1 Pegachumbile ago, Yesu akahele ku Yelusalemu kulihungu lya Vayawudi. 2 Ukoya ku Yelusalemu, pepi na mulyango ukemelwa mlyangilo va ng'ondolo. Pakali na litanda lyelikemelwa kwa kibulania Betisata na lyechungutilwe na fibudi fihano. 3 Mula mufibudi fihano vakali vigona vatamwa volofu, vabofwike meho na vatenda na venelugaso, vakali vichindila malenga gatimbwiswe. 4 Kwakuva ndumindumi va kuluhano kwa Nguluvi akali ikwika kutimbwisa malenga mulitanda lila. Mtamwa yeyonda yeakali va kwanja kwingila mumo mumalenga gegatimbwiswe, inana utamwa vovonda veanago. 5 Suwe, pakali na munu yumwi yeakali mtamwa kwa miyaka selasini na nane. 6 Yesu peamwene munu yula avasile na kuchela kuva itamika kwa figono fyolofu. Akamuhucha, "Wikela, kunanichwa?"

7 Yula mtamwa akamuhigile, "Mtwa, nene ndihela munu va kunisindika mulitanda pegitimbwiswa. Kila pendigecha kwingila, munu yungi akunilongola."

8 Yesu akamlongie, "Wime, nyamule kitefu kyako na ugende." 9 Bahobaho, munu yula akananile, akanyamula kitefu kyake, akavanga kugenda.

Makani ago, gakagitile Kigono kya Kutulula, 10 suwe, filongochi va Vayawudi vakamuhucha munu yula yeananichwe na Yesu, "Wuli, unyamule kitefu neng'uli Kigono kya Kutulula? Malagilicho gyetu gikukanicha veve kutegula kitefu."

11 Ila mweni akavahigile, "Yula munu yeaninanile andongile, tegule kitefu kyako na ugende."

12 Vakamuhucha, "Munu yeakulongie tegule kitefu kyako na ugende, ndi ani?" 13 Ila yula munu seamchele yeamnaniche akali ani, kwakuva kukali na vanu volofu na Yesu akali ahegile bahala.

14 Pambele, Yesu akatang'anile na munu yula yeamnanile Pakaye lya Nguluvi, akamlongie, "Nondee unanile, bihile kugita sambi kangi, neke ubihile kupatila lukani luhofu kugina lya pamwandi."

15 Baho, munu yula akahele kuvalongela filongochi va Vayawudi kuva yeaninaniche, ikemelwa Yesu. 16 Kwakuva Yesu akagitile lukani ulo, Kigono kya Kutulula, Vayawudi vakavanga kumusumbula. 17 Suwe, Yesu akavahigile, "Daada vangu igita kasi figono fyonda na nene nding'ang'wa kugita kasi ngajila kuleka."

18 Njowo chile chikavavipise hilo filongochi va Vayawudi. Suwe, Vayawudi vakasaka ng'asi lya kumdocha Yesu. Vakagitile ndeni, sekwakuva abedile Kigono kya Kutulula hela, ila akali akumkemela Nguluvi, Daada vake na akwiwananisa na Nguluvi.

19 Yesu akavahigile vala filongochi va Vayawudi ndakyene ndikuvalongela, Mwana seiwesa kugita kinu weka hela. Mwana igita kila kyeilola Daada vake igita, kwakuva kyokyonda kyeagitila Daada na Mwana igitila kiko. 20 Kwakuva Daada akumkela Mwana na kumuwonesa finu fyonda fyeigita mwene. Kangi dakumuwonesa finu fikomi fya kufigita kuchumba ifi na nyenye damduduva. 21 Ngita, fila Daada akuvachulubucha vanu na kuvagavila uwumi va mbepali na ndeni ndeni na Mwana akuvagavila uwumi vala yeavakelie. 22 Kangi, Daada seakumuhiga nongwa munu yeyonda yula, ila amgavile Mwana umwimike va kuhiga nongwa vanu vonda, 23 neke vanu vonda vamginye Mwana ngita fila pevakumginya Daada. Munu yeyonda yesekumginya Mwana, seakumginya Daada yeamlagiliche.

