1 "Ndivalongie ago neke mbihile kuleka kudikila. 2 Vanu vakuvadaga nyenye mukaye lya kutang'anila Vayawudi, chipindi chikwacha kila yeakuvadocha nyenye daihocha kuva akumgumbanikila Nguluvi. 3 Vanu davakugita ndena kwakuva sevamchela Daada na vala sevakunichela nene. 4 Ndivalongie makani aga neke chipindi cha ago pegagita chipindi chifikile muwiwuke kuva ndivalongie.

"Dandivalongie makani ago kuhuma pamwandi kuva ndikali na pamwi nyenye. 5 Ila nondee ndikuhelela kwa yula yeandilagiliche na kwihela munu ata yumwi venu yeakundiwucha, ndihelela kwii. 6 Kwakuva ndivalongie makani aga muswigime munumbula chenu. 7 Ila ndikuvalongela undakyene, ngiba kwa nyenye nene kuhelela, kwakuva pesendihelela Mtanga daseikwacha kwa nyenye. Ila pendihelela, suwe, ndikumlagicha kwa nyenye. 8 Mwene dapeikwacha akuvalongela ndakyene vanu va inyi kuva vigita nongwa kwa makani ga nongwa, makani gye gakumkelesa Nguluvi na lihiga lya Nguluvi. 9 Vigita nongwa kutigila nogwa, kwakuva sevandidikila nene, 10 Kutigila makani gekakumkelesa Nguluvi, nene ndigitile gala gegakumkelesa Nguluvi, ndena ndihelela kwa Daada na nyenye dasemukunilola kangi, 11 daakuvawonesa pawelu kuva Nguluvi daavahiga, kwakuva ahigilwe suwe Setani yeagehe mtavala va inyi ugu.

12 "Ndigehe na golofu ga kuvalongela, ila kwa nondee semuwesa kugahuvilila gonda. 13 Ila dapeikwacha uyo Muhe va undakyene daakuvagita muchele undakyene vonda va Nguluvi, mwene daseilonga kwa umwimike vake yumwene, ila dailonga geakugapulika na kuvalongela dagegakwacha. 14 Mwene daakuvawonesa pendigehe mkomi kwakuva akuvalongela makani gonda kuhuma kwa nene. 15 Fyonda fyeagehenafyo Daada ndi fya nene, nde kwakuva ndilongile kuva uyo Muhe akuvalongela gala gyonda gegihuma kwa nene.

16 "Chisigaliye chipindi chidodo hele na nyenye semunilola na pambele ludodo mkunilola kangi!"

17 Baho vamonga va vachulila vake vihuchine, fyeilonga fina mana liki? Ekutulongela fisigale figono fidodo na nyenye semunilola na pambele ludodo mkundilola kangi? Kangi igehe na mana liki peilonga, kwakuva ndihelela kwa Daada. 18 Suwe, vakaendelela kwihucha, makani liki aga gyeilonga? Setuchela ilongela liki.

19 Yesu akachelie kuva vakasakile kumuhucha, "Suwe, akavalongie, Mwiwuchana fyendilonge, ‘Fisigalile figono fidodo na nyenye semukunilola na pambele ludodo damukunilola kangi?’ 20 Ndikuvalongela ndakyene, nyenye mwikola na kudadava, ila vanu va inyi vakeduka, mwilola luswigimo ila luswigimo venu useduka kuva lukeduko. 21 Ngita mdala peikwelela kubaba mwana usungwima kwa kuva chipindi chake kifikile, ila peibaba suwe isemwa wula utumama kwakuva lya lukeduko lya kupatila mwana vake. 22 Na nyenye nondee mugehe na lusugwimo, ila ndikwacha kwa nyenye kangi, na nyenye mumema lukeduko munumbula yenu na lukeduko ulo kwihela munu yeihecha kwa nyenye.

23 "Kigono ikyo semukundisuka kyokyonda. Ndikuvalongela undakyene, kyokyonda kyekumsuka Daada kwa umwimike vangu, akuvagavila. 24 Mbaka nondee semusukile kyokyonda kwa umwimike vangu. Musuke na nyenye damuwanuka neke lukeduko hilo.

25 "Ndivalongie makani aga kwa kwifyama. Ila chipindi kikwacha nene sendiywanga kangi na nyenye kwa kwifyama, ila ndikuvalongela pawelu makani gya Daada. 26 Kigono ikyo damusuka kwa umwimike vangu na sendikuvalongela kuva ndikuvasuka kwa Daada kwakuva lya nyenye, 27 Daada mwene akuvakela nyenye, kwakuva nyenye mukunikela nene na mwidikile kuva nene ndihumile kwa Nguluvi. 28 Nene nihumile kwa Daada, ndikachile muinyi na nondee ndihega muinyi na ndiwuya kwa Nguluvi."

29 Baho vachulila vake vakamlongie, "Nondee wilonga mwachimwachi, vala seulonga kwa kwifyama. 30 Nondee twichela kuva veve wichela kila kinu na kwehela kwakuva lya munu kukuwucha, nondee twidikila kuva uhumile kwa Nguluvi."

31 Yesu akavahigila, "Nondee mwidikila? 32 Chipindi kikwacha, kangi ufikile suwe, mwivonda pemyaganika kila munu mukaye lyake na nene ndisigala weka, ila sendigehe weka hela kwakuva Daada agehe pamwi na nene. 33 Ndivalongie makani aga neke mpatile kuva na ulutengamaso pemvecha pamwi na nene. Vanu va muinyi mwipatila utumama, ila mugangamale! Nene niuvesile suwe inyi!"