1 Pegachumbile makani ago, Yesu akavangile kuchungutila pono cha myani gya ku Galilaya. Seakakelie kuchungutili ku Yudea, kwakuva filongochi va Vayawudi vakasakile kumdocha. 2 Chipindi cha Lihungu lya Vayawudi lyelikemelwa lihungu lya fibudi likali pepi. 3 Suwe, vakolo vake Yesu vakamlongie, "Hege baha helele ku inyi lya Yudea, neke vachulila vako vakawone umunyitu gyeugita. 4 Munu yeisaka kuchelwa na vanu seigita makani kwa kufyama. Kwakuva veve ugita makani ago, suwe, uyilolese kwa vanu vonda neke vakuchele." 5 Vakolo vake vakalongile ndeni, kwakuva vene sevakumdikie Yesu.

6 Yesu akavalongie, "Chipindi changu vakuhelela ukoya wave kufikila, ila nyenye mwiwesa kuhelela chipindi chochonda. 7 Vanu va inyi iyi sevavesa kuvavipila nyenye, ila vakunivipila nene kwakuva ndikuvalongela kuva vigita makani mawofu. 8 Nyenye muhelele kulihungu, ila nene sendihelela kulihungu kwakuva chipindi vangu wave kufikila." 9 Yesu peamalile kulonga ago, akasigalila kuko mu inyi lya Galilaya.

10 Vakolo vake Yesu pevalonguwe kuhelela kulihungu, Yesu mwene akahelela kulihungu ila kwa kwifia. 11 Kula kulihungu filongosi va Vayawudi vakali vakumsaka Yesu mulihungu na vakali vakuvahucha vanu, "Agehe kwii uyu munu?"

12 Kukali na luheya wolofu mulipinga lya vanu. Vakati wungi vakalongie, "Ndi munu mnofu." Vangi vakalongie, "Hamu, akuvachanga vanu." 13 Ila kwahela ata munu yumwi yeagecha kulonga njowo lwa Yesu pawelu, kwakuva vakaogwipe vala filongosi va Vayawudi.

14 Lihungu peifikile pagati, Yesu akahelela ku Kaye lya Nguluvi, akavanga kuwulanicha. 15 Suwe, Vayawudi vakadudwive na kulonga, "Munu uyu awesile wuli kuchela ngajila seayiwulaniche?" 16 Baho, Yesu akavahigile, "Mawulanicho gyendiwulanicha seganene, ila gihuma kwa Nguluvi yeanilagiche. 17 Munu yeikela kugita gala geikela Nguluvi, ichela ngita mawulanicho aga gahumile kwa Nguluvi, awu gendilonga nde mwene. 18 Munu yeilonga makani gyake mwene isaka anjumwe mwene. Ila yula yeisaka yula yeandilagiliche anjumwe ndi ilonga gya undakyene na vala semdesi. 19 Wuli, Musa seakavagavila malagilicho? Ata ndeni, kuhela ata yumwi venu yeikolela malagilicho. Kwa liki mwisaka kundidocha?" 20 Baho lipinga lya vanu vakamuhigile, "Veve ugehe lihoka! Ndi ani yeisaka kukudocha?"

21 Yesu akavahigile, "Ndigitile umunyitu umwi na nyenye vonda mukadudwive. 22 Musa avalagiche nyenye muvadumule bina vana venu vakigosi, kulonga undakyene lukani ulo lukavangichwe na vakukuu venu na sekwa Musa, ila nyenye mwidumula bina vana venu ata Kigono kya Kutulula. 23 Suwe, ngita munu iwesa kudumulwa bina Kigono kya Kutulula neke mukolele malagilicho gya Musa, wuli mukunivipila nene kwakuva ndimnaniche munu Kigono kya Kutulula? 24 Mubihile kumuhiga munu kwa makani gegiwoneka kwivala, ila mumhige munu kwa undakyene na peing'ang'wa."

25 Vanu vamonga va ku Yelusalemu vakalongile, "Uyu seyula munu yevakumsaka vamdoche na filongochi? 26 Mulole iywanga pawelu hela, vala kuhela munu yeilonga kinu kyokyonda! Wuli, yivecha filongochi vichele undakyene kuva uyu ndi Kilisito Mkombosi yeaguliwe na Nguluvi? 27 Ila Kilisito Mkombosi dapeikwacha kwihela munu daichela peahumile, ila nefwe tuchela peahumile munu uyu!"

