1 Nyola sagala Kigono kya Kutulula, Maliya va kuhuma Magadala akahelela palikabuli lyelihongwile paliganga na akaliwene lila liganga lihechilwe kumlyangilo mu kukaye lya Nguluvi. 2 Akanyilile mbaka kwa Peteli na yula mchulila yungi yeakeliwe na Yesu, akamlongie, "Vamuhechile Mtwa mukaye lya Nguluvi na vala setuchela pevemvikile!"

3 Bahobaho, Peteli na yula mchulila yungi vakahelela kulikabuli. 4 Vonda vavili vakanyilile ila yula muchulila yungi anyilile kuchumba Peteli, akalongole kufikila pa likabuli. 5 Peagundamile na kung'omelela mugati lya likabuli, akawene ligubiko, ila seaingile mugati. 6 Baho akachile Simoni Peteli, akaingile mulikabuli lyelihongwile paliganga, mula akawene ligubiko, 7 na kila kitambala kyehopwilwe Yesu mutuwe. Kitambala ikyo sekivikilwe pamwi na ligubiko, ila kikali kibandilwe na kuvikwa pono paweka. 8 Baho yula mchulila yungi yealonguwe kufikila palikabuli, akaingile na mwene mugati, akawene na kudikila. 9 Vakali wave sevachela Masimbo ga Nguluvi galongile kuva ing'ang'wa achulubuke kuhuma kwa vanu vevafuwe. 10 Baho vachulila vakawuya kukaye.

11 Maliya akali ahimile kwivala lya likabuli kuno ave ivemba, akagundamile na kung'omelela palikabuli, 12 akavawene vandumindumi va Nguluvi vavili vevafwalile myenda mvalafu hilo, vakalile bahala pamvili va Yesu peukali uvikile, yumwi kumtuwe na yungi kumagulu. 13 Avo vandumindumi va Nguluvi vakamuhucha, "Maye, wuli uvemba?" Akavahigile.

"Vamuhechile Mtwa vangu na sendichela pevemvikile!"

14 Baho akasedukile kumbele, akamwene Yesu ahimile bahala, ila seachele kuva yula ndi Yesu. 15 Yesu akamuhucha, "Maye, wuli wivemba? Ukumsaka ani?"

Maliya acheliye yula yeilonga ndi mdima va mgunda mdodo, akamlongela, "Mtwa, ngita veve umuhechile, nilongele kuhumuvikile na nene ndikumtegula."

16 Yesu akamlongela, "Maliya!"

Maliya akaseduke, akamlongela kwa kibulania, "Laboni" Mana lyake, "Muwulanicha."

17 Yesu akamlongie, "Ubihile kunikolela, kwakuva ndave sendihele kwa Daada. Ila helele kwa lukololo vangu ukavalongele, ndihelela kwa Daada vangu na Daada venu, Nguluvi vangu na Nguluvi venu."

18 Baho Maliya va ku Magidala akahelela kuvalongela vachulila va Yesu akilonga, "Ndimuwene Mtwa!" Na kuvalongela gala gealongilwe na Yesu.

19 Yikali palumiemie lya kigono kya Kutulula na vachulila vakali vatanganile pamwi mugati lya kaye na myangilo gidindilwe kwakuva vavawogwipe vakomi va Vayawudi. Yesu akaachile, akahimile mugati lyawo, akavalongela, "Lutengamaso iveche na nyenye." 20 Peamalile kulonga ago, akavawonesile mawoko gyake na lubafu lwake. Vachulila vakakedukile hilo kumlola Mtwa. 21 Yesu akavalongela kangi, "Lutengamaso iveche na Nyenye! Ngita ndeni Daada peandilagiliche nene na nene ndikuvalagilicha nyenye." 22 Peamalile kulonga ago, akavapumulile muhe na kuvalongela, muwanuke Muhe va Nguluvi. 23 Ngita mkivahechela vanu nongwa chawo, Nguluvi daakuvahechela, ngita semukuvahechela nongwa chawo, Nguluvi daseakuhechelwa.

24 Tomasi, yumwi va vala kumi na vavili, yeakemelwa Pacha, seakali pamwi chipindi Yesu peachile. 25 Suwe, vala vachulila vangi vakamlongela, "Tumuwonile Mtwa."

Tomasi akavalongela, "Nene pendiwene makofu gya misumali mumawoko gyake na kuvika kyala kyangu mumakofu gyake na kuvika liwoko lyangu mulubafu lwake, sendidikila."

26 Pevichumbile figono fimnana, vachulila vake vakatanganile pamwi mugati lya kaye pamwi na Tomasi, kuno milyangilo gikali gidindilwe, ndeni Yesu akachile, akahimile mugati lyawo, akalonga, "Lutangamaso iveche na nyenye!" 27 Baho akamlongile Tomasi, "Vike kyala kyako baha na ulole mawoko gyangu, baho ugolole liwoko lwako uvike lubafu lwangu. Ubihile kwogofya ila dikile!"

28 Tomasi akamuhigile, "Mtwa vangu kangi veve ndi Nguluvi vangu!"

29 Yesu akamlongela, "Wuli, udikile kwakuva undiwonile? Ngiba kwa vala vevadikile, ila sevawene!"

30 Yesu akagitile fimanyilo fyolofu pautalo lya vachulila vake, chesechisimbilwe mukiganulo iki. 31 Ila ichi chisimbilwe neke mpatile kudikila kuva Yesu ndi Kilisito yeahuguliwe na Nguluvi, Mwana va Nguluvi na kwa kudikila muveche na uwumi va mbepali.