24 Ndakyene ndikuvalongela undakyene, munu yeyonda yeipulika njowo cha nene na kumdikila yula yeanilagichile nene, anago uwumi va mbepali. Daseihigwa ng'odo, ila ahagime suwe, kuhuma mukufuwa na kwingila muuwumi va mbepali. 25 Ndakyene ndikuvalongela, chipindi chikwacha, kangi ufikile suwe, vala vonda vevagehe kutali na Nguluvi davapulika lichwi lya Mwana va Nguluvi na vala vonda davapulika, daviwanuka uwumi mbepali. 26 Ngita, fila Daada aviye na uwumi mugati lyake, ndeni ndeni amgitile mwana kuvagavila vanu uwumi. 27 Kangi, kamgavile Mwana vake umwimike va kuvahiga nongwa vanu, kwakuva mwene ndi Mwana va Munu. 28 Mubihile kududwiva njowo ichi! Kwakuva chipindi chikwacha, vanu vonda vevagehe mukabuli davapulika lichwi lyake, 29 navo davihuma kuhuma mumakabuli gyao. Vala yevagitile finu finofu davachulubuchwa na kuhuma mukabuli yao. Davigavilwa uwumi va mbepali na vala vevakali vigitia unjanganifu davachulubuchwa na kuhuma mukabuli lyao na kuhigwa nongwa.

30 Yesu akwiilongela gyeigita, "Nene sendiwesa kugita kinu kyokyonda kwa umwimike vangu. Nene ndikuvahiga nongwa vanu kuwana na Daada peakundongela na lihigo lyangu lya ndakyene, kwakuva sendigita ngita pendikela nene, ila ndigita ngita peikela yula yeandilagiliche.

31 "Ngita ndikwilongela nyenye njowo changu yune, gala gyendilonga segadikilwe kuva gya undakyene. 32 Ila agehe yungi yeakuchilonga njowo changu kwa nyenye na nene ndichela kuva yonda yeakundilongelela ndi ga undakyene. 33 Nyenye mukavalagiliche vananzi vaelele kwa Yohani mbatisa na mwene akavalongile undakyene. 34 Nene sendihuvulila gala vanu gevakundilongelela nene, ila ndikuvalongela njowo ichi, neke mulowoliwe. 35 Yohani akali ngita taa yeikwaka na kulangala na nyenye mukakedukile welu lwake kwa figono fidodo. 36 Ila kugehe na lukani lukomi hilo lyeliwonesa kuva nene ani kuchumba gala gealongile Yohani mbatisa. Lukani lyene ndi chila kasi cheandigaviye Daada ndichigite, ago gyonda giwonesa nene ani na giwonesa Daada nde andilagiliche. 37 Daada mwene yeandilagiliche ndi yeakundiywagila nene ani. Nyenye semukawesile ng'odo kupulika lichwi lyake vala kumlola mwene aviye, 38 vala muhela njowo chake mugati yenu, kwakuva semwikumdikila yula yealagilichwe na mwene. 39 Mukugalola hilo Masimbo ga Nguluvi, kwakuva mwihocha kuva mugati lyake damumwanuka uwumi va mbepali. Masimbo ago gakundilongelela nene! 40 Ila mwilema kwacha kwa nene, neke muwanuke uwumi va mbepali.

41 "Nene sendisaka kunjumwa na vanu. 42 Ila ndichela kuva nyenye muhela lukelo lwa Nguluvi munumbula chenu. 43 Nene ndachile kwa umwimike va Daada vangu, ila mwilema kundiwanuka. Ila munu yungi ngaikwacha kwa umwimike vake, uyo damwikumwanuka. 44 Mwikela kwinjuma mwavene, ila semugangamala kusaka uginyange weuhuma kwa Nguluvi yumwene! Nondee, damuwesa wuli kundidikila nene? 45 Mubihile kuhocha kuva nene dandikuvalata kwa Daada, hamu! Musa nde daakuvalata nyenye kwakuva mukumdikila mwene. 46 Ngita ndakyene mukamudikile Musa, suwe, ngamuwesa kundidikila nene, kwakuva mwene akasimbile njowo changu. 47 Ila semwidikila gala gyeasimbile Musa, muwesa wuli kudikila njowo changu chendilonga?"