale vainyi na filongochi va vanu na vakomi va vapuga na vamosi na vene ludali kwa kila vasutu na munu pekesu, vakayifihile mumanga na mumigema ga fidunda. 16 Vakagilongela fidunda na maganga makomi, "Mtugwiliye na mutufiye kutali na mwene yeakalile mukigoda kya ung'achale na mutuvike kutali na luvipo lwa Mwanang'ondolo! 17 Kigono kile kikomi kyachile, kigono ikyo Nguluvi na Mwanang'ondolo davawonesa luvipo lwao. Wuli, nde ani daikwima?"