1 Yesu akavalongela, "Mbihile kuswigima munumbula chenu. Mumdikile Nguluvi na mundidikile na nene. 2 Mukaye lya Daada vangu muna fyumba fyolofu, ngita sevesile endena, ngandivalongiye daha. Ndihelela kuvandalisia pakwikala. 3 Pendisinda kuandalisa pakwikala, dandiwuya kangi kuvategula, neke pandivecha nene na nyene muveche baho. 4 Na nene kwinihelela muyichele ng'asi."

5 Tomasi akamuhuchile, "Mtwa, setuchela wihelela kwii, tuwesa wuli kuichela ilyo ng'asi?"

6 Yesu akamhigile, "Nene ndi ng'asi na undakyene na uwumi. Kuhela munu yeiwesa kuhelela kwa Daada ngajila kuchumbila kwa nene. 7 Ngita mukunichela nene, mukumchela na Daada vangu. Kuvangila neng'uni mukumchela na mumwene suwe."

8 Filipo akamlongie, "Mtwa, nefwe tukela utuwonise Daada hela, suwe!"

9 Yesu akamlongie, ndikalile na nyenye figono fyolofu, Filipo wilonga seundichela? Yeaniwonile suwe nene amuwonile Daada. Wuli mwilonga, ndivawonese Daada? 10 Wuli, veve seudikila kuva nene ndigehe mugati lya Daada na Daada agehe mugati lyangu? Njowo chendivalongie sendilonga kwa umwimike vangu, ila Daada yeali mugati lyangu igita kasi lyake. 11 Mwing'ang'wa kundidikila pendilonga kuva nene ndigehe mugati lya Daada na mwene Daada agehe mugati lyangu. Ngita semukunidila nene, mudikile kwakuva makani gyendigitila. 12 Ndakyene ndikuvalongela, yeakundidila nene, igita makani gala gyendigita nene, daigita makomi kuchumba aga, kwakuva nene ndihelela kwa Daada. 13 Na kyokyonda kyemkusuka kwa umwimike vangu ndigita, neke Mwana avawonese vanu Nguluvi peagehe mkomi. 14 Pemukundisuka kyokyonda kwa umwimike vangu, nene ndikuvagitila.

15 Ngita mukunikele damukolela malagicho gyangu. 16 Na nene ndikumsuka Daada, mwene akuvagavila Mtanga yungi, yeakwikala na nyenye mbepali. 17 Muhe uyu dakuvagubutulila vanu undakyene. Vanu va inyi sevavesa kumwanuka kwakuva sevavesa kumulola vala kumchela. Ila nyenye mumchela kwakuva isigala na nyenye na ivecha mugati yenu.

18 Sendikuvaleka nyenye vakiva, ndikwacha kangi kwa nyenye. 19 Kisigaliye chipindi chidodo vanu va kuinyi sevakunilola kangi, ila na nyenye damukundilola, kwakuva nene ndivecha uwumi na nyenye damuvecha uwumi. 20 Kigono kila pekifika muchela kuva nene ndigehe mugati lya Daada na nyenye mugehe mugati lyangu, nene ndigehe mugati lyenu.

21 Yeawanuka lulagicho lwangu na kuchikolela, uyu nde akunikela. Mwene yeakunikela nene na Daada vangu dakumkela, nene ndikumkela na kwiwonesa kwa mwene.

22 Yuda seyula Sikaliyoti akamlongie, "Mtwa, ivecha wuli veve kutugita tukuchele na sevanu va inyi vesekudikila veve vakuchele?"

23 Yesu akahigile, munu yeandikela nene ekolela luchowo lyangu na Daada vangu ekumkela na nefwe datukwacha kwa mwene na tukwikala na mwene. 24 Yeseakunikela nene sevikolela njowo changu. Na luchowo lyemulipulike se lya nene, ila ndi lya Daada yeanilagiliche.

25 Ndivalongie njowo ichi pendigehe ndave pamwi na nyenye. 26 Ila Mtanga uyo, ndi Muhe va Nguluvi, yealagichwa na Daada kwa umwimike vangu, ekuvawulanicha kila kinu na kuvawuwisa gonda gyendivalongie.

27 Ndikuvalekela ulutengamaso, ndi lutengamaso lyelihuma kwa nene. Selutengamaso ngita yila yeihuma kwa vanu va muinyi ndena mbihile kugudika munumbula chenu kangi mbihile kwogofya kinu kyokyonda. 28 Mukanipulikile suwe pandivalongie, ndihelela, pambele ndiwuya kangi kwa nyenye. Ngita ngamunikela, ngamwikeduka kwakuva ndihelela kwa Daada, kwakuva mwene ndi mkomi kuchumba nene. 29 Ndivalongie aga nondee ave kuhumila, neke pegihumila mpatile kudikila. 30 Sendilongela kangi makani myolofu, kwakuva mtavala va inyi iyi ikwacha, ila mwene kwa nene ihela umwimike. 31 Ila vanu va inyi vachele kuva ndikumkela Daada na ndigita finu fyonda ngita Daada anilagichile.

Mwime, tuhege baha!