1 Yesu peamalile kusuka, akahegile na vachulila vake vakahelela kumwambo lya mgoka Kediloni. Pono pala kukali na mgunda mdodo, Yesu akahingile mula pamwi na vachulila vake. 2 Yuda, yeamkanile Yesu, kapachela pala, Yesu akali achovie kutang'anilaga na vachulila vake. 3 Yuda akahelela kunyamula lipinga lya vapunga, pamwi na vadima kuhuma kwa vatekechi vakomi na Vafalisayo, kuno vategule kibatali na milwenge pamwi na kyalukilo. 4 Yesu akachelege fyonda fyefikumuhumila, akahumile pautalo lyawo, akavahucha, "Mukumsaka ani?"

5 Vene vakamuhigile, "Yesu Mnazaleti!" Yesu akavalongie.

"Nene nde."

Yuda yeamkumkana akali ihimile baho pamwin na vene. 6 Suwe, Yesu pevalongie, "Ndi nene." Vene vakawuyile kumbele, vakaguwe panyi. 7 Yesu akavahucha kangi, "Mukumsaka ani?"

Vakamuhigile tukumsaka, "Yesu Mnasaleti!"

8 Yesu akavalongie, "Ndivalongie suwe kuva ndi nene. Ngita mukundisaka nene, muvaleke vanu ava vahele." 9 Yesu akalongie ndena neke gahumila gala gyealongile pamwandi, "Daada vala veundigavile seayagile ata yumwi."

10 Simoni Peteli akahomuwe kimage kikomi kyekidumula kuno na kuno, akamdumule lisigicha lya kulia mnyigendwa va Mtekechi Mkomi. Mnyigendwa yula litawa lyake Maliko. 11 Baho Yesu akamlongie Peteli, "Wise kimage kyako mulihako. Wuli, ndibihile kunyuwa kikombe kya magudo cheandigavile Daada?"

12 Baho vala vapunga va Valoma na mkomi vao na vadima va Vayawudi vakambata Yesu, vakamuwopa, 13 na kumsindika mbaka kwa Anasi, Anasi akali daada mganafu va Kayafa, yulayeakali Mtekechi Mkomi va chipindi ikyo. 14 Uyo Kayafa yeakali avalongie vakomi va Vayawudi kuva ing'ang'wa munu yumwi afue kwakuva lya vonda.

15 Semoni Peteli pamwi na mchulila yungi vakamfuatile Yesu. Yula mchulila yungi akali ichelwa kwa Mtekechi Mkomi, akaingile pamwi na Yesu mulidamwa lwa Mtekechi Mkomi. 16 Ila Peteli akali ahimile kwaivala, pepi na mlyangilo. Yula mchulila yungi yeakali ichelwa na Mtekechi Mkomi akahumile kwivala kumlongela yula mdala yeakali igita kasi lya kudindula mlyangilo amwingiche Peteli mugati. 17 Mdala yula va pamlyangilo akamuhucha Peteli "Veve ndi yumwinga va vachulila, va munu yula?"

Peteli akamlongie, "Se nene!"

18 Vanyigendwa na vadima vakali vakakochile lyoto kwakuva kukali na ng'ala, vakali vihotola lyoto. Peteli na mwene akali ihota lyoto pamwinga.

19 Mtekechi Mkomi akamuhucha Yesu, makani gya vachulila vake na mawulanichi gyake. 20 Yesu akamhigile, "Nene ndilongile na vanu vonda va muinyi wachiwachi. Figono fyonda ndiwulaniche kukaye lya kufunyila na kukaye lya Nguluvi, pala pono Vayawudi vonda vakwitanganilaga, vala sendilongile kyokyonda kwa kwifyama. 21 Wuli, ukunihucha nene? Vahuche vanu vevanipulikile nene. Vawo vachela kyendivalongie." 22 Peamalile kulonga ago mdima yumwi yeakali ahimile pepi na Yesu akamtovile limbalamanda kuno ilonga, "Wuli, ukumhiga endena Mtekechi Mkomi?"

23 Yesu akamhugile, "Ngita ndilongie njowo chiwofu, wonese uwofu wene. Ila ngita ndilongie undakyene, wuli ukunitovela?"

24 Baho, Anasi akamsindike Yesu kuno awopilwe kwa Kayafa Mtekechi Mkomi.

25 Simoni Peteli akali ahimile ikota lyoto. Vamonga va vala vevagehe bahala vakamuhucha, "Veve ndi yumwi va vala vachulila vake?"

Ila Peteli akakanile na kulonga, "Se nene!"

26 Mnyigendwa yumwi va Mtekechi Mkomi, mkolo vake yula munu yeadumulwe lisigicha na Peteli, akamuwucha Peteli, "Nene ndikuwonile veve kula mumgunda mdodo pamwi na Yesu?"

27 Peteli akakanile kangi, akiliga "Se nene" bahobaho livisi likavikile.

28 Suwe, kihola sagala, filongochi va Vayawudi vakamtegule Yesu kuhuma kwa Kayafa na kumsindika kaye lya mkomi va Valumi. Ila vene sevakaingie mugati lya kaye vakaongwipe kwingila ukoya ngakuvagitile vabihilwe kumfunya Nguluvi na vabihilwe lihungu lya Pasaka. 29 Baho kilongosi va Valumi yeakameliwe Pilato akahuma kwivala na kuvahucha, "Wuli munu uyu agitile nongwa liki mbaka mukwacha kumlata kwa nene?"

30 Vene vakamuhigile, "Ngita ngaseivecha na nogwa, nefwe ngasetumletile kwa veve."

31 Pilato akavalongela, "Suwe, mumtegule nyenye mukamuhige kwa malagicho gyenu."

Vayawudi vakamuhigile, "Malagicho gyetu katukanila kuhiga kudocha munu yeyonda." 32 Yikagitilwe ndeni neke makani galongile Yesu chigitilwe kuwonisa kuva ifua wuliwuli.

33 Baho Pilato akaingile mugati akamkemela Yesu na kumuhucha, "Veve ndi Ng'achale va Vayawudi?"

34 Yesu akamuhigile, "Wuli, njowo icho cha veve awu vakulongie vanu vangi njowo changu?"

35 Pilato akamuhigile, "Wuli nene ndi Myawudi? Vanu va inyi lyako na Vatekechi vakuletile kwa nene. Ugitile liki?"

36 Yesu akamuhigile, "Ung'achale vangu se va inyi ugu, ngita ung'achale vangu ngauvechile va inyi ugu, vanyigendwa vangu ngavanitangile neke ndibihile kubatwa na Vayawudi. Ila nondee ung'achale vangu se va baha."

37 Baho, Pilato akamuhuchile, "Veve ndi Ng'achale?"

Yesu akamuhigile, "Veve ulongile nene ndi Ng'achale. Nene ndibabilwe kwakuva iyo na kwajili ilyo ndachile kuinyi, kuvalongela vanu undakyene. Na kila munu va undakyene akunipulikicha nene."

38 Pilato akamuhuchile, "Undakyene ndi kinu liki?"

Pilato peamalile kulonga ago, akavaheleliye kangi Vayawudi kwaivala, akavalongie, "Sendiwonile luchowo lyolyonda lyeagitile munu uyu. 39 Ila nyenye muchovie kundisuka ndivawopulie munu yumwi kuhuma mukihopo chipindi va lihungu lya Pasaka, nondee mwisaka ndivawopolele Ng'achale va Vayawudi?"

40 Baho, vakatovile kyowo, "Hamu, se uyo, tukumkela Balaba!" Ila Balaba akali mnyaga.