1 Ila Yesu akahelela kukidunda kya miseituni. 2 Pamilau lyake mbugamie akahele kangi ku Kaye lya Nguluvi. Vandu vonda vakamuhelelie, mwene akakalile panyi na kuvanga kuvawunanicha. 3 Vawulanichi va malagilicho na Vafalisayo vakamletile mdala yumwi yeibatilwe muugoni. Vakamwimiche pagati lyawo. 4 Suwe, vakamuhucha Yesu, "Muwulanichi! Mdala uyu tumbatile muugoni. 5 Mumalagilicho ga Musa geagavilwe na Nguluvi, gikutuwulanicha nefwe kuva mdala ngita uyu atovwe maganga mbaka afuwe. Wuli, veve wilonga liki?" 6 Vene vakalongile ndeni neke vapate nongwa lyelikumgita va mlate. Ila Yesu akagundama, akasimbile panyi kwa kyala kyake. 7 Pevaginile kumuhucha Yesu akawime, akavalongie, "Ngita agehe munu yeihela sambi pagati lyenu, aveche va kwanja kumtova liganga mdala uyu." 8 Suwe, Yesu akagundama kangi, akasimbile panyi kwa kyala kyake. 9 Pevapulike ago, vakavanga kuhega yumwi yumwi, vakalonguwe vagogolo na vakafwatile vadimi kuhega. Yesu akasigalie weka hela pamwi na yula mdala, akali ahimile pautalo lyake. 10 Suwe, Yesu akahimile, akamuhucha yula mdala, "Vahele kwiya vevakali vakukulata? Wuli, kwahela munu yeasigale neke akuhige nongwa?"

11 Yula mdala akamuhigile, "Mtwa, kwihela ata yumwi yeanihigile!"

Suwe, Yesu akamlongie, ata nene sendikuhiga helele, ila kuvangila neng'uli mubihile kugita sambi kangi.

12 Suwe, Yesu akaendelele kuvalongela lila lipinga lya vanu, "Nene ndi welu va inyi. Munu yeyonda yeikwacha kwa nene, daseigenda ng'odo mukisi, ila daivecha na welu veukumlongocha muuwumi va mbepali."

13 Suwe, Vafalisayo vakamlongie Yesu, "Veve ukwilongela yuve, ila kwihela munu yeidikila njowo chako cheulonga."

14 Yesu akavahigile, "Ata ngita ndikwilongela yune, gendilonga ndi ga undakyene, kwakuva ndichela kwendihuma na kwendihelela. Ila nyenye semchela kwendihuma vala kwendihelela. 15 Nyenye muhiga nongwa munu kwa kumlola kwivala, ila nene sendimuhiga munu yeyonda. 16 Ila ata ngita ndihiga nongwa, ndihiga nongwa ngita peing'ang'wa, kwakuva sendihiga weka hela, ila ndihiga nongwa pamwi na Daada yeandagiliche. 17 Isimbilwe Mumalagilicho gyenu gemgavilwe na Musa kuva, uswida va vanu vavili, ndi undakyene. 18 Ndeni, nene ndikwilongela yuve na Daada yeandilagiliche ndi mswida vangu."

19 Suwe, Vafalisayo vakamuhucha Yesu, "Daada vako alikwiya?"

Yesu akavahigile, "Nyenye semukundichela nene vala semumchela Daada. Ngita ngamunichele nene, suwe ngamumchela Daada vangu."

20 Yesu alongile ago gyonda peawulanicha ku Kaye lya Nguluvi, pono pevakali vivika lisanduku lya usembe. Ila kukala kwihela munu va kumbata, kwakuva kigono kyake kikali kyave kufika.

21 Yesu akavalongie kangi, "Nene ndihelela nyenye mukundifuatila, ila mwifua mu sambi chenu. Kwendihelela nene, nyenye semwesa kufikila." 22 Vakomi va Vayawudi vakalonga, "Manyi akwidocha? Wuli, ilonga kwendihelela nyenye semwesa kufikila?" 23 Yesu akavalongie, "Nyenye va muhumile baha panyi, nene ndihumile kukyanya. Nyenye ndi va muinyi iyi, nene sevainyi iyi. 24 Kwakuva ndivalongelege mwifua mu sambi chenu. Ngita semwidikila kuva, ‘Nene ndi yula yendikali ndikuvalongela kuhuma pamwandi.’"

25 Vene vakamuhucha, "Veve ani?" Yesu akavahigile, "Ndivalongie kuhuma pamwandi! 26 Ndigehe na makani molofu gya kuvalongela na kuvahinga nyenye. Ila yula yeandilagiliche ndi va undakyene na nene ndikuvalongela vanu vonda gala gyendikapulike kuhuma kwa mwene."

27 Vene sevachele kuva Yesu akali akilonga makani gya Daada vake va kuluhano. 28 Baho Yesu akavalongie, "Pemukumnamula Mwana va Munu, baho pemuchela kuva, ‘Nene ndi mwene,’ sendigita finu fyonda kwa umwimike vangu, ila ndigita gala Daada geandiwulaniche. 29 Yula yeandilagiliche agehe pamwi na nene, mweni seandilekile weka hela, kwakuva figono fyonda ndigita gala geing'ang'a mwene." 30 Peamalile kulonga ago vanu volofu vakamdikila.

