1 Figono sita kabula lya lihungu lya Pasaka likali have, Yesu akafikile Betania yeakwikala Lasalo yeachulubuchwe na Yesu. 2 Ukoya vakamwandilisie kyakula kwa uginyo lya Yesu. Malita akali akuvahudumila. Lasalo akali yumwi va vala yevali pamwi na Yesu pamesa lya kyakulia. 3 Malia akanyamule libochobocho lya mafuta ga manung'unilo gya nalido gyegagelanichwe kwa sendi ngomi akambakile Yesu mumagulu gyake na kufyangusa kwa fwili chake. Kaye yonda ikanung'unile mafuta gala. 4 Yuda Sikaliyoti, yumwi va vachulila va Yesu, pambele ekumkana Yesu, akalonga, 5 "Manung'ulilo ago ngagaguchilwe ngatupatile sendi na kuvagavila vahangala, ngatuwesile kupata sendi cha kumuhomba munu mahombo gyake gya mwaka?" 6 Yuda alongile ago, sekuvawonela lusungu vahangala, ila akali mwichi kwakuva mwene akali mvika lusanja na figono fyolofu akali ihicha mumula mulusanja na kutumila weka hela. 7 Ila Yesu akahiga, mumleke maye uyu! Andisukulie mafuta kwakuva lya kigono kyangu kya kusilwa. 8 Kwakuva vahangala muvecha navo figono fyonda, ila semvecha na nene figono fyonda.

9 Vayawudi volofu vakapulike kuva Yesu agehe ku Betania. Vakahelela ukoya sekumlola Yesu hela, ila kumlola Lasalo yeachulubichwe na Yesu. 10 Vatekechi vakomi vakagitile mpango va kumdocha Lasalo, 11 kwakuva lya Lasalo Vayawudi volofu vakavalema filongosi vawo, vakamdikila Yesu.

12 Pamilau lyake, lipinga likomi lya vanu vevachile mulihungu vakapulike kuva Yesu agehe kung'asi ikwacha ku Yelusalemu. 13 Vakakolile mikwati gya mitende vakahuma vakahelela kumwanuka, kuno vilonga, "Tumdikile Nguluvi! Anemelwe uyu yeikwacha kwa umwimike va Mtwa. Anemelwe ng'achale va Isilaeli."

14 Yesu akamwene mwanapunda akamkang'iye, ngita peisimbilwe Mumasimbo,

15 "Bihile kwogopa vanu va mwani va Siyuni!

Lole ng'achale venu ikwacha,

akang'iye mwanapunda!"

16 Chipindi icho vachulila vake sevachile makani ago, ila Yesu achulubuke suwe, vakawiwuke kuva ago gakali gasimbilwe kutigila mwene na kuva vanu vamgitile ago.

17 Lipinga lya vanu likali pamwi na Yesu chipindi peamkemelige Lasalo kuhuma mumgunda lya Nguluvi na kumchulubucha kuhuma kwa vanu yevafue, vakalutiche makani gya Yesu. 18 Lipinga lila lya vanu vakahelela kumwanuka, kwakuva vampulike kuva Yesu agitile umanyitu ugo va kumchulubucha Lasalo. 19 Mafwalisayo vakalonganile, "Mulola? Setuwesa kugita kyekyonda! Mlole vanu vonda vakumdikila mwene."

20 Kukali na vamonga va Vagiliki mugati mwa vanu vafikile ku Yelusalemu kumfunya Nguluvi chipindi cha lihungu lya Pasaka. 21 Vanu avo vamuheleliye Filipo, munu va Betisaida muinyi Galilaya, vakamlongie. "Mkomi, tukela kumlola Yesu."

22 Filipo akahelela, akamlongie Andelea, baho avo vavili vakahelela kumlongela Yesu. 23 Yesu akavalongie, "Chipindi cha kunjumwa kwa Mwana va Munu ifikile! 24 Ndakyene ndikuvalongela, mbeyu lya ngano peseiguwa muganga na kufua, isigala ngita mbeyu weka hela. Ila leke ifue ibaba manunu myolofu. 25 Munu yeyonda yeikela uwumi vake, akuwuyagicha na yula yeivipila uwumi vake muinyi ugu akugalowola ata uwumi va mbepali. 26 Munu yeyonda yeisaka kundigumbanikila nene ndi ing'ang'wa andifuatile neke mnyigendwa vangu aveche na nene kila pono. Munu yeyonda yeakumgumbanikila Daada vangu igavilwa uginyange.

