1 Pegichumbile ago, Yesu akahagime mulihiva lya Galilaya kangi likemelwa lihiva lya Tibelia. 2 Lipinga lya vanu lyamuhelelie Yesu, kwakuva vakali vilola umanyitu cheakali akuchigita kwa kuvananicha vatamwa. 3 Suwe, Yesu vakakang'ie pakidunda na akakalile, pamwi na vachulila vake. 4 Chipindi icho, lihungu lya Pasaka lya Vayawudi ikali samba kufika. 5 Yesu pealavile na kulola lipinga likomi lya vanu lyamuheleliye, akamuwucha Filipo, "Tugula kwiya kyakula kya kuliya vanu ava?" 6 Yesu akamuwuchile Filipo ndeni, neke amgeche, kwakuva mwene achelile daigita wuli.

7 Filipo akamuhigile, "Ata ngita datugita kasi kwa myaka gyolofu ave ngasetukali na sendi cha kuvagulila vanu ava kyakuliya!"

8 Mchulila yumwi va Yesu litawa lyake Andelea, uyo akali lukolo lwake Simoni Peteli, akamlongie, 9 Andelea akamlongie Yesu, "Bahala poyuli mdimi yumwi anagyo mibumunda mihano gya sayili na fisomba fivili fidodo. Ila ifi sefikuvakwila vanu ava volofu!"

10 Yesu akavalongela vachulila vake, "Muvalongele vanu vakale panyi." Pono pala pakali na mikolowoga myolofu. Suwe, vanu vonda vakakalile panyi. Mulipinga lila kukali na vagosi elufu chihano. 11 Suwe, Yesu akanyamula gila mibumunda, akamuhongiche Nguluvi, akavagavila vanu vonda yevakali pala. Akategula fisomba akagita ngita pamwandi, kila munu akaliye ngita aviye kuliya. 12 Vanu pevagwitile, Yesu akavalongela vachulila vake, "Mulundase fipande fyonda fyefisigie, kibihile kuyaga kinu kyokyonda." 13 Suwe, vakalundise fyefisigale, vakamemiche vindilu kumi na chivili.

14 Vanu pevawonile umanyitu wula weagitile Yesu, vakalonga, "Ndakyene munu uyu nde yula mvichi yetukumuhuvilila kuva daikwacha muinyi." 15 Yesu akachele kuva vanu vale visaka kumbata na kumvika kwa ludali kuvecha Ng'achale vawo. Ila mwene akahega akahelela kangi mukidunda weka hela.

16 Peifikile palumie, vachulila va Yesu vakahikile kuhelela kulihiva lya Galilaya. 17 Vakaing'ile muwato na kuhagama kumwambo lya lihiva kuhelela Kapelanaumu. Kisi likaingile suwe, ila Yesu akali ave seawuyile neke aveche pamwi navo. 18 Suwe, mulihiva kukali na madaba makomi, kwakuva lukala lukomi lukali lupuga. 19 Vachulila va Yesu pevakali vaendelela kusola wato utali va kilometa chihano awu sita, vakamuwona Yesu igenda pakyanya lya malenga, ikwacha pepi na wato, vakaogofya hilo. 20 Ila Yesu akavalongie, "Ndi nene, mubihile kuogofya!" 21 Vene vakasakile aingile muliwato. Bahobaho, vakafikile kumwambo pevakali vakuhelela.

22 Pamilau lyake, lipinga lya vanu vala vevasigalie kumwambo lungi lya lihiva, vakatambule kuva kukali na wato umwi hela pala, kangi vakachele kuva Yesu seakang'ie muwato wula pamwi na vachulila vake, ila vachulila vake vakahele weka hela. 23 Suwe, vanu vangi vakachile na wato chingi kuhuma ku Tibelia, chikafikile pepi na pono pala vanu pevaliye mibumunda, Mtwa peamuhongiche Nguluvi. 24 Suwe, vanu avo pevachelile kuva Yesu na vachulila vake sevagehe bahala, vakang'ile muwato icho vakahele Kapelinaumu kumsaka Yesu.