28 Suwe, Yesu peikali iwulanicha ku Kaye lya Nguluvi akaywangile kwa lichwi ngomi, "Ndakyene mukunichela nene, kangi mukupachela pendihumile! Nene sendachile kwa umwimike vangu yune. Ila yeandilagiliche nene ndi va undakyene. Nyenye semukumchela. 29 Ila nene ndikumchela kwakuva ndihumile kwa mwene na mwene ndi yeandilagiliche."

30 Suwe, vanu vakasakile kumbata, ila kwihela munu yeagechile kumbata, kwakuva chipindi chake chave kufika. 31 Ila vanu volofu vevakali pala vakamudikile Yesu, vakali valonga, "Wuli, Kilisito Mkombosi daikwacha, daigita umanyitu myolofu kugina gyeagitile munu uyu?"

32 Vafalisayo vakavavapulike vanu viheya makani ago kutigila Yesu. Suwe, vene pamwi na vatekechi vakomi, vakavalagiliche vadima neke vakambate Yesu. 33 Baho, Yesu akavalongela kuva, "Dandivecha na nyenye kwa chipindi chidodo hela, baho dandiwuya kwa yula yeandilagiliche. 34 Damukundisaka, ila dasemukunilola, kangi semuwesa kwacha pala pendivecha."

35 Suwe, filongochi va Vayawudi vevakali pala vakwiwucha vene kwa vene, "Munu uyu ihelela kwiya, pono nefwe setuwesa kumuwona? Wuli, daihelela kwa Vayawudi yevatawanyike muinyi lya Vagiliki na kuvawulanicha Vagiliki? 36 Wuli, isika kutulongela liki kwa njowo ichi cheilonga, damukundisaka, ila dasekuniwona, kangi dasemuwesa kwacha pendigehe nene?"

37 Kigono kya mwiso, kigono kila kikomi kya lihungu lya fibudi. Suwe, Yesu akawime, akalonga kwa lichwi ngomi, "Munu yeagehe na ng'elu ache kwa nene anyuwe malenga. 38 Ngita peisimbilwe mumasimbo ga Nguluvi kuva, ‘Munu yeyonda yekunidikila nene, daivecha na fipengo fya malenga gya uwumi gipogoma munumbula lyake!’" 39 Yesu akali iywangila makani ga Muhe va Nguluvi, yula daikumdikila daakumuwanuka. Chipindi icho, Nguluvi akali ave semuhechile Muhe vake, kwakuva Nguluvi seakali ave seawonisile pawelu ukomi va Yesu.

40 Vanu vangi mulipinga lila pevapulike njowo icho, vakavangile kulonga kuva, "Ndakyene, munu uyu ndi yula mvichi yetukumuchindila kuhuma kwa Nguluvi!" 41 Vanu vangi vakalongile, "Munu uyu ndi Kilisito Mkombosi!"

Ila vangi vakalongile, "Hamu! Kilisito Mkombosi yeaguliwe na Nguluvi seawesa kuhuma muinyi lya ku Galilaya. 42 Msimbo ga Nguluvi gilonga Kilisito Mkombosi ihuma muulelo va Dawudi. Kangi, daibabwa ku Betelehemu, mumwani veakalile Dawudi!" 43 Suwe, vanu vakayinengile kwakuva lya Yesu. 44 Vanu vangi vakasakile kumbata Yesu, ila kwihela munu yeagechile kumbata.

45 Suwe, vala vadima vakawuya kangi kwa vatekechi vakomi na Vafalisayo, vala vevalagilichwe kumbata Yesu, vakahuchwa, "Kwa liki semumbatile Yesu?"

46 Vala vadima vakavahiga, "Kwihela munu yeakawaile kulonga ngita peilonga munu uyu!"

47 Vafalisayo vakavahucha, "Wuli na nyenye avachangile?" 48 "Wuli, kugehe na kilongochi yeyonda yula awu Mfalisayo yeamukumchela? 49 Ila lipinga lya vanu vevamuidikiye sevachele malagilicho ga Musa vakotoliwe na Nguluvi."

50 Baho, yumwi va Mfalisayo litawa lyake Nikodemo, yula yeamuhelelie Yesu kigono kimwi pamie. Suwe, akavalongie, 51 "Wuli, malagilicho geatugavile Nguluvi kuchumbila Musa, sechikutukanicha kumuhiga munu nongwa ngajila kumpulikicha tandi na kuchela geagitile?"

52 Vene vakamuhigile, "Wuli, veve ndeni uhumile muinyi lya Galilaya? Helele, ukakwimbe unofu kangi Masimbo ga Nguluvi, dauchela kuva kwihela mvichi Nguluvi yeihuma muinyi lya Galilaya!"

53 Baho, vakahegile, kila yumwi akawuya kukaye lyake.