31 Yesu akavalongie vala Vayawudi vevamdikile, "Ngita muginya mawulanicho gyangu ndakyene muvecha vachulila vangu va ndakyene. 32 Baho, damchela undakyene. Suwe, kwa ng'asi lya undakyene uwo, Nguluvi daakuvalekela kuhuma mu usutu."

33 Vene vakahigile, "Nefwe ndi ulelo va Ibulahimu na setukali vanyigendwa va munu yeyonda yula. Ulonga wuli kuva, ‘Datuvecha pekesu?’"

34 Yesu akavahigile, "Ndakyene ndikuvalongela, munu yeyonda yeigita sambi ndi msutu. 35 Msutu seakwikala kukaye igita kasi figono fyonda, ila mwana ikala kukaye mbepali. 36 Suwe, Mwana peakuvalekelela kuhuma muusutu va sambi, suwe, damvecha pekesu ndakyene. 37 Ndichela kuva nyenye ndi ulelo va Ibulahimu. Ila mwikela kundidocha kwakuva mulema kwanuka mawulanicho gyangu. 38 Nene ndilonga gala gyendilolile kwa Daada, ila nyenye mwigita gala gyeavalongie daada venu."

39 Vene vakamhigile, "Nefwe daada vetu ndi Ibulahimu!" Yesu akavalongie, "Ngita nyenye ngamuvechile vana va Ibulahimu, ngamugita gala geakagitile Ibulahimu. 40 Nene ndivalongila undakyene vendiupulike kuhuma kwa Nguluvi, ata ndena nyenye mwikela kundidocha. Ibulahimu seagagitile ndena! 41 Nyenye mwigita makani galagala gyeakagitile daada venu."

Vene vakamlongie, "Nefwe ndi vana va undakyene va Nguluvi, tugehe na daada yumwi hela mwene ndi Nguluvi."

42 Yesu akavalongie, "Ngita Nguluvi ngaavechile Daada venu, ngamundikela, kwakuva nene ndihumile kwa Nguluvi na neng'uni ndigehe baha. Sendachile kwa umwimike vangu ndi yune, ila Nguluvi yumwene ndi yeandilagiliche. 43 Wuli semchela aga gyendilonga? Kwakuva mulema kupulika unanzi vangu. 44 Nyenye daada venu ndi Setani, mwigita makani gyeagitile daada venu. Kuhuma pamwandi mwene akali akuvadocha vanu. Seikela kugita gegagehe gya undakyene, kwakuva undakyene ihela munumbula lyake, Peilonga udesi Setani ndi kyanda kyake, kwakuva mwene ndi mudesi na daada va udesi. 45 Nene ndilonga undakyene, ila nyenye semukundidikila. 46 Ni ani mugati lyenu iwesa kulonga undakyene kuva nene ndigehe na nogwa kwa Nguluvi? Ngita nene ndilonga undakyene wuli semukundidikila? 47 Yula yeahumile kwa Nguluvi, akupulika gya Nguluvi. Ila nyenye semupulika kwakuva nyenye sevana va Nguluvi."

48 Vayawudi vakamlongie Yesu, "Wuli, nefwe setukalongile kuva veve ndi Msamalia na ugehe na lihoka?"

49 Yesu akahigile, "Nene ndihela lihoka, nene ndikumginya Daada vangu, ila nyenye semukundiginya. 50 Nene sendisaka vanu vaniginye, ila agehe yumwi yeing'ang'a vanu vaniginye na mwene nde muhiga va makani ago. 51 Ndakyene ndikuvalongila, munu yeyonda yeakuuginya unanzi vangu daseafua mbepali."

52 Vayawudi vakamlongile, "Nondee tuchela kuva veve ugehe na lihoka! Ibulahimu afue na vatekechi navo vafue, nondee veve ukutulongela munu, ‘Yeiginya unanzi vangu seafua mbepali!’ 53 Wuli ukwigita kuva mkomi kuchumba daada vetu Ibulahimu yeafue? Na vatekechi vafue. Veve ukwigita kuva ani?" 54 Yesu akavahigile, "Ngita ndikwinjuma yune Ukomi vangu sekinu. Ila Daada vangu ndi yula nyenye mwilonga ndi Nguluvi venu ndi yeakuninjuma nene. 55 Vala nyenye semwimchela, ila nene ndimchela. Ndikilonga sendimchela, ndivecha mdesi ngita nyenye, nene ndimchela na ndikulikolela njowo chake. 56 Ibulahimu, daada venu akakedukile hilo kuchela kuva nene dandikwacha. Akali ngita andiwene, akakedukile hilo."

57 Vayawudi vakamlongie, "Veve uhela miyaka milongu mihano, nave umuwonile Ibulahimu?" 58 Yesu akavalongie, "Ndakyene ndikuvangela peave kubabwa Ibulahimu, nene ndibabilwe daa." 59 Baho, vakahola maganga neke vamtove, ila Yesu akafyama, pambele akahumile ku Kaye lya Nguluvi.