25 Vala vanu pevamuwonile Yesu kumwambo lungi lya lihiva vakamuhuchile, "Muwulanichi, ufikile pandili kuno?"

26 Yesu akavahigile, "Ndakyene ndikuvalongela, mukundisaka sekwakuva mulolile umunyitu, ila kwakuva mukalie gila mibumunda mukagwite. 27 Mubihile kugita kasi kwakuva lya kuvapatila kyakula kyekiwola, ila mugite kasi kwakuva lya kupatila kyakula sekiwola, kyekikala mbepali, fyakula ifyo dafivagavila uwumi va mbepali kuhuma kwa Nguluvi. Mwana va Munu dakuvagavila kyakula ikyo, Nguluvi Daada amgavile mwanavake umwimike va kugita ndena."

28 Suwe, vene vakamuhucha, "Tugite liki neke tuwese kugita gala Nguluvi geakela tugite?"

29 Yesu akavahigile kuva, "Kasi yeikela Nguluvi muigite, kumdikila yula yeamlagiliche."

30 Baho, vakamuhucha, "Dawigita umanyitu liki neke tulole twiwese kukudikila? Dawigita liki? 31 Vagogolo vetu vakalie kyakula kyekikemelwa mana ukoya ku kwelu, ngita peisimbilwe mumasimbo ga Nguluvi, ‘Avagavile mibumunda gakuliya gegahumile kwa Nguluvi.’"

32 Suwe, Yesu akavalongie, "Ndakyene ndikuvalongela, Musa seavagavile vagogolo venu mibumunda gila, ila Daada vangu nde yeakuvagavila nyenye mibumunda gya undakyene kuhuma kuluhano. 33 Kwakuva libubunda lya Nguluvi ndi yula yeikwika kuhuma kuluhano, neke avagavile uwumi va mbepali vanu vonda vevagehe muinyi."

34 Suwe, vakamlongie, "Mtwa, kuvangila nondee utugavile libumunda ilyo, figono fyonda."

35 Yesu akavalongie, "Nene ndi libumunda lya uwumi. Munu yeikwacha kwa nene na kundidikila, daseivecha na njala ng'odo, kangi daseivecha na ng'elu ng'odo. 36 Ila ngita pendivalongele kuva, ata ngita mundiwene, ila mwave semukundidikila. 37 Vanu vonda vendigavilwa na Daada davekwacha kwa nene na kundidikila. Kangi nene sendikumlema ata yumwi yeikwacha kwa nene, 38 kwakuva ndiikile kuhuma kuluhano neke ndiveche kugita gala geakela Daada yeandilagiliche nene. Sendachile kugita gendikela nene. 39 Mwene yeandilagiliche, ikela ndigite ndeni, ndibihile kumyagicha ata munu yumwi mugati lya vala veandigavile, ila ndivachulubuche vonda, vaveche uwumi mukigono kya mwiso. 40 Kwakuva kyeakela Daada vangu ndi iki, kila munu yeakumlola Mwana na kundidikila, aveche na uwumi va mbepali. Nene dandikwacha kumchulubucha mukigono kya mwiso."

41 Suwe, Vayawudi vakavanga kung'ung'ula kwakuva Yesu akalongile, "Nene ndi libumunda lyeuikile kuhuma kuluhano kwa Nguluvi." 42 Vakalonga, "Uyu munu se Yesu, mwana va Yosefu ndaa? Tuvachela daada vake na maye vake! Nondee, iwesa wuli kulonga, ahumile kwa Nguluvi?"

43 Yesu akavahigile, "Mubihile kung'ung'ula nyenye kwa nyenye. 44 Kwihela munu yeiwesa kwacha kwa nene, ngita Dada yeandilagiche seamlogochile. Nene dandikumchulubucha munu uyo kigono kya mwiso. 45 Mukiganulo kya Nguluvi mvichi vake yumwi akasimbile ndeni, ‘Nguluvi daakuvawulanicha vanu vonda.’ Suwe, munu yeyonda yeipulikicha na kwidikila kuhuma kwa Daada, uyo daikwacha kwa nene. 46 Kwahela munu yeamuwonile Daada, ila yula yeahumile kwa Nguluvi, mwene weka hela ndi yeamuwonile Daada. 47 Ndakyene ndikuvalongela, munu yeyonda yeakundidikila nene anago uwumi va mbepali. 48 Nene ndi libumunda lya kyakula kyekikuvagavila vanu uwumi. 49 Vagogolo venu vakalie mana kula kuwelu, ila vakafue. 50 Ila baha kugehe na libumunda lilihumile kwa Nguluvi, neke munu yeyonda dailiya daseifua. 51 Nene ndi libumunda lya uwumi weukwikile kuhuma kuluhano kwa Nguluvi. Munu yeyonda yeilia libumunda, daikala mbepali. Libumunda ilyi ndi muvili vangu ndikuhuhecha neke vanu va inyi vaveche na uwumi va mbepali."

