1 Pegachumbile ago, Yesu akavahumila kangi vachulila vake mung'umbu lya lihiva Tibelia nde lihiva Galilaya. Ndeni nde peikali. 2 Simoni Peteli na Tomasi yeikemelwa Pacha na Natanieli yula yeahumile Kana inyi lya ku Galilaya na vana vavili va Sebedayo na vachulila vake vangi vavili va Yesu vekali pamwi. 3 Simoni Peteli akavalongie, "Ndihelela kulowa somba."

Navo vakamlongela, "Nefwe datuhelela pamwi na veve." Suwe, vakahelela, vakakang'ale wato, ila pamie ponda sevapatile ata somba yumwi. 4 Pepavangile kukiya Yesu akahimile mung'umbu lya lihiva, ila vachulila sevakamchele kuva ndi Yesu. 5 Yesu akavahuchile, "Vaganja vangu, wuli, sempatile ata somba yoyonda?"

Vene vakamuhigile, "Setupatile somba yeyonda."

6 Yesu akavalongela, "Mtage nyafu palubali lya ndewo lya wato na damwipata somba." Ndeni vakataga nyafu chawo na sevakavesile kuchikwegela nyafu muwato, kwakuva somba vakali volofu.

7 Baho yula mchulila yeakeliwe na Yesu akamlongela Peteli, "Yula ndi Mtwa!" Simoni Peteli peapulike kuva yula ndi Mtwa, akategule mwenda vake akayiwopile mukigudi, kwakuva seafwalile mwenda vake gungi na akadumbukile mumalenga. 8 Ila vala vachulila vangi vakachile na wato kumwambo lya lihiva, kuno vikwega nyafu weumemile somba. Sevakali patali na inyi ng'afu, pakali ngita magulu miya ndeni. 9 Pevafikile mung'umbung'umbu, vakawene lyoto lwa makala na kukyanya lyake kuvikilwe somba na libumunda. 10 Yesu akavalongie, "Mulete somba vakefu gyemulowe."

11 Simoni Peteli akakang'ile muwato na akakwega nyafu mung'umbung'umbu lya lihiva na ugehe na somba vakomi mia yimwi na amsini na chidatu. Ata ngita somba vakali volofu ila nyafu seidemwike. 12 Yesu akavalongie, "Mwache muliye." Kwihela ata mchulila yeagechile kumuhucha, kuva "Veve ani?" Kwakuva vachele kuva mwene ndi Mtwa. 13 Yesu akachile, akategula libumunda na akavagavila na vala somba akagitile ndeni.

14 Iyi ikali mala chidatu Yesu kuvahumila vachulila vake kuhuma peachulubuke.

15 Pevasindile kuliya, Yesu akamuhucha Simoni Peteli, "Simoni mwana va Yohani! Wuli, ukunikela nene kuchumba vayago?"

Akamuhigile, "Ena, Mtwa, uchela kuva ndikukukela."

Yesu akamlongie, "Valolele vanang'ondolo vangu."

16 Yesu akamuhucha kangi, "Simoni mwana va Yohani! Wuli, ukundikela?"

Akamuhigile, "Ena, Mtwa, uchela kuva ndikukukela."

Yesu akamlongie, "Ndilolele ng'ondolo vangu."

17 Akamuhucha mala chidatu, "Simoni mwana va Yohani! Wuli, ukundikela?"

Baho Peteli akasugwime munumbula lyake kwakuva amuhuchile mala chidatu, "Wuli, ukundikela?" Mweni akamuhigile, "Mtwa, veve uchela kuva nene ndikukukela."

Yesu akamlongie "Valolele vanang'ondolo vangu. 18 Ndakyene ndikulongela, peukali mdimi ukachovie kwiwopa lufunga yuve na kuhehela kweukela, ila peuvecha mgogolo ukonjolola mawoko gyako na munu yungi akufwalisa na kukusindika kweseukela kuhelela." 19 Yesu alongie ndeni, awonise kuva Peteli dapeafuwa na kufuwa kwamwene peukumletela Nguluvi ukomi vake. Baho Yesu akamlongie, "Ndifwate."

20 Peteli akaseduke, akamuwene yula mchulila yungi yeakeliwe hilo na Yesu, akuvafuwatila, ayu mchulila nde yula yeakalile pepi na Yesu pevakali viliya na kumuhucha, "Mtwa ani yeakukana?" 21 Peteli peamuwonile uyu, akamuhucha Yesu, "Mtwa, wuli munu uyu?"

22 Yesu akamuhigile, "Ngita ndikela asigale mbaka pendikwacha, wisaka liki? Veve ndifwate nene!"

23 Makani gala gya Yesu chikalutala kwa vanu kuva mchulila yula seafua. Ila Yesu sealongile kuva yula mchulila seafua, mwene alongile kuva, "Ngita ndikela asigale mbaka pendikwacha, wisaka liki?"

24 Uyu nde yula yealongile makani aga na ndeyeasimbiliye na tuchela kuva yealongile ndi ndakyene.

25 Ila kugehe na njowo chongofu cheagitile Yesu, ngita ngagasimbilwe gonda, ndihocha inyi yonda ngaikali ndodo kuvika figanulo fyonda ngafisimbilwe.