27 "Nondee numbula lyangu isugwime hilo na ndilonge liki? Ndilonge, ‘Daada, ndikusuka undilowole chipindi cha magudo?’ Hamu, sendiwesa kusuka ngita ndeni, kwakuva ndachile neke ndichumbile mumagudo ngita indena. 28 Daada, linjumwe litawa lyako!"

Baho lichwi ikapulikwe kuhuma kukyanya kwa Nguluvi, "Ndilinjumile suwe na ndikulinjuma kangi."

29 Lipinga lya vanu vevakali vahimile baho vakapulike lichwi ilyo na vamunga vawo vakalonga, "Ndimdilimo." Ila vangi vakalonga, "Vandumindumi va Nguluvi aywangile na mwene!" 30 Ila Yesu akavalongie, "Lichwi iyi seipulikike kwakuva lya nene, ila kwakuva lya nyenye. 31 Nondee ndi chipindi cha Nguluvi kuvahiga vanu va inyi. Nondee chipindi cha Nguluvi kumdaga kwivala Setani ndi mkomi va inyi iyi. 32 Na nene pandinamuliwa kukyanya kwa Nguluvi kuhuma ku inyi, ndikuvakwega vanu vonda kwa nene." 33 Yesu alongile ago akawonise ifua wuli.

34 Lila lipinga lya vanu likamuhigile, "Nefwe tupulike kuhuma mumasimbo gyetu kuva Kilisito yeahaguliwe na Nguluvi ekwikala mbepali. Veve uwesa wuli kulonga, Mwana va Munu isakwa kunamuliwa muinyi? Uyo Mwana va Munu ndi ani?" 35 Yesu akavalongie, "Welu uvecha na nyenye kwa chipindi chidodo. Mugende muwelu neke kisi libihile kuvagubika, kwakuva yeagenda mukisi seachela kweihelela. 36 Suwe, chipindi mgehe na ugo welu muuwidikile neke mpatile kuva vanu va welu."

Pamalile kulonga malichwi ago, Yesu akahelile sake na kwifyama kutali na lipinga lila.

37 Ata ngita, Yesu agitile umanyitu gyonda kuno valolela, ila vene sevamdikila, 38 ndena, njowo chealongile mvichi Isaya giwonike,

"Mtwa, ndi ani yeadikile unanzi vake?

Mtwa amwonesile ani umwimike vake?"

39 Sevawesile kudikila Yesu, kwakuva Nguluvi alongile kuchumbila mvichi Isaya kuva,

40 "Nguluvi agagitile meho gabihile kulola,

kuchubugacha luhala chawo,

neke sevawesile kulola kwa meho gyawo,

vala kuchela kwa luhalwa lwao,

neke vabihile kuwuya kwa nene, alongile Mtwa,

neke vabihile kunana."

41 Mvichi Isaya akalongile ago kwakuva akauwene ukomi va Yesu, kulonga makani gyake.

42 Ata ndeni, filongosi vangi va Vayawudi vamdikile Yesu. Ila sevakalongile pawelu kuva vaidikile, kwakuva lya kuvakogopa Mafalisayo kuvadaga mu Kaye lya kutang'anila Vayawudi. 43 Filongochi avo Vayawudi vakakeliye hilo kuginywa na vanu, kuchumba kuginywa na Nguluvi.

44 Baho Yesu akalongile kwa lichwi likomi, Munu yeanidikila nene, akundidikila nene hela, seadikila nene hela, akumdikila na yula yeandilagiliche. 45 Yeandilolela nene akumlolela na yula yeandilagiliche. 46 Nene ndi welu, na nene ndachile ku inyi neke vonda yevakundidikila vabihile kusigalia mukisi. 47 Yepulika malichwi gyangu ila seikolela, nene semuhiga, kwakuva sendachile kuhiga inyi ila kuvalowa. 48 Munuyeyonde yeseakupulika malichwi gyangu namwene daihigwa kwa malichwi gya undakyene gye ndikagalongiye. 49 Nene sendilongile kwa kukela nene yune, ila Daada yeandilagiliche ndi yeandiswitiliche ndilonge liki na ndiywange liki. 50 Na nene ndichela kuva ulagicho lwake luletila uwumi va mbepali. Nene ndilonga gala hela gealagileche Daada ndigalonge.