52 Suwe, Vayawudi vakavanga kwilumba vavene, "Munu uyu iwesa wuli kutugavila muvili vake, tuliye?"

53 Yesu akavalongie, "Ndakyene ndikuvalongela, ngita semliya muvili va Mwana va Munu na kunyuwa danda lyake, sedamvecha na uwumi va mbepali. 54 Munu yeyonda yeiliya muvili vangu na kunyuwa danda lyangu, agehe na uwumi va mbepali na nene dandikwacha kumchulubucha mukigono kya mwiso. 55 Kwakuva muvili vangu ndi kyakula kya undakyene na danda lyangu ndi danda lya undakyene. 56 Munu yeyonda yeiliya muvili vangu na kunyuwa danda lyangu, ikala mugati lyangu na nene ndikala mugati lyake. 57 Ngita Daada agehe na uwumi yeandilagiliche nene, nene ndivecha uwumi kuchumbila mwene. Ndeni munu yeyonda yeilia muvili vangu, iwanuka uwumi kuhuma kwa nene. 58 Suwe, nene ndi libubunda veuhumile kwa Nguluvi. Libubunda ili seliwana na wula wevaliye vagogolo venu. Ata ndeni vakafuwe. Ila munu yeyonda yeiliya libumunda ili daivecha na uwumi va mbepali."

59 Yesu akalongile njowo ichi chipindi peagehe kuwulanicha Mukaye lya kutang'anila Vayawudi ukoya ku Kapelinaumu.

60 Vachulila vake volofu pevapulike ago, vakalonga, "Vanu sevakugachela kisatu! Ani yeiwesa kugadikila?"

61 Yesu akachelile kuva vachulila vake vakali vakung'ung'ulika kwa gala gealongile, ngajila kulongelwa na munu. Suwe, Yesu akavahucha, "Wuli, makani aga gakuvagita muogofiye? 62 Daivecha wuli, dakumulola Mwana va Munu iwuya kuluhano kula peakali pamwandi? 63 Muhe va Nguluvi nde ukuvagavila vanu uwumi. Munu seiwesa kugita kinu kyokyonda kwa ludali chake. Njowo chendivalongile ndi njowo chechihuma kwa Muhe va Nguluvi na chileta uwumi va mbepali. 64 Ila vagehe vanu pagati lyenu vilema kudikila." Yesu akalongile ndeni, kwakuva akachelile kuhuma pamwandi kuva ndi ani, dasekumdikila na ndi ani daakumseduka. 65 Suwe, Yesu akaendelie kulonga, "Kuhumila na ago, ndikavalongile kuva kwihela munu yeiwesa kwacha kwa nene, ngita Daada seamlongoche."

66 Kuchumbila ago, gyealongile Yesu, volofu vevamuheleliye Yesu, vakawuyile kukaye yao, vakalekile kumuheleliya Yesu kangi. 67 Suwe, Yesu akavahucha vala vachulila vake kyumi na vavili, "Wuli na nyenye mwisaka kuhega?"

68 Suwe, Simoni Peteli akamuhigile, "Mtwa, tuhege tubite kwiya? Veve unacho njowo cha uwumi va mbepali. 69 Nefwe tudikila na tuchela kuva veve ndi yeuhanguliwe kuhuma kwa Nguluvi aviye wumi."

70 Yesu akavalongie, "Nene ndivahagule nyenye kyumi na vavili kuvecha vachulila vangu, ila yumwi pagati lyenu akulongochwa na Setani!" 71 Yesu akali akumlongela Yuda, mwana va Simoni Sikaliyoti. Yumwi va vachulila vake. Pambele nde akachile kumseduka